आमिर खानच्या लग्नानंतर बजरंग दलाने 'लव्ह जिहाद'चा आरोप करत त्याचा पुतळा जाळला आहे. आमिर खान हिंदू महिलांशी लग्न करून मुलांना मुस्लिम नावं देतो आणि हिंदू धर्माचा अपमान करतो, असा आरोप संघटनेने केला आहे.
मुंबई : बॉलिवूड अभिनेता आमिर खानच्या लग्नानंतर बजरंग दलाच्या कार्यकर्त्यांनी त्याच्याविरोधात जोरदार आंदोलन केलं आहे. आमिर खानवर 'लव्ह जिहाद'चा आरोप करत संघटनेने त्याचा पुतळा जाळला. यावेळी आंदोलकांनी 'आमिर खान मुर्दाबाद' आणि 'आमिर खान जिहादी, भारत सोडा' अशा घोषणा दिल्या.
बजरंग दलाचे नेते मनोज सोनी यांनी आरोप केला की, आमिर खान सातत्याने हिंदू महिलांशी लग्न करून हिंदू धर्माचा अपमान करत आहे. ते म्हणाले, "आमिर खान उघडपणे हिंदूंना आव्हान देत आहे. त्याच्यावर कारवाई करण्यासाठी इथे कायदा-सुव्यवस्था आहे की नाही?"
संघटनेचा आणखी एक आरोप असा आहे की, आमिर खान हिंदू महिलांशी लग्न करूनही आपल्या मुलांना मुस्लिम नावं देतो. जर आमिरने अशा गोष्टी थांबवल्या नाहीत, तर त्याला धडा शिकवला जाईल, अशी धमकीही बजरंग दलाने दिली आहे. कार्यकर्त्यांनी सवाल केला, "हिंदू महिलांशी लग्न करून मुलांची नावं तैमूर, अफरोज, सलमान ठेवणं हा कुठला कायदा आहे? त्याला मुस्लिम महिलांशी प्रेम का होत नाही? तो फक्त हिंदू महिलांच्याच प्रेमात का पडतो?"
Related Articles
मनोज सोनी यांनी पुढे सांगितलं की, हा अभिनेता देशातील शांततेचं वातावरण बिघडवण्याचा प्रयत्न करत आहे आणि जणू काही त्याला कोणताही कायदा लागू होत नाही, अशा पद्धतीने वागत आहे.
हे संपूर्ण आंदोलन आमिर खानने गौरी स्प्रॅटसोबत लग्न केल्यानंतर झालं आहे. मात्र, काही रिपोर्ट्सनुसार, तमिळ-आयरिश वंशाची गौरी स्प्रॅट ही ख्रिश्चन धर्माची आहे. याआधी आमिर खानची पहिली पत्नी रीना दत्ता आणि दुसरी पत्नी किरण राव होती.
