White House Shooting : अमेरिकेच्या व्हाइट हाऊसजवळ गोळीबार करणाऱ्या २१ वर्षीय तरुणाची ओळख पटली आहे. नासिर बेस्ट असं त्याचं नाव असून तो मानसिक आजाराने त्रस्त होता. सीक्रेट सर्व्हिसच्या अधिकाऱ्यांनी प्रत्युत्तरादाखल केलेल्या गोळीबारात त्याचा मृत्यू झाला. याआधीही तो अनेकदा सुरक्षा यंत्रणांच्या रडारवर आला होता.
White House Shooting : अमेरिकेची राजधानी वॉशिंग्टन डीसीमध्ये शनिवारी संध्याकाळी एक धक्कादायक घटना घडली. व्हाइट हाऊसच्या सुरक्षा चौकीजवळ एका तरुणाने अंदाधुंद गोळीबार सुरू केला. या हल्लेखोराची ओळख पटली असून, तो मेरीलँडचा रहिवासी असलेला २१ वर्षीय नासिर बेस्ट होता. अनेक मीडिया रिपोर्ट्सनुसार, नासिर मानसिक आजाराने त्रस्त होता आणि याआधीही तो अमेरिकेच्या सीक्रेट सर्व्हिसच्या नजरेत आला होता.
सीक्रेट सर्व्हिसने दिलेल्या माहितीनुसार, ही घटना स्थानिक वेळेनुसार संध्याकाळी ६ वाजताच्या सुमारास घडली. नासिर एका बॅकपॅकमधून बंदूक काढून सुरक्षा चौकीवर तैनात असलेल्या एजंट्सवर गोळीबार करू लागला. अधिकाऱ्यांनीही लगेच प्रत्युत्तरादाखल गोळीबार केला. यामध्ये नासिर गंभीर जखमी झाला आणि नंतर हॉस्पिटलमध्ये त्याचा मृत्यू झाला. या गोळीबारात एक सामान्य नागरिकही जखमी झाल्याची माहिती आहे.
ज्यावेळी ही घटना घडली, त्यावेळी अमेरिकेचे राष्ट्राध्यक्ष डोनाल्ड ट्रम्प व्हाइट हाऊसमध्येच होते, पण ते पूर्णपणे सुरक्षित होते. अमेरिकन मीडियाच्या वृत्तानुसार, नासिर बेस्ट सुरक्षा यंत्रणांसाठी नवीन नव्हता. याआधीही अनेकदा त्याचा सुरक्षा अधिकाऱ्यांशी सामना झाला होता.
Related Articles
फॉक्स न्यूजच्या वृत्तानुसार, २५ जून २०२५ रोजी नासिरला सीक्रेट सर्व्हिसच्या एजंट्सना धमकी दिल्याप्रकरणी अटक करण्यात आली होती. त्यानंतर १० जुलै २०२५ रोजी त्याला पुन्हा एकदा प्रतिबंधित क्षेत्रात घुसल्याबद्दल अटक झाली होती. न्यूयॉर्क पोस्टने दिलेल्या वृत्तानुसार, तो मानसिक रुग्ण मानला जात होता आणि तो स्वतःला 'येशू ख्रिस्त' (Jesus Christ) म्हणवून घेत होता.
असोसिएटेड प्रेसच्या माहितीनुसार, ही घटना व्हाइट हाऊसपासून एका ब्लॉकवर, १७ वी स्ट्रीट आणि पेनसिल्व्हेनिया अव्हेन्यूजवळ घडली. गोळीबाराचे अनेक आवाज ऐकल्यानंतर, व्हाइट हाऊसमधील पत्रकारांना तातडीने प्रेस ब्रीफिंग रूममध्ये आश्रय घेण्यास सांगण्यात आले. नंतर सीक्रेट सर्व्हिसने एक निवेदन जारी करून सांगितले की, संशयिताने चौकीजवळ येऊन बॅगेतून बंदूक काढली आणि अधिकाऱ्यांवर गोळीबार सुरू केला, ज्याला अधिकाऱ्यांनी चोख प्रत्युत्तर दिले.
घटनेनंतरचे जे फोटो समोर आले आहेत, त्यात घटनास्थळी मोठा पोलीस बंदोबस्त दिसत आहे. पिवळ्या रंगाची क्राईम-सीन टेप, पुराव्यांसाठी केलेले मार्किंग आणि रस्त्यावर विखुरलेले आपत्कालीन वैद्यकीय साहित्य यावरून घटनेची तीव्रता लक्षात येते.
