प्रत्येक देशाच्या काही चांगल्या आणि वाईट बाजू असतात. जपानमध्येही अस्वच्छ ठिकाणे आहेत, याची आठवण या जपानी तरुणीने करून दिली आहे.
मुंबई : एका जपानी तरुणीने सोशल मीडियावर भारताविषयी पसरवल्या जाणाऱ्या नकारात्मक बातम्यांना सडेतोड उत्तर दिलं आहे. हिकारू-सान असं या तरुणीचं नाव असून ती गेल्या आठ महिन्यांपासून मुंबईत राहतेय. तिने 'भारतात राहायला आल्यानंतर मला समजलेल्या गोष्टी' या विषयावर इन्स्टाग्रामवर एक व्हिडिओ शेअर केलाय. तिला जगाला भारताचं खरं सौंदर्य आणि इथला चांगुलपणा दाखवून द्यायचा आहे.
तिला मुंबईत राहताना आतापर्यंत कोणताही वाईट अनुभव आलेला नाही. इंटरनेटवर ज्या प्रकारच्या नकारात्मक घटना मोठ्या प्रमाणावर शेअर केल्या जातात, तसं काहीही तिने इथं पाहिलं नसल्याचं ती सांगते. ती इथे काही छोट्या-मोठ्या आश्चर्यकारक गोष्टी सोडल्या, तर अगदी मजेत आणि कोणत्याही समस्येशिवाय राहत आहे.
तिने असा सवाल उपस्थित केलाय की, फक्त व्ह्यूज मिळवण्यासाठी मीडिया आणि सोशल मीडियावर एखाद्या देशाच्या केवळ वाईट बाजू का दाखवल्या जातात? प्रत्येक देशाच्या काही चांगल्या आणि वाईट बाजू असतात. तिने आठवण करून दिली की जपानमध्येही काही अस्वच्छ ठिकाणे आहेत.
Related Articles
अनेक युजर्सनी हिकारू-सानच्या या व्हिडिओवर कमेंट्सचा पाऊस पाडला आहे. बऱ्याच लोकांनी कमेंट्स करत भारताला पाठिंबा दिलाय आणि तिच्यावर प्रेमाचा वर्षाव केलाय. लोक सोशल मीडियावर भारताच्या प्रचंड लोकसंख्येवरही चर्चा करत आहेत. भारताची लोकसंख्या कोट्यवधींमध्ये असल्यामुळे, अगदी थोड्या लोकांनी जरी चुकीचं वर्तन केलं, तरी तो आकडा मोठा वाटतो. पण तसं पाहिलं तर भारत सर्वसाधारणपणे खूप सुरक्षित देश आहे, असं मत अनेक युजर्सनी व्यक्त केलं आहे.
