- Home
- Mumbai
- Mumbai MHADA Lottery 2026: मुंबईत हक्काचं घर हवंय? म्हाडाच्या २६४० घरांसाठी आजपासून अर्ज सुरू; नोंदणी करण्यापूर्वी 'या' कागदपत्रांची यादी तपासा!
Mumbai MHADA Lottery 2026: मुंबईत हक्काचं घर हवंय? म्हाडाच्या २६४० घरांसाठी आजपासून अर्ज सुरू; नोंदणी करण्यापूर्वी 'या' कागदपत्रांची यादी तपासा!
Mumbai MHADA Lottery 2026: म्हाडाच्या मुंबई मंडळाने मुंबईतील ९७ ठिकाणी २६४० सदनिकांसाठी ऑनलाइन अर्ज नोंदणी प्रक्रिया सुरू केली. ही संपूर्ण प्रक्रिया 'फेसलेस' असून, अर्जदार म्हाडाच्या अधिकृत वेबसाइट किंवा 'IHLMS 2.0' मोबाईल ॲपद्वारे अर्ज करू शकतात.
मुंबईत हक्काचं घर हवंय? म्हाडाच्या २६४० घरांसाठी आजपासून अर्ज सुरू
मुंबई: मुंबईत स्वतःच्या मालकीचं घर असावं, हे प्रत्येक सर्वसामान्याचे स्वप्न असते. हे स्वप्न पूर्ण करण्याची सुवर्णसंधी आता चालून आली आहे. म्हाडाच्या मुंबई मंडळाने २६४० सदनिकांसाठी अधिकृतपणे ऑनलाइन अर्ज नोंदणी प्रक्रियेचा 'गो-लाईव्ह' शुभारंभ केला आहे. म्हाडाचे उपाध्यक्ष संजीव जयस्वाल यांच्या हस्ते या पारदर्शक आणि अत्याधुनिक प्रणालीचे उद्घाटन करण्यात आले.
मुंबईत नेमकी घरं आहेत कुठे?
या लॉटरीमध्ये मुंबईतील तब्बल ९७ विविध ठिकाणच्या गृहनिर्माण प्रकल्पांचा समावेश आहे. यात प्रामुख्याने
पश्चिम उपनगरे: गोरेगाव (पहाडी, सिद्धार्थ नगर), बोरिवली (मागाठाणे, गोराई).
पूर्व उपनगरे: विक्रोळी (कन्नमवार नगर), चेंबूर, घाटकोपर (पंतनगर), पवई (तुंगा, कोपरी).
शहर भाग: दादर (लोकमान्य नगर), वडाळा (अँटॉप हिल), माझगाव आणि गिरगाव.
अर्ज कसा आणि कुठे करायचा?
म्हाडाची ही संपूर्ण प्रक्रिया आता 'फेसलेस' आणि 'मानवी हस्तक्षेपविरहीत' झाली आहे. तुम्हाला म्हाडा कार्यालयात जाण्याची अजिबात गरज नाही.
वेबसाइट: https://housing.mhada.gov.in
मोबाईल ॲप: 'IHLMS 2.0' (Play Store/App Store वर उपलब्ध).
वैशिष्ट्य: या प्रणालीमध्ये एकदा प्रोफाईल तयार केल्यावर ती कायमस्वरूपी राहील. तुमची पात्रता सोडतीपूर्वीच निश्चित केली जाईल.
अर्ज भरण्यासाठी आवश्यक कागदपत्रांची 'चेकलिस्ट'
अर्ज करण्यापूर्वी खालील कागदपत्रे स्कॅन करून तयार ठेवा.
आधार कार्ड (मोबाईल नंबरशी लिंक असलेले).
पॅन कार्ड.
अधिवास प्रमाणपत्र (Domicile Certificate): अर्जदाराचे महाराष्ट्रात सलग १५ वर्षे वास्तव्य असल्याचा पुरावा.
उत्पन्नाचा दाखला: १ एप्रिल २०२४ ते ३१ मार्च २०२५ या काळातील आयटी रिटर्न (ITR) किंवा तहसीलदारांचा दाखला.
ई-मेल आयडी आणि सक्रिय मोबाईल नंबर.
'जशा आहे तशा' स्थितीतील घरांबाबत महत्त्वाची अपडेट
काही सदनिका विकासकांकडून प्राप्त झाल्या असून त्या 'जशा आहेत तशा' (As is where is) विकल्या जाणार आहेत. मात्र, ताबा देण्यापूर्वी म्हाडा त्यांची आवश्यक डागडुजी आणि दुरुस्ती करून देईल. विशेष म्हणजे, घराचा ताबा देण्यापूर्वी थकीत मालमत्ता कर आणि सोसायटी मेंटेनन्सची सर्व देणी म्हाडा स्वतः भरेल, असे आश्वासन संजीव जयस्वाल यांनी दिले आहे.
नवी सुविधा
तुम्हाला घर घ्यायचे आहे त्या ठिकाणचे 'गूगल लोकेशन' आता ॲपवर उपलब्ध असेल. तसेच, प्रत्यक्ष सदनिका पाहण्यासाठी म्हाडा कर्मचाऱ्यांचे नंबरही लवकरच जाहीर केले जातील.
