- Home
- Maharashtra
- Solapur Rains : सोलापूरला मुसळधार पावसाने झोडपले, ग्रामीण भागात पुरसदृश्य स्थिती निर्माण, घरांमध्ये शिरले पावसाचे पाणी!
Solapur Rains : सोलापूरला मुसळधार पावसाने झोडपले, ग्रामीण भागात पुरसदृश्य स्थिती निर्माण, घरांमध्ये शिरले पावसाचे पाणी!
Solapur Rains : सोलापुरमध्ये पावसाने धुमाकूळ घातला असून पुरस्थितीसदृश स्थिती निर्माण झाली आहे. यामुळे शहरासह ग्रामीण भागाला देखील पावसाचा जोरदार फटका बसला आहे. नागरिकांच्या घरांमध्ये दुर्गंधीयुक्त पाणी देखील शिरले आहे.
सोलापुरात मुसळधार पावसाचा कहर
सोलापूर शहर व परिसरात रात्रभर विजांच्या कडकडाटासह मुसळधार पाऊस कोसळला. या तुफान पावसामुळे अनेक ठिकाणी पूरसदृश परिस्थिती निर्माण झाली असून शहरासह ग्रामीण भागातील जनजीवन विस्कळीत झाले आहे. रात्रीपासून सुरू असलेल्या पावसामुळे सखल भागात मोठ्या प्रमाणात पाणी साचले.
शहरातील रस्ते जलमय
अक्कलकोट रोड, मल्लिकार्जुन नगर, जुना विडी घरकुल, मित्रनगर आणि शेळगी या भागांमध्ये पाणी घरात शिरल्याने नागरिकांची मोठी तारांबळ उडाली. काही घरांमध्ये तब्बल २ ते ३ फूट पाणी घुसल्याचे चित्र दिसले. शहरातील मुख्य रस्ते जलमय झाल्याने वाहतुकीवर मोठा परिणाम झाला. विशेषतः सोलापूर-अक्कलकोट महामार्गावरील पंजवानी मार्केटसमोर पाणी साचल्यामुळे महामार्ग आणि सर्व्हिस रोडवरील प्रवास ठप्प झाला.
नागरिकांच्या घरात घाण पाणी
शहरातील २५६ गाळा परिसरात ड्रेनेज चेंबर ओव्हरफ्लो होऊन दुर्गंधीयुक्त पाणी नागरिकांच्या घरात शिरले. त्यामुळे लोकांना रात्रभर जागून काढावी लागली. महानगरपालिकेचे कर्मचारी तातडीने ड्रेनेज सफाईसाठी उतरले असून परिस्थिती नियंत्रणात आणण्यासाठी प्रयत्न सुरू आहेत. सोलापूर महापालिका आयुक्त डॉ. सचिन ओम्बसे आणि अतिरिक्त आयुक्त संदीप कारंजे यांनी मित्रनगर-शेळगी भागाची पाहणी केली. हवामान खात्याने दिलेल्या माहितीनुसार, शहरात मागील २४ तासांत ११८.३ मिमी पावसाची नोंद झाली आहे.
ग्रामीण भागात पूरसदृश परिस्थिती
सोलापूर शहराबरोबरच अक्कलकोट तालुक्यातील सांगवी खुर्द, सांगवी बुद्रुक, चपाळगाव आणि चुंगी गावांमध्ये जोरदार पावसाची नोंद झाली. आधीच भरून वाहणारे ओढे-नाले मुसळधार पावसामुळे ओव्हरफ्लो झाले आहेत. यामुळे गावांमध्ये पाणी शिरले असून नागरिकांना मोठ्या अडचणींना सामोरे जावे लागत आहे.
बोरी प्रकल्पातून वाढलेला विसर्ग
अक्कलकोट तालुक्यातील बोरी मध्यम प्रकल्पातून सकाळी सहा वाजल्यापासून ४००० क्युसेक विसर्ग सुरू करण्यात आला आहे. याआधी हा विसर्ग १५०० क्युसेक होता. त्यामुळे नदीकाठच्या गावांतील नागरिकांना सतर्क राहण्याचे आणि नदीजवळ न जाण्याचे आवाहन प्रशासनाकडून करण्यात आले आहे. तसेच, पाण्याचा प्रवाह सुरू असताना कोणत्याही पुलावरून जाणे टाळावे, असा इशाराही दिला आहे.
शिरवळवाडी तलावाचा सांडवा ओव्हरफ्लो
शिरवळवाडी ल.पा. तलावाचा सांडवा ओव्हरफ्लो झाला असून शिरवळ–वागदरी रस्ता पूर्णपणे बंद झाला आहे. स्थानिक ग्रामपंचायती, पोलीस पाटील व नागरिकांनी आपत्ती व्यवस्थापनाच्या दृष्टीने आवश्यक ती खबरदारी घ्यावी, असे आवाहन प्रशासनाकडून करण्यात आले आहे.
