सणासुदीच्या पार्श्वभूमीवर NPCI ने युपीआय मर्चंट ट्रान्झॅक्शनवरील MDR शुल्क लागू करण्याचा निर्णय पुढे ढकलला आहे. हे शुल्क कधी लागू होणार आणि याचे नियम काय आहेत, याची सविस्तर माहिती खालीलप्रमाणे आहे.
मुंबई : यूपीआयने पेमेंट करणाऱ्या युजर्स आणि व्यापाऱ्यांसाठी एक मोठी अपडेट आली आहे. नॅशनल पेमेंट्स कॉर्पोरेशन ऑफ इंडियाच्या (NPCI) यूपीआय आणि सर्व्हिसेस स्टिअरिंग कमिटीने निवडक मर्चंट ट्रान्झॅक्शनवर मर्चंट डिस्काउंट रेट (MDR) लागू करण्याचा निर्णय सध्या पुढे ढकलला आहे. मग हे नियम कधी लागू होणार?
NPCI चं म्हणणं काय?
NPCI च्या माहितीनुसार, MDR लागू करण्याची नवीन तारीख लवकरच जाहीर केली जाईल. सणासुदीचा काळ लक्षात घेऊन हा निर्णय घेण्यात आला आहे. MDR अंतर्गत फक्त निवडक मर्चंट ट्रान्झॅक्शनवर व्यापाऱ्यांना शुल्क आकारले जाईल. पण, सर्वसामान्यांच्या यूपीआय पेमेंटवर याचा कोणताही परिणाम होणार नाही, हे NPCI ने स्पष्ट केलं आहे.
यूपीआयवर MDR शुल्क कधी लागू होणार?
हा नियम आधी १५ ऑक्टोबरपासून लागू होणार होता. NPCI ने यूपीआय ट्रान्झॅक्शनवरील मर्चंट डिस्काउंट रेटसाठी (MDR) नवीन फ्रेमवर्क जारी केलं आहे. या फ्रेमवर्कनुसार, शेअर बाजार आणि गुंतवणुकीशी संबंधित काही ट्रान्झॅक्शनवर शुल्क आकारले जाईल. या ट्रान्झॅक्शनवर ०.०२% MDR आकारला जाईल. उदाहरणार्थ, १ लाखाच्या ट्रान्झॅक्शनवर २०० आणि १० लाखाच्या ट्रान्झॅक्शनवर २०० शुल्क आकारले जाईल. १५ लाख किंवा त्याहून अधिक रकमेच्या ट्रान्झॅक्शनसाठी जास्तीत जास्त ३०० शुल्क निश्चित करण्यात आले आहे.
Related Articles
नवीन शुल्क कोणत्या प्लॅटफॉर्मवर लागू होईल?
नवीन MDR अंतर्गत, म्युच्युअल फंड, स्टॉक ब्रोकर्स, सिक्युरिटीज डीलर्स आणि गुंतवणुकीशी संबंधित प्लॅटफॉर्मवर केलेल्या निवडक यूपीआय ट्रान्झॅक्शनवर शुल्क लागू होऊ शकते. याचा अर्थ असा की, जर एखाद्या व्यक्तीने यूपीआय वापरून शेअर्स खरेदी केले, म्युच्युअल फंडात गुंतवणूक केली किंवा ब्रोकरद्वारे ट्रान्झॅक्शन केले, तर त्यांना MDR शुल्क लागू होईल. ट्रान्झॅक्शनची रक्कम आणि संबंधित नियमांच्या आधारे हे शुल्क ठरवले जाईल.
छोट्या यूपीआय ट्रान्झॅक्शनचं काय?
२,००० रुपयांपर्यंतच्या यूपीआय ट्रान्झॅक्शनला MDR मधून सूट देण्यात आली आहे. याशिवाय, एका व्यक्तीकडून दुसऱ्या व्यक्तीला (P2P) केलेल्या ट्रान्झॅक्शनवर कोणतेही शुल्क लागणार नाही. रोजच्या खरेदीशी संबंधित बहुतांश युपीआय पेमेंट्सनाही या शुल्कातून सूट देण्यात आली आहे. पण, सर्वच मर्चंट पेमेंट्स पूर्णपणे शुल्कमुक्त नसतील. NPCI च्या नवीन नियमांनुसार, २,००० पेक्षा जास्त रकमेच्या निवडक यूपीआय मर्चंट ट्रान्झॅक्शनवर ०.४% MDR लागू होईल. यामध्ये व्यक्तीकडून व्यापाऱ्याला (P2M) केलेल्या ट्रान्झॅक्शनचा समावेश आहे. नियमांनुसार व्यापाऱ्यांना हे शुल्क भरावे लागू शकते.
रेल्वे, टेलिकॉम आणि इंधन क्षेत्रासाठी वेगळे दर!
रेल्वे, टेलिकॉम, विमा आणि इंधन यांसारख्या काही क्षेत्रांसाठी वेगळे दर जाहीर करण्यात आले आहेत, असं NPCI ने सांगितलं आहे. या क्षेत्रांमधील निवडक ट्रान्झॅक्शनवर ₹५ चा निश्चित MDR लागू होऊ शकतो. यामध्ये तिकीट बुकिंग, मोबाईल रिचार्ज, विम्याचा हप्ता आणि पेट्रोल-डिझेलचे पेमेंट यांसारख्या सेवांचा समावेश असू शकतो.
