- Home
- Utility News
- घर खरेदी प्लॅन करताय? पत्नीच्या नावे मालमत्ता घेण्याचे 'हे' ५ जबरदस्त फायदे, वाचून तुम्हीही थक्क व्हाल!
घर खरेदी प्लॅन करताय? पत्नीच्या नावे मालमत्ता घेण्याचे 'हे' ५ जबरदस्त फायदे, वाचून तुम्हीही थक्क व्हाल!
Property Registration In Wife's Name Benefits : स्वतःचे घर खरेदी करताना ते पत्नीच्या नावावर करणे हा एक स्मार्ट आर्थिक निर्णय आहे. यामुळे मुद्रांक शुल्क, गृहकर्जाचे व्याजदर आणि मालमत्ता करात मोठी सवलत मिळते, ज्यामुळे लाखो रुपयांची बचत होते.
घर खरेदी प्लॅन करताय? पत्नीच्या नावे मालमत्ता घेण्याचे 'हे' ५ जबरदस्त फायदे
मुंबई : स्वतःचे हक्काचे घर असणे हे प्रत्येकाचे स्वप्न असते. पण हे घर घेताना ते कोणाच्या नावावर असावे, या एका निर्णयावर तुमचे लाखो रुपये वाचू शकतात. पूर्वी केवळ भावनिक कारणास्तव पत्नीच्या नावे घर घेतले जायचे, पण आजच्या काळात हा एक स्मार्ट आर्थिक निर्णय ठरत आहे. महिलांच्या नावे प्रॉपर्टी नोंदणी केल्यास सरकार आणि बँकांकडून नेमक्या कोणत्या सवलती मिळतात? पाहा सविस्तर…
१. मुद्रांक शुल्कात (Stamp Duty) मोठी बचत
महिला सक्षमीकरणाला चालना देण्यासाठी अनेक राज्य सरकारे महिलांना मुद्रांक शुल्कात १% ते २% पर्यंत सवलत देतात. घराच्या किमतीचा विचार करता ही रक्कम लाखांच्या घरात असू शकते. उदाहरणार्थ, दिल्लीसारख्या शहरात पुरुषांसाठी ६% शुल्क असताना महिलांसाठी ते केवळ ४% आहे.
२. गृहकर्जाच्या व्याजदरात सवलत
बहुतेक बँका आणि गृहनिर्माण संस्था (HFCs) महिला कर्जदारांसाठी विशेष व्याजदर ऑफर करतात. पुरुषांच्या तुलनेत महिलांना ०.०५% ते ०.१% पर्यंत कमी व्याजदर मिळू शकतो. वरवर पाहता ही सवलत छोटी वाटली तरी २०-२५ वर्षांच्या दीर्घकालीन कर्जामध्ये यामुळे तुमच्या EMI चा मोठा भार हलका होतो.
३. मालमत्ता करात (Property Tax) सूट
काही मोठ्या शहरांमधील महानगरपालिका महिलांच्या मालकीच्या घरांवर मालमत्ता करात सवलत देतात. जर मालमत्ता पूर्णपणे महिलेच्या नावे असेल, तर दरवर्षी भरल्या जाणाऱ्या टॅक्समध्ये तुम्हाला ५% ते १०% पर्यंत सूट मिळू शकते, ज्यामुळे दीर्घकाळात तुमची मोठी बचत होते.
४. कर नियोजनासाठी उत्तम पर्याय
जर पतीच्या नावावर आधीच अनेक मालमत्ता असतील, तर उत्पन्नाचे विभाजन करण्यासाठी पत्नीच्या नावे घर घेणे फायदेशीर ठरते. यामुळे 'वेल्थ टॅक्स'चा बोजा कमी होतो. मात्र, हे लक्षात ठेवा की जर पत्नीचे स्वतःचे उत्पन्न नसेल, तर त्या घरापासून मिळणारे भाडे पतीच्याच उत्पन्नात धरले जाते (Clubbing of Income).
५. महिलांची आर्थिक सुरक्षा आणि आत्मविश्वास
मालमत्तेवर कायदेशीर मालकी हक्क असल्याने महिलांना समाजात आणि कुटुंबात एक वेगळा आत्मविश्वास मिळतो. कठीण काळात ही मालमत्ता त्यांच्यासाठी मोठी आर्थिक सुरक्षा कवच म्हणून काम करते. यामुळे कुटुंबाचा आर्थिक पाया अधिक भक्कम होतो.
घर खरेदी करताना केवळ भावनिक विचार न करता तांत्रिक आणि आर्थिक बाबींचा विचार केल्यास 'पत्नीच्या नावे घर' हा पर्याय सर्वात फायदेशीर ठरतो. यामुळे सुरुवातीच्या नोंदणी खर्चापासून ते कर्जफेडीपर्यंत प्रत्येक टप्प्यावर पैशांची बचत होते.
