मुंबईतील खार रोड स्टेशनजवळ एका पादचाऱ्याने विनाकारण वाद घातल्यावर रिक्षाचालकाने त्याला अस्खलित इंग्रजीत सुनावल्याचा व्हिडिओ व्हायरल होत आहे. सिग्नल हिरवा असतानाही पादचाऱ्याने ओरडल्याने रिक्षावाल्याने त्याला 'शट युअर माऊथ' म्हणत गप्प केलं.
मुंबईतल्या खार रोड स्टेशनजवळ रस्त्यावर झालेला एक वाद सध्या सोशल मीडियावर चांगलाच चर्चेत आहे. एका पादचाऱ्याने विनाकारण हुज्जत घातल्यानंतर एका वयस्कर रिक्षा चालकाने त्याला अस्खलित इंग्रजीत सडेतोड उत्तर दिलं. ट्रॅफिकमध्ये झालेल्या या वादाचा व्हिडिओ सध्या इंटरनेटवर तुफान व्हायरल होत आहे.
रस्ता ओलांडणाऱ्या एका पादचाऱ्यासोबत या वयस्कर रिक्षावाल्याचा अचानक वाद सुरू झाला. पण हा वाद वाढवण्याऐवजी रिक्षावाल्याने तिथेच थांबून त्याला इंग्रजीतून असं काही सुनावलं की तिथे उभे असलेले लोक आणि सोशल मीडिया युजर्सही अवाक् झाले. त्यानंतर तो रिक्षावाला तिथून निघून गेला.
वादाची ठिणगी नेमकी कशी पडली?
खार रोड स्टेशनजवळ जेव्हा हा वाद झाला, तेव्हा सिग्नल हिरवा होता. प्रत्यक्षदर्शींच्या सांगण्यानुसार, गाड्यांना जाण्यासाठी सिग्नल ग्रीन झाला होता. पण सिग्नलकडे लक्ष न देताच तो पादचारी अचानक रस्त्यावर आला.
वयस्कर रिक्षावाल्याने गाडी पुढे नेण्यासाठी गिअर टाकताच, त्या पादचाऱ्याने त्याच्यावर ओरडायला सुरुवात केली. या अचानक झालेल्या आरडाओरडीमुळे रस्त्यावर चांगलाच वाद पेटला. पण मागे न हटता किंवा वाद न वाढवता, या रिक्षावाल्याने त्याला थेट 'शट युअर माऊथ' (तुझं तोंड बंद ठेव) असं ठणकावून सांगितलं आणि आपली रिक्षा पुढे नेली.
रिक्षात बसलेल्या प्रवाशाने सांगितला घटनाक्रम
या संपूर्ण घटनेचा सर्वात महत्त्वाचा पुरावा म्हणजे रिक्षात बसलेल्या प्रवाशाने दिलेली माहिती. या प्रवाशाने हा सगळा प्रकार स्वतःच्या डोळ्यांनी पाहिला आणि या घटनेचा व्हिडिओ मोबाईलमध्ये रेकॉर्ड केला.
प्रवाशाने हा व्हिडिओ शूट केला असून वाद त्या पादचाऱ्यानेच सुरू केल्याचं त्याने स्पष्ट केलं आहे. प्रवाशाच्या म्हणण्यानुसार, हिरवा सिग्नल असतानाही तो माणूस रस्त्यात आला आणि रिक्षावाल्याने गाडी पुढे घेताच त्याने ओरडायला सुरुवात केली. या व्हायरल व्हिडिओमध्ये तो वयस्कर रिक्षावाला अस्खलित इंग्रजीतून त्या माणसाला गप्प बसण्यास सांगताना स्पष्ट दिसत आहे.
लोकांच्या प्रतिक्रिया आणि ट्रॅफिकचे नियम
या व्हिडिओवर एका युजरने लिहिलंय, "अगदी योग्य बोललात." दुसऱ्या एका युजरने कमेंट केली, "माझ्या भागातही एक ख्रिश्चन रिक्षावाले काका आहेत, जे इंग्रजी, हिंदी आणि मराठी तिन्ही भाषा बोलतात." तर आणखी एकाने लिहिलंय, "ही मुंबई आहे! इथे रिक्षावाले काका अस्खलित इंग्रजी बोलू शकतात आणि मुख्यमंत्रीही होऊ शकतात."
