गुगल पेने सणासुदीच्या निमित्ताने ग्राहकांना एक खास भेट दिली आहे. कंपनी आता अतिरिक्त रिवॉर्ड्ससोबतच अनेक नवीन सुविधा देत आहे. याचा फायदा नेमका कोणाला आणि कसा होणार, हे आपण जाणून घेऊया.
मुंबई : सणासुदीचा काळ सुरू झाला आहे. या निमित्ताने बँका आणि डिजिटल पेमेंट कंपन्या ग्राहकांसाठी नवनवीन ऑफर्स आणत आहेत. आता गुगल पेने (Google Pay) त्यांच्या फ्लेक्स (Flex) क्रेडिट कार्ड रिवॉर्ड प्रोग्राममध्ये एक मोठा बदल जाहीर केला आहे.
ॲक्सिस बँक (Axis Bank) आणि एसबीआय कार्ड (SBI Card) यांच्या भागीदारीत सुरू करण्यात आलेल्या फ्लेक्स क्रेडिट कार्डच्या रिवॉर्ड सिस्टीममध्ये हे बदल करण्यात आले आहेत. हे नवीन फायदे १६ ऑक्टोबर २०२६ पासून लागू होतील. यामुळे यूपीआय (UPI) पेमेंट करणाऱ्यांना आणि रोजच्या खर्चासाठी क्रेडिट कार्ड वापरणाऱ्यांना अतिरिक्त रिवॉर्ड्स मिळणार आहेत.
UPI पेमेंटवर मिळणार जास्त रिवॉर्ड्स
फ्लेक्स क्रेडिट कार्ड असलेल्या गुगल वन (Google One) सदस्यांनी एका रिवॉर्ड सायकलमध्ये १५,००० रुपयांपेक्षा जास्त खर्च केल्यास त्यांना अतिरिक्त फायदे मिळू शकतात. गुगल वन सदस्य असलेल्या कार्डधारकांना पात्र खर्चावर ३.२ टक्क्यांपर्यंत रिवॉर्ड मिळेल. जे गुगल वनचे सदस्य नाहीत, त्यांना हीच खर्चाची मर्यादा ओलांडल्यानंतर पात्र व्यवहारांवर १.६ टक्के रिवॉर्ड मिळेल. हे रिवॉर्ड्स 'स्टार'च्या स्वरूपात दिले जातील. एका स्टारची किंमत १ रुपया असेल.
Related Articles
जेवण आणि किराणा सामानाच्या खरेदीवर एक्स्ट्रा रिवॉर्ड
गुगल वन सदस्यांसाठी जेवण आणि किराणा सामानाच्या खरेदीवरही अतिरिक्त फायदे आहेत. प्रत्येक रिवॉर्ड सायकलमध्ये प्रमुख फूड आणि ग्रोसरी ॲप्सवर ५,००० रुपयांपर्यंतच्या पात्र खर्चावर ५ टक्के अतिरिक्त रिवॉर्ड मिळेल. याशिवाय, वीज बिल, ओटीटी (OTT) सबस्क्रिप्शन आणि मोबाईल रिचार्ज यांसारख्या सेवांसाठी ३,००० रुपयांपर्यंतच्या पात्र खर्चावर १५ टक्के अतिरिक्त रिवॉर्ड मिळेल. पण या फायद्यांसाठी असलेल्या अटी आणि नियम कार्डधारकांनी तपासून पाहणे महत्त्वाचे आहे.
रेफर केल्यावर किती मिळतील?
फ्लेक्स कार्ड वापरकर्त्यांसाठी आणखी एक आनंदाची बातमी आहे. तुम्ही तुमचे मित्र किंवा कुटुंबातील सदस्यांना या प्रोग्रामसाठी रेफर केल्यास तुम्हाला १,००० रुपये रिवॉर्ड मिळू शकते. यशस्वी रेफरल्सच्या संख्येवर कोणतीही मर्यादा नाही, असे अहवालात म्हटले आहे. पण यासाठी लागू असलेल्या अटी नक्की तपासा.
नवीन फ्लेक्स कार्ड घेणाऱ्या ग्राहकांसाठी वेलकम रिवॉर्डमध्येही वाढ करण्यात आली आहे. कार्ड मिळाल्यापासून पहिल्या ६० दिवसांत, निवडलेल्या कार्ड व्हेरियंटनुसार २,५०० रुपयांपर्यंतचे वेलकम फायदे मिळवता येतील.
