२३ महिन्यांचा वेदांश सिंग स्पायनल मस्क्युलर अ‍ॅट्रोफी (SMA) टाईप १ या दुर्मिळ आजाराशी झुंज देतोय. त्याच्या उपचारासाठी तब्बल ९ कोटी रुपयांची गरज आहे. २१ सप्टेंबरला लालबागच्या राजाजवळ वेदांशसाठी निधी गोळा करताना अनंत अंबानींनी त्यांची गाडी थांबवली आणि उपचाराचा संपूर्ण खर्च उचलण्याची तयारी दर्शवली, अशी माहिती मयुरेश गुजर या इन्फ्लुएन्सरने दिली आहे.
मुंबई : २३ महिन्यांचा वेदांश सिंग स्पायनल मस्क्युलर अ‍ॅट्रोफी (SMA) टाईप १ या गंभीर आजाराशी लढतोय. त्याच्या उपचारासाठी निधी गोळा करण्याची मोहीम सुरू होती. सोशल मीडिया इन्फ्लुएन्सर मयुरेश गुजरने एका व्हायरल व्हिडिओमध्ये सांगितलं की, अनंत अंबानींनी या चिमुकल्याच्या उपचाराचा संपूर्ण खर्च उचलण्याची तयारी दाखवली आहे. मयुरेशच्या सांगण्यानुसार, २१ सप्टेंबरला मुंबईत लालबागच्या राजाच्या मंडपाबाहेर त्यांच्या टीमचे बॅनर्स पाहून अंबानींनी स्वतःची गाडी थांबवली. त्यांनी टीमसोबत सुमारे पाच मिनिटे चर्चा केली आणि उपचारासाठी जेवढा खर्च येईल, तो देण्याचं आश्वासन दिलं. आता अंबानींच्या टीमकडून अधिकृत दुजोरा मिळण्याची ते वाट पाहत आहेत, जेणेकरून वेदांशचे उपचार सुरू करता येतील.
बॅनर्स पाहून अनंत अंबानींनी थांबवली गाडी
२६ वर्षांचा मयुरेश गुजर त्याच्या टीमसोबत वेदांशसाठी निधी गोळा करण्याची मोहीम राबवतोय. ही टीम मुंबईभर फिरून लोकांकडे मदतीचं आवाहन करत होती. इन्स्टाग्रामवर शेअर केलेल्या व्हिडीओमध्ये मयुरेशने हा प्रसंग त्यांच्या मोहिमेला कलाटणी देणारा असल्याचं म्हटलंय.
२१ सप्टेंबरला मयुरेश आणि त्याची टीम लालबागच्या राजाबाहेर बॅनर्स घेऊन सलग आठ तास उभी होती. त्याच दिवशी सकाळी अनंत अंबानी बाप्पाच्या दर्शनासाठी आले होते. मयुरेशने सांगितलं की, अंबानींची नजर त्यांच्या बॅनर्सवर पडली. त्यांनी लगेच गाडी थांबवली आणि चिमुकल्याच्या प्रकृतीबद्दल विचारपूस केली.
"मी वेदांश आणि आमच्या मोहिमेबद्दल त्यांना सगळी माहिती दिली," असं मयुरेशने आपल्या पोस्टमध्ये लिहिलंय.
मयुरेशच्या म्हणण्यानुसार, वेदांशच्या उपचारासाठी लागणारी सर्व रक्कम देण्याचं आश्वासन अंबानींनी दिलं. तसेच, बाळाला त्यांच्या रुग्णालयात घेऊन येण्यासही सांगितलं.
या भेटीदरम्यान दोन्ही बाजूंनी एकमेकांचे कॉन्टॅक्ट नंबर्सही शेअर केले, असं मयुरेशने स्पष्ट केलं.
वेदांशच्या उपचारासाठी ९ कोटींची गरज
वेदांश अवघ्या २३ महिन्यांचा आहे. त्याला SMA टाईप १ या गंभीर अनुवांशिक आजाराचं निदान झालंय. या आजारात मोटर न्यूरॉन्सवर परिणाम होतो आणि स्नायू खूप कमकुवत होतात.
या उपचारांसाठी सुमारे ९ कोटी रुपये खर्च अपेक्षित आहे आणि वेदांशचं कुटुंब त्यासाठी निधी उभारत आहे.
मयुरेश आणि त्याच्या टीमने सोशल मीडिया आणि सार्वजनिक आवाहनांच्या माध्यमातून जास्तीत जास्त लोकांपर्यंत पोहोचण्यासाठी जोरदार मोहीम सुरू केली होती.
मयुरेशच्या पोस्टनुसार, या मोहिमेतून ३० दिवसांत १.५ कोटी रुपयांहून अधिक निधी जमा झाला. वेदांशसाठी आतापर्यंत एकूण २.२१ कोटी रुपये गोळा झाल्याचं त्याने सांगितलं.
मोहिमेला चांगलं यश मिळत असलं तरी, उपचारासाठी लागणारी रक्कम अजूनही खूप मोठी होती.
अंबानींनी दिलेला शब्द हा खूप मोठा आधार असल्याचं मयुरेशने म्हटलंय. पण, सध्या ते अधिकृत दुजोऱ्याची वाट पाहत आहेत. लवकरच संपर्क होईल आणि उपचार सुरू होतील, अशी आशा त्याने व्यक्त केली.
परिस्थितीचं गांभीर्य सांगताना मयुरेश म्हणाला की, वेदांश आता २३ महिन्यांचा झालाय आणि त्याच्यासाठी प्रत्येक क्षण महत्त्वाचा आहे.
आता अंबानींकडून अधिकृत मदत मिळेल आणि बाळाचे उपचार वेळेत सुरू होतील, अशी आशा वेदांशचं कुटुंब आणि मोहिमेची टीम करत आहे.
'रात्रभर जागल्याचं सार्थक झालं'
मयुरेशने सांगितलं की, वेदांशच्या उपचारासाठी ते अनेक आठवडे रात्रंदिवस मेहनत करत होते. अंबानींनी गाडी थांबवून त्यांच्याशी संवाद साधला, तो क्षण सांगताना मयुरेशने लिहिलंय, "आम्ही आनंदाने अक्षरशः थरथर कापत होतो."
मोहिमेदरम्यान काढलेल्या जाग्या रात्री, पावसा-उन्हात केलेली वणवण या सगळ्याचं एका क्षणात सार्थक झाल्यासारखं वाटलं, असं तो म्हणाला. जास्तीत जास्त लोकांना एकत्र आणून वेदांशला मदत मिळवून देणं, हाच या मोहिमेचा मुख्य उद्देश होता.
ज्यांनी या मोहिमेत देणगी दिली, पोस्ट शेअर केली आणि सपोर्ट केला, त्या सर्वांचे मयुरेशने आभार मानले आहेत.
मोहिमेतून २.२ कोटींहून अधिक निधी जमा
मयुरेशने सांगितलं की, ३० दिवसांच्या या मोहिमेत त्यांनी १.५ कोटी रुपयांहून अधिक रक्कम गोळा केली. त्यामुळे वेदांशसाठी जमा झालेला एकूण निधी २.२१ कोटींच्या पुढे गेला आहे.
सोशल मीडिया आणि लोकांच्या एकजुटीतून काय साध्य होऊ शकतं, याचं हे उत्तम उदाहरण असल्याचं तो म्हणाला.
'एव्हरी होम मॅटर्स' या आपल्या उपक्रमाच्या माध्यमातून गरजू लोकांना मदत करण्याचं काम यापुढेही सुरूच राहील, असा विश्वास या इन्फ्लुएन्सरने व्यक्त केला.
