Amravati Viral Video Case : अमरावतीत ३५० पेक्षा जास्त अश्लील व्हिडिओ व्हायरल झाल्याने खळबळ उडाली आहे. सुमारे १८० मुली या रॅकेटमध्ये अडकल्या असल्याचा दावा करण्यात आला आहे. पोलिसांनी तपास सुरू केला असून आरोपी फरार आहेत.
Amravati Viral Video Case : अमरावती जिल्ह्यात सोशल मीडियावर मोठ्या प्रमाणात अश्लील व्हिडिओ व्हायरल झाल्याने राज्यभरात संतापाची लाट उसळली आहे. अल्पवयीन मुलींच्या गोपनीयतेचा भंग करून त्यांना ब्लॅकमेल करणाऱ्या एका गुन्हेगारी टोळीचा संशय व्यक्त केला जात असून, या प्रकरणाने गंभीर वळण घेतले आहे.
नेमके काय घडले?
गेल्या काही दिवसांपासून व्हॉट्सॲप आणि इतर सोशल मीडिया प्लॅटफॉर्म्सवर आक्षेपार्ह व्हिडिओ मोठ्या प्रमाणात शेअर होत आहेत. प्राथमिक माहितीनुसार, संशयितांनी तरुणी आणि अल्पवयीन मुलींना पैशांचे आमिष दाखवून किंवा जबरदस्तीने अश्लील कृत्ये करायला लावली. त्यानंतर हे व्हिडिओ व्हायरल करून त्यांना ब्लॅकमेल करण्याचा प्रकार समोर आला आहे.
१८० मुली पीडित असल्याचा दावा
राज्यसभा खासदार डॉ. अनिल बोंडे यांनी या प्रकरणावर गंभीर चिंता व्यक्त केली आहे. त्यांच्या मते, सुमारे १८० मुली या रॅकेटमध्ये अडकल्या असण्याची शक्यता असून त्यापैकी अनेक अल्पवयीन आहेत. हे प्रकरण केवळ एका जिल्ह्यापुरते मर्यादित नसून मोठ्या षडयंत्राचा भाग असू शकतो, असा संशय त्यांनी व्यक्त केला आहे.
Related Articles
पोलीस तपास सुरू, सायबर सेल सक्रिय
अमरावती ग्रामीण पोलीसांनी या प्रकरणाची दखल घेत सायबर सेलमार्फत तपास सुरू केला आहे. पोलीस अधिकारी विशाल आनंद सिंगुरी यांनी सांगितले की, अद्याप कोणतीही अधिकृत तक्रार नोंदवली गेली नसली तरी पुरावे गोळा करण्याचे काम सुरू आहे. व्हायरल व्हिडिओ हटवण्यासाठीही प्रयत्न सुरू असून पीडितांची ओळख गोपनीय ठेवली जाईल.
नागरिकांचा संताप, आंदोलनाचा इशारा
या घटनेमुळे संतप्त नागरिक आणि विविध संघटनांनी पोलीस अधीक्षक कार्यालयावर धडक देत आरोपींना तात्काळ अटक करण्याची मागणी केली आहे. आरोपींना अटक न झाल्यास तीव्र आंदोलन छेडण्याचा इशाराही देण्यात आला आहे.
आरोपी फरार, शोधमोहीम तीव्र
या प्रकरणातील मुख्य आरोपी आपल्या कुटुंबासह फरार झाल्याची माहिती समोर आली आहे. पोलिसांनी विविध जिल्ह्यांत शोधमोहीम सुरू केली असून परिसरात तणावपूर्ण शांतता आहे. प्रशासनाने नागरिकांना अफवा न पसरवण्याचे आणि शांतता राखण्याचे आवाहन केले आहे.
