अफगाणिस्तानच्या सरकारी टीव्हीवर एका तालिबानी कमांडरने पाकिस्तानला थेट धमकी दिली आहे. तुमच्याकडे अणुबॉम्ब आणि मिसाइल असतील, तर आमच्याकडे आत्मघाती बॉम्बर्सची फौज आहे, असं म्हणत त्याने खळबळ उडवून दिली आहे.
एका तालिबानी कमांडरने अफगाणिस्तानच्या सरकारी टीव्ही चॅनलवर थेट प्रक्षेपण सुरू असताना पाकिस्तानला एक गंभीर धमकी दिली. पाकिस्तानला त्यांच्या बॅलेस्टिक मिसाइल आणि अणुबॉम्बचा अभिमान असेल, तर आमच्याकडे त्यांना तोंड देण्यासाठी 'आत्मघाती बॉम्बर्सची बटालियन' तयार आहे, असं तो म्हणाला. त्याच्या या वक्तव्यामुळे काबूल आणि इस्लामाबादमधील आधीच नाजूक असलेले संबंध आणखी ताणले गेले आहेत.
या टीव्हीवरील भाषणात कमांडरने दावा केला की, त्यांच्याकडे आत्मघाती बॉम्बर्सची एक खास फौज आहे, जी 'संपूर्ण गैर-मुस्लिम जगाचा' सामना करू शकते. त्याने पुढे असंही म्हटलं की, पाकिस्तानात कार्यरत असलेल्या दहशतवादी संघटनांशी संबंधित लोक हल्ले करण्यास सक्षम आहेत. यामध्ये त्याने बलुचिस्तान लिबरेशन आर्मी (BLA) आणि तहरीक-ए-तालिबान पाकिस्तान (TTP) या संघटनांची नावं घेतली.
Related Articles
अणुबॉम्ब असलेल्या पाकिस्तानने अनेकदा TTP वर अफगाण भूमीवरून सीमापार हल्ले केल्याचा आरोप केला आहे. तर दुसरीकडे, तालिबान सरकारने पाकिस्तानविरोधी दहशतवाद्यांना आश्रय देत असल्याचे आरोप वारंवार फेटाळले आहेत.
पाकिस्तानचा काबूलवर बॉम्बहल्ला, अफगाणिस्तानच्या तालिबान सरकारसोबत 'खुल्लमखुल्ला युद्ध'
शुक्रवारी पाकिस्तानने अफगाणिस्तानची राजधानी काबूलसह प्रमुख शहरांवर बॉम्बहल्ले केले. यानंतर पाकिस्तानच्या संरक्षण मंत्र्यांनी दोन्ही शेजारी देशांमध्ये 'खुल्लमखुल्ला युद्ध' सुरू झाल्याचं जाहीर केलं.
इस्लामाबादने केलेल्या हवाई हल्ल्यांच्या विरोधात गुरुवारी रात्री अफगाण सैन्याने पाकिस्तानी सीमा सैनिकांवर हल्ला केला होता. त्यानंतर पाकिस्तानने ही नवी कारवाई केली.
गेल्या काही महिन्यांपासून दोन्ही देशांमधील संबंध खूपच बिघडले आहेत. ऑक्टोबरमध्ये झालेल्या रक्तरंजित संघर्षानंतर जमिनीवरील सीमामार्ग मोठ्या प्रमाणात बंद आहेत. या संघर्षात दोन्ही बाजूंचे मिळून ७० हून अधिक लोक मारले गेले होते.
इस्लामाबादचा आरोप आहे की, अफगाणिस्तान पाकिस्तानात हल्ले करणाऱ्या दहशतवादी गटांवर कारवाई करत नाही. तर तालिबान सरकारने हे आरोप फेटाळून लावले आहेत.
