Maharashtra Politics : महाराष्ट्राच्या राजकारणात पुन्हा एकदा मोठी घडामोड घडली आहे. उद्धव ठाकरे यांचे निकटवर्तीय आणि विधान परिषदेचे आमदार सचिन अहिर यांनी ठाकरे गटाला रामराम केला आहे.
Maharashtra Politics : महाराष्ट्राच्या राजकीय वर्तुळात आज पुन्हा एकदा मोठी उलथापालथ झाली आहे. उद्धव ठाकरे यांच्या शिवसेनेला आणखी एक मोठा धक्का बसला आहे. उद्धव ठाकरेंचे विश्वासू सहकारी आणि विधान परिषदेचे आमदार सचिन अहिर यांनी मुख्यमंत्री एकनाथ शिंदे यांच्या शिवसेनेत प्रवेश केला आहे. पक्षप्रवेशानंतर त्यांची विधान परिषदेच्या उपसभापतीपदी नियुक्ती करण्यात आली. गेल्या काही दिवसांत ठाकरे गटातील नेत्यांच्या गळतीनंतर ही आणखी एक महत्त्वाची राजकीय घडामोड मानली जात आहे.
सचिन अहिरांचा शिंदे सेनेत प्रवेश
विधान परिषदेचे आमदार सचिन अहिर यांनी अधिकृतपणे एकनाथ शिंदे यांच्या नेतृत्वाखालील शिवसेनेत प्रवेश केला. त्यानंतर सचिन अहिरांना विधान परिषदेच्या उपसभापतीपदाची जबाबदारी देण्यात आली. अहिरांच्या प्रवेशावेळी मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार उपस्थितीत होत्या. त्यामुळे या पक्षांतराला विशेष राजकीय महत्त्व प्राप्त झाले आहे.
आदित्य ठाकरेंचे विश्वासू सहकारी म्हणून ओळख
सचिन अहिर हे वरळी मतदारसंघातील आमदार आदित्य ठाकरे यांचे निकटवर्तीय म्हणून ओळखले जात होते. अनेक सार्वजनिक कार्यक्रमांमध्ये ते आदित्य ठाकरे यांच्यासोबत कायम दिसत असत. ठाकरे कुटुंबाशी जवळीक आणि पक्षातील सक्रिय भूमिका यामुळे त्यांना उद्धव ठाकरे यांचे विश्वासू नेते मानले जात होते. मात्र सध्याच्या राजकीय घडामोडींमध्ये त्यांनी ठाकरे गटाची साथ सोडत शिंदे सेनेची वाट धरली आहे.
Related Articles
राष्ट्रवादीतून शिवसेना आणि आता शिंदे सेनेत
सचिन अहिर यांची राजकीय कारकीर्द राष्ट्रवादी काँग्रेसमधून सुरू झाली. शरद पवार यांच्या मार्गदर्शनाखाली त्यांनी राजकारणात स्वतःची ओळख निर्माण केली. राष्ट्रवादी काँग्रेसने त्यांना मंत्रिपद, मुंबई अध्यक्षपदासह अनेक महत्त्वाच्या जबाबदाऱ्या दिल्या. 2019 च्या विधानसभा निवडणुकीपूर्वी त्यांनी शिवसेनेत प्रवेश केला. आदित्य ठाकरे यांच्या विजयात त्यांनी सक्रिय भूमिका बजावली होती. त्यानंतर त्यांना विधान परिषदेवर पाठवण्यात आले होते.
गिरणगावातील कामगार चळवळीतून राजकारणात प्रवेश
दक्षिण मुंबईतील गिरणगाव परिसरातून सचिन अहिर यांचा राजकीय प्रवास सुरू झाला. कामगार संघटनांमधून सक्रिय काम करत त्यांनी आपली वेगळी ओळख निर्माण केली. कामगारांच्या प्रश्नांवर सातत्याने आवाज उठवत त्यांनी राजकारणात प्रवेश केला आणि नंतर राज्याच्या राजकारणात प्रभावी नेतृत्व म्हणून उदयास आले.
ठाकरे गटासाठी वाढती अस्वस्थता?
गेल्या काही दिवसांत ठाकरे गटातील नेत्यांच्या पक्षांतराच्या चर्चांना वेग आला होता. खासदारांनंतर आता आमदार स्तरावरील महत्त्वाच्या नेत्यानेही पक्ष सोडल्याने ठाकरे गटातील अंतर्गत अस्वस्थता पुन्हा एकदा चर्चेत आली आहे. सचिन अहिर यांच्या निर्णयामुळे आगामी काळात आणखी काही राजकीय घडामोडी घडण्याची शक्यता व्यक्त केली जात आहे.
