TCS Jobs : टीसीएसमध्ये नोकरी हवीये? फक्त ChatGPT येऊन चालणार नाही, 'हे' स्किल्स लागतीलच

टीसीएस आता एआय (AI) स्किल्स असलेल्या फ्रेशर्सनाच नोकरीत प्राधान्य देणार आहे. तुम्हाला फक्त चॅटजीपीटी (ChatGPT) वापरता येत असेल तर ते पुरेसे नाही, नव्या टेक्नॉलॉजीचं ज्ञान असणं मस्ट आहे.

Image Credit : Chatgpt

फ्रेशर्ससाठी भारी बातमी! टीसीएसमध्ये ८० टक्के नोकऱ्या त्यांच्यासाठीच

आयटी क्षेत्रात करिअर करू पाहणाऱ्या तरुणांसाठी टाटा कन्सल्टन्सी सर्व्हिसेसने (TCS) एक महत्त्वाची अपडेट दिली आहे. टीसीएसने आपली भरती प्रक्रिया आता वेगाने बदलली आहे. येत्या काळात कंपनीत भरती होणाऱ्या नव्या कर्मचाऱ्यांपैकी जवळपास ८० टक्के लोक हे डिजिटल आणि एआय (AI) स्किल्स असलेलेच असतील, असं कंपनीने स्पष्ट केलंय.

सध्या आयटी सेक्टरमध्ये एआयचं महत्त्व खूप वाढलंय. जुलै ते सप्टेंबर या तिमाहीत टीसीएसने एकूण ४,५०० नव्या कर्मचाऱ्यांची भरती केली. यापैकी २५ ते ३० टक्के लोकांकडे खास एआय स्किल्स होती, तर ८० टक्के लोकांकडे नव्या जनरेशनच्या टेक्नॉलॉजीचं ज्ञान होतं, अशी माहिती टीसीएसच्या चीफ ऑपरेटिंग ऑफिसर हारती सुब्रमण्यन यांनी पीटीआयला दिली. भविष्यातही अशीच भरती सुरू राहील आणि मार्केटमध्ये टॅलेंटेड उमेदवार उपलब्ध आहेत, असंही त्या म्हणाल्या.

Image Credit : Getty

कोणाला जास्त फायदा? फ्रेशर्स की अनुभवी कर्मचारी?

एआय टेक्नॉलॉजीचा वेग वाढल्यामुळे आता अनुभवी कर्मचाऱ्यांपेक्षा फ्रेशर्सना जास्त संधी मिळतील का, अशी चर्चा सुरू आहे. तरुण पिढी एआय टूल्स खूप लवकर शिकते आणि कंपन्यांनाही त्यांना कामावर ठेवणं आर्थिकदृष्ट्या परवडतं.

यावर टीसीएसचे चीफ एक्झिक्युटिव्ह ऑफिसर (CEO) आणि मॅनेजिंग डायरेक्टर के. कृतीवासन यांनी एक महत्त्वाची प्रतिक्रिया दिली आहे. "एखादी व्यक्ती नवीन गोष्टी शिकायला आणि बदलत्या परिस्थितीशी जुळवून घ्यायला किती तयार आहे, यावरच सगळा फायदा अवलंबून असतो," असं ते म्हणाले. एखादा सीनियर किंवा मिडल लेव्हल इंजिनिअर जर नवीन टेक्नॉलॉजी शिकायला तयार असेल, तर तो त्यांच्यासाठी खूप मोठा प्लस पॉईंट ठरतो, असंही त्यांनी स्पष्ट केलं.

Image Credit : stockPhoto

एआय बिझनेसमुळे टीसीएसचा नफा वाढणार

टीसीएसने आता आपला एआय बिझनेस मोठ्या प्रमाणावर वाढवण्याचं टार्गेट ठेवलं आहे. या विस्तारामुळे कंपनीचा नफा आणखी वाढेल, असा अंदाज आहे. सप्टेंबरच्या तिमाहीत टीसीएसच्या एकूण उत्पन्नात एआय विभागाचा वाटा तब्बल १० टक्क्यांवर पोहोचला आहे.

येत्या काळात एआय डील्सची संख्या जशी वाढेल, तसा कंपनीच्या नफ्याचा टक्काही वाढेल, असा विश्वास सीईओ कृतीवासन यांनी व्यक्त केला. ग्राहक सुरुवातीला एखाद्या छोट्या बिझनेस युनिटमध्ये एआय प्रोजेक्ट्स सुरू करतात आणि तिथे चांगले रिझल्ट्स दिसले की इतर विभागांमध्येही त्याचा विस्तार करतात, असं हारती सुब्रमण्यन यांनी सांगितलं. सप्टेंबर तिमाहीत टीसीएसला ९.६ अब्ज डॉलर्सचे कॉन्ट्रॅक्ट्स मिळाले. यात एआयचा नेमका वाटा किती हे स्पष्ट नसलं तरी, सध्या आपण करत असलेल्या जवळपास प्रत्येक कामात एआयचा काही ना काही भाग असतोच, असं कृतीवासन यांनी नमूद केलं.

Image Credit : Getty

फक्त एआय शिकून नोकरी मिळेल का?

एआय टूल्स वापरता येणं आणि खऱ्या अर्थाने एआय स्किल्स डेव्हलप करणं, या दोन्ही पूर्णपणे वेगळ्या गोष्टी आहेत, असं तज्ज्ञांचं म्हणणं आहे. भारतातील ९० टक्क्यांहून अधिक आयटी कर्मचारी सध्या कोणतं ना कोणतं एआय टूल वापरत आहेत. पण यामुळे कंपनीला पूर्ण क्षमतेने एआयचा फायदा मिळत नाही.

कोणतेही स्टँडर्ड्स न पाळता, कंपनीच्या गरजा न ओळखता आणि क्वालिटी चेक न करता फक्त टूल्स वापरून काहीही उपयोग होत नाही. एआयचा वापर वाढला म्हणजे टॅलेंट वाढलं, असं होत नाही. कर्मचाऱ्यांना स्वतःहून एआय शिकायला सांगून फारसा फायदा होणार नाही. त्याऐवजी कंपन्यांनी आपल्याला नेमके कोणते स्किल्स हवे आहेत, हे ओळखून कर्मचाऱ्यांना स्पष्ट मार्गदर्शन करायला हवं, असा सल्ला तज्ज्ञांनी दिला आहे.

Image Credit : Getty

आयटी कर्मचाऱ्यांनो, आताच अलर्ट व्हा!

सध्याच्या आयटी क्षेत्रात टिकून राहायचं असेल, तर फक्त चॅटजीपीटी (ChatGPT) किंवा एखादं एआय टूल कसं वापरायचं, एवढंच माहिती असून चालणार नाही. त्या टेक्नॉलॉजीचा वापर करून तुम्ही खऱ्या आयुष्यातील प्रॉब्लेम्स कसे सोडवता, हे सर्वात महत्त्वाचं आहे.

कंपनीचा बिझनेस समजून घेणं, प्रोजेक्ट्समध्ये खात्रीशीर रिझल्ट्स देणं आणि टेक्नॉलॉजीचा योग्य पद्धतीने वापर करणं, या गोष्टी येत्या काळात प्रत्येक कर्मचाऱ्यासाठी अत्यंत महत्त्वाच्या ठरणार आहेत. टेक्नॉलॉजी कितीही बदलली तरी, ज्यांना बिझनेस प्रोसेस समजते आणि जे दर्जेदार आउटपुट देतात, त्यांना आयटी क्षेत्रात कधीच मरण नाही, हे या घडामोडींवरून स्पष्ट होतंय.