भारतीय SUV मार्केटमध्ये दबदबा निर्माण करण्यासाठी रेनॉ आपली नवीन 7 सीटर कार 'बिग्स्टर' 2027 मध्ये लॉन्च करणार आहे. टर्बो पेट्रोल आणि स्ट्रॉंग हायब्रिड इंजिनसह येणारी ही कार महिंद्रा XUV आणि ह्युंदाई अल्काझारला तगडी फाईट देईल. डस्टरपेक्षा मोठी साईझ आणि भन्नाट फीचर्स हे या गाडीचं मुख्य आकर्षण असणार आहे.
भारतीय SUV मार्केटमध्ये आता खरी रंगत येणार आहे, कारण रेनॉ आपली नवीन 7 सीटर कार घेऊन येत आहे. युरोपियन मार्केटमध्ये धुमाकूळ घालणारी डॅशियाची 'बिग्स्टर' SUV 2027 मध्ये रेनॉ ब्रँडखाली भारतात लॉन्च होऊ शकते. ही गाडी भारतात आल्यावर ह्युंदाई अल्काझार आणि महिंद्रा XUV 7XO सारख्या 3-रो SUV गाड्यांना तगडी टक्कर देईल.
डॅशिया बिग्स्टर 2026 च्या पॅरिस मोटर शोमध्ये पहिल्यांदा दाखवण्यात आली होती. सध्याच्या रेनॉ डस्टरपेक्षा ही गाडी साईझने मोठी असेल आणि कंपनीच्या लाईनअपमध्ये ती डस्टरच्या वरच्या सेगमेंटमध्ये असेल. ही कार टर्बो पेट्रोल आणि स्ट्रॉंग हायब्रिड इंजिन ऑप्शनसह भारतात येण्याची शक्यता आहे. मात्र, कंपनीने अद्याप याच्या लॉन्चची तारीख आणि किंमत अधिकृतपणे जाहीर केलेली नाही.
टर्बो पेट्रोल आणि स्ट्रॉंग हायब्रिड इंजिन
भारतात येणाऱ्या बिग्स्टरमध्ये 1.3 लिटर टर्बो पेट्रोल इंजिन आणि 1.8 लिटर स्ट्रॉंग हायब्रिड पॉवरट्रेन मिळू शकते. रेनॉ डस्टरच्या हायब्रिड मॉडेलमध्ये जे तंत्रज्ञान वापरलंय, तेच बिग्स्टरमध्येही दिलं जाण्याची शक्यता आहे. डस्टर हायब्रिडमध्ये 1.8 लिटर नॅचरली अस्पिरेटेड पेट्रोल इंजिनसोबत दोन इलेक्ट्रिक मोटर्स आणि 1.4 kWh ची बॅटरी दिली आहे. हे सगळं मिळून 160 HP पॉवर आणि 172 Nm टॉर्क जनरेट करतं. यात मल्टी-मोड ऑटोमॅटिक गिअरबॉक्सही मिळतो. या हायब्रिड सिस्टीमचा सर्वात मोठा फायदा म्हणजे याला बाहेरून चार्ज करण्याची गरज नाही. गाडी चालवतानाच बॅटरी आपोआप चार्ज होते. रेनॉच्या दाव्यानुसार, शहरातील ट्रॅफिकमध्ये डस्टर हायब्रिड 80% पर्यंत फक्त इलेक्ट्रिक मोडवर धावू शकते. हीच सिस्टीम बिग्स्टरमध्येही पाहायला मिळू शकते. पण गाडीची साईझ आणि वजन जास्त असल्यामुळे पॉवर आणि टॉर्कमध्ये थोडे बदल होऊ शकतात.
डस्टरपेक्षा मोठी साईझ; रफ अँड टफ डिझाईन
भारतात विकल्या जाणाऱ्या डस्टरपेक्षा डॅशिया बिग्स्टरची लांबी जवळपास 230 mm जास्त आहे. तसेच, याचा व्हीलबेसही 45 mm ने वाढवला आहे. ही वाढलेली लांबी प्रामुख्याने गाडीच्या मागच्या बाजूला देण्यात आली आहे.
युरोपियन मॉडेलमध्ये मजबूत फ्रंट स्किड प्लेट, रफ अँड टफ बंपर्स आणि LED डेटाईम रनिंग लाईट्स (DRLs) दिले आहेत. भारतात येणाऱ्या मॉडेलच्या डिझाईनमध्ये थोडे बदल पाहायला मिळू शकतात. भारतीय मार्केटसाठी बनवलेल्या डस्टरप्रमाणेच बिग्स्टरमध्येही वेगळी ग्रिल आणि बंपर्स दिले जाऊ शकतात. मागच्या टेल लॅम्प्सच्या डिझाईनमध्येही युरोपियन मॉडेलपेक्षा थोडा बदल असू शकतो.
7 सीटर केबिन आणि भन्नाट फीचर्स
भारतात येणारी बिग्स्टर 3 रांगांची असेल आणि यात 7 लोकांसाठी बसण्याची सोय असेल. केबिनची डिझाईन नवीन डस्टरसारखीच असू शकते. पण गाडी मोठी असल्यामुळे प्रवाशांना जास्त जागा आणि काही नवीन फीचर्स मिळतील. नवीन डस्टरमध्ये असलेली 10.1 इंचाची टचस्क्रीन इन्फोटेनमेंट सिस्टीम, 10.25 इंचाचा डिजिटल इन्स्ट्रुमेंट क्लस्टर, ड्युअल झोन क्लायमेट कंट्रोल आणि वायरलेस फोन चार्जिंग यांसारख्या सुविधा बिग्स्टरमध्येही मिळण्याची अपेक्षा आहे. भारतात येणाऱ्या मॉडेलमधील फायनल फीचर्स कंपनी नंतर जाहीर करेल.
महिंद्रा XUV 7XO ला देणार का टक्कर?
2027 मध्ये भारतात येणारी रेनॉ बिग्स्टर ही कंपनीची सर्वात प्रीमियम SUV ठरू शकते. 7 सीटरची सोय, हायब्रिड टेक्नॉलॉजी आणि मोठी साईझ हे या गाडीचे मुख्य आकर्षण असेल.
बिग्स्टरची थेट स्पर्धा महिंद्रा XUV 7XO, ह्युंदाई अल्काझार आणि MG हेक्टर यांसारख्या गाड्यांशी होईल. गाडीची किंमत, इंजिन ऑप्शन्स आणि फीचर्स जाहीर झाल्यानंतरच भारतीय मार्केटमध्ये ही गाडी किती चालेल याचा अंदाज येईल. सध्या तरी भारतात लॉन्चची तारीख, किंमत आणि इंजिनच्या फायनल डिटेल्सबद्दल कोणतीही अधिकृत घोषणा झालेली नाही. तरीही, हायब्रिड टेक्नॉलॉजी असलेल्या मोठ्या SUV गाड्यांची मागणी वाढत असल्यामुळे रेनॉ बिग्स्टरची एन्ट्री नक्कीच लक्षवेधी ठरेल.
