Parag Shah : 3 हजार कोटींची संपत्ती असलेला हा आमदार रस्त्यावर भिकारी का बनला?
मुंबईच्या रस्त्यांवर एक व्यक्ती सामान्य भिकाऱ्यासारखी फिरताना दिसली. पण जेव्हा या व्यक्तीची खरी ओळख समोर आली, तेव्हा सगळ्यांनाच धक्का बसला. कारण हा कोणी सामान्य माणूस नसून, महाराष्ट्रातील सर्वात श्रीमंत आमदारांपैकी एक असलेले भाजप नेते पराग शाह होते.
कोण आहेत पराग शाह?
घाटकोपर पूर्व मतदारसंघाचे आमदार पराग शाह हे राजकारणी आणि मोठे व्यावसायिक म्हणून ओळखले जातात. २०२४ च्या महाराष्ट्र विधानसभा निवडणुकीच्या प्रतिज्ञापत्रानुसार त्यांची संपत्ती ३,३८३ कोटी रुपयांपेक्षा जास्त आहे. एवढा श्रीमंत माणूस अचानक भिकारी बनून रस्त्यावर का आला, असा प्रश्न सगळ्यांना पडला होता. सोशल मीडियावर त्यांचे व्हिडिओ व्हायरल झाल्यानंतर यावर बरीच चर्चा झाली.
आध्यात्मिक साधनेचा भाग
पराग शाह यांना कोणतीही आर्थिक अडचण आलेली नाही. जैन परंपरेतील एका विशेष महिन्यात आपल्या आध्यात्मिक गुरूंच्या सांगण्यावरून त्यांनी हा निर्णय घेतला. संपत्ती आणि सत्तेचा अहंकार बाजूला ठेवून एका सामान्य माणसाचं आयुष्य जगून पाहणे, हा यामागचा मुख्य उद्देश होता. म्हणूनच त्यांनी सुरक्षारक्षकांना सोबत न घेता, आपला वेश बदलला आणि घाटकोपरच्या रस्त्यांवर ते एकटेच फिरले.
पराग शाह यांनी सांगितला अनुभव
या अनुभवादरम्यान घडलेला एक प्रसंग पराग शाह यांनी आवर्जून सांगितला. एका व्यक्तीने त्यांना जेवणासाठी २० रुपये दिले. ते पैसे घेऊन ते एका समोसे विकणाऱ्याकडे गेले. तिथे त्यांनी आपल्याकडे पैसे नसल्याचं सांगितलं. तरीही त्या विक्रेत्याने अजिबात न चिडता त्यांना समोसे दिले.
समोसे विकणाऱ्याची आर्थिक परिस्थिती बेताची असूनही त्याने केलेली मदत पराग शाह यांच्या मनाला स्पर्शून गेली. मुंबईकरांच्या मदतीच्या स्वभावाचा त्यांनी प्रत्यक्ष अनुभव घेतला.
भिकाऱ्याच्या वेशात असताना ज्या लोकांनी त्यांना अन्न आणि मदत दिली, त्या सर्वांना दीक्षा पूर्ण झाल्यानंतर ते पुन्हा भेटले. आपला वेश आणि मेकअप काढल्यानंतर त्यांनी या लोकांची भेट घेतली आणि त्यांचे आभार मानले.
आमदार आणि भिकारी यातील फरक
या एका दिवसामुळे आपला आयुष्याकडे बघण्याचा दृष्टिकोन बदलल्याचं पराग शाह यांनी सांगितलं. आमदार म्हणून लोक जेव्हा त्यांना भेटायला येतात, तेव्हा मिळणारा मान आणि आदर खूप वेगळा असतो. पण त्याच लोकांसमोर जेव्हा ते भिकारी म्हणून गेले, तेव्हा परिस्थिती पूर्णपणे वेगळी होती.
लोकांना त्यांची संपत्ती किंवा राजकीय पद माहीत नव्हतं, तेव्हा त्यांनी फक्त एक गरजू माणूस म्हणूनच त्यांच्याकडे पाहिलं. आपण एखाद्या व्यक्तीकडे कोणत्या दृष्टिकोनातून पाहतो, यावर तिची किंमत कशी ठरते, हे त्यांना या अनुभवातून समजलं.
लोकांकडून मिळणारा आदर कायमस्वरूपी नसतो, परिस्थिती बदलली की माणसाकडे बघण्याचा दृष्टिकोनही बदलतो, असं मत त्यांनी व्यक्त केलं. हा अनुभव आपण आयुष्यात कधीच विसरू शकणार नाही, असंही ते म्हणाले.
'बिच्चागाडू' सिनेमाची आठवण
पराग शाह यांना भिकाऱ्याच्या वेशात पाहून अनेकांना 'बिच्चागाडू' (Bichagadu) या प्रसिद्ध दाक्षिणात्य सिनेमाची आठवण झाली. या सिनेमात एक श्रीमंत नायक आपल्या आईच्या प्रकृतीसाठी एका स्वामींच्या सांगण्यावरून काही काळ भिकारी म्हणून जगतो. या काळात तो सामान्य माणसांचे कष्ट आणि जीवन जवळून अनुभवतो.
मुंबईतील पराग शाह यांचा हा प्रसंग वरवर पाहता या सिनेमासारखा वाटत असला, तरी त्यांचा या सिनेमाच्या कथेशी कोणताही संबंध नाही. जैन परंपरेतील आध्यात्मिक साधनेचा एक भाग म्हणून त्यांनी हा अनुभव घेतला. आपल्या आध्यात्मिक गुरूंच्या मार्गदर्शनाखालीच आपण हे केल्याचं त्यांनी स्पष्ट केलं.
भाजपा विधायक प्राग शाह भिखारी के रूप में सड़क किनारे बैठे और लोगों के बीच घूमते नजर आए ,,,
वीडियो में मुंबई के घाटकोपर पूर्व विधानसभा क्षेत्र के विधायक पराग शाह भिखारी के वेश में देखकर हर कोई हैरान रह गया कि आखिर करोड़ों की संपत्ति वाले विधायक ने भिखारी का रूप क्यों धारण किया?… pic.twitter.com/gFNX9nPKmx— TANVIR RANGREZ (@virjust18) September 14, 2026
३,३८३ कोटींची संपत्ती आणि मोठा धडा
रिअल इस्टेट क्षेत्रातून राजकारणात आलेल्या पराग शाह यांनी नगरसेवक म्हणून आपल्या राजकीय प्रवासाला सुरुवात केली. त्यानंतर ते घाटकोपर पूर्वमधून आमदार म्हणून निवडून आले. २०२४ च्या विधानसभा निवडणुकीच्या प्रतिज्ञापत्रात त्यांनी ३,३८३ कोटी रुपयांची संपत्ती जाहीर केली आणि ते देशभरात चर्चेत आले.
एवढ्या श्रीमंत लोकप्रतिनिधीने कोणताही बडेजाव न मिरवता एक दिवस रस्त्यावर भिकारी म्हणून घालवणं, हा आता चर्चेचा विषय बनला आहे. पण पराग शाह यांच्या मते, हा कोणताही पब्लिसिटी स्टंट नसून आयुष्याला वेगळ्या कोनातून समजून घेण्याचा एक आध्यात्मिक अनुभव होता.
एक दिवस सामान्य भिकारी म्हणून जगल्यामुळे लोकांची दया, अन्नाची किंमत आणि आदरामागील सामाजिक दृष्टिकोन त्यांना जवळून समजला. अनोळखी लोकांनी कोणतीही अपेक्षा न ठेवता केलेली मदत पाहून आपला माणुसकीवरचा विश्वास अधिक घट्ट झाल्याचं पराग शाह यांनी सांगितलं.
