२१ सप्टेंबर २०२६ रोजी अनंत अंबानीने पुन्हा एकदा मुंबईच्या लालबागच्या राजाचे दर्शन घेतले. पण त्याच्या या रोजच्या वाऱ्यांमुळे सामान्य भाविकांना त्रास होत असल्याचा आरोप करत नेटकऱ्यांनी त्याला सोशल मीडियावर चांगलंच ट्रोल केलं आहे. व्हीआयपी दर्शन आणि बाप्पाच्या व्यापारीकरणावर लोकांनी तीव्र संताप व्यक्त केलाय.
मुंबई : अनंत अंबानी मुंबईच्या प्रसिद्ध लालबागच्या राजाच्या मंडपाला पुन्हा एकदा भेट दिली. पण त्याच्या या भेटीमुळे सोशल मीडियावर एकच वाद सुरू झालाय. 'व्हायरल भयानी' (viralbhayani) या लोकप्रिय इन्स्टाग्राम अकाउंटने त्याच्या या भेटीचा व्हिडीओ शेअर केला. या व्हिडीओला हजारो लाईक्स मिळाले, पण कमेंट्समध्ये मात्र उद्योगपतीच्या मुलाच्या या रोजच्या वाऱ्यांवर लोकांनी जोरदार टीका केली.
इन्स्टाग्रामवर शेअर केलेल्या या व्हिडीओला कॅप्शन होतं, "Divine energy and deep faith! #AnantAmbani takes blessings at Mumbai’s famous #LalbaugchaRaja". यावर नेटकऱ्यांनी मात्र अत्यंत संतप्त प्रतिक्रिया दिल्या आहेत.
व्हीआयपी दर्शनावरून लोकांचा संताप
लोकांच्या या रागाचं कारण काय? तर बड्या लोकांसाठी दिली जाणारी व्हीआयपी वागणूक. सोशल मीडियावर याच मुद्द्यावरून चर्चा रंगली आहे. अनंत अंबानीच्या या वारंवार होणाऱ्या दर्शनावर प्रश्नचिन्ह उपस्थित करत एका युजरने लिहिलंय, "Daily ata hai kya ? As if he owns it" (हा रोज येतो का? जणू काही याचीच मालकी आहे). तर दुसऱ्याने म्हटलंय, "Roj ka kaam hai iska" (याचं रोजचंच काम आहे).
Related Articles
या कमेंट्समधून सामान्य भाविकांच्या मनातली खदखद स्पष्ट दिसते. व्हीआयपी लोकांमुळे आपल्याला बाप्पाचं दर्शन नीट घेता येत नाही, अशी त्यांची भावना आहे. गर्दीच्या नियोजनातील दुजाभाव दाखवून देत एका नेटकऱ्याने लिहिलं, "Inke case me dhakka mukki nahi ekdum shaanti se aur general crowd ko dhakkel ke bahar karte hain" (यांच्या बाबतीत कोणतीही धक्काबुक्की नाही, एकदम शांततेत दर्शन होतं आणि सामान्य गर्दीला मात्र धक्के मारून बाहेर काढतात).
"Ye kitne bar darshn krne jara iski wjha se garib logo ko moka nhi milta." (हा किती वेळा दर्शन घ्यायला जातोय, याच्यामुळे गरीब लोकांना संधी मिळत नाही). आणखी एका कमेंटमध्ये सामान्य भाविकांना होणाऱ्या त्रासाबद्दल खंत व्यक्त करण्यात आली. यातून व्हीआयपी आणि सामान्य लोकांमधली वाढती दरी दिसून येते.
व्यापारीकरण आणि भाविकांच्या गैरसोयीचे आरोप
सप्टेंबर २०२५ मध्येही रेडिटवर (Reddit) अशीच एक चर्चा रंगली होती. अंबानी कुटुंबाच्या हस्तक्षेपामुळे लालबागच्या राजाच्या मंडपातील 'मूळ अनुभव आणि पावित्र्य' नष्ट झाल्याचा आरोप तेव्हा करण्यात आला होता. ही टीका फक्त एका भेटीपुरती मर्यादित नाही. लालबागच्या राजाचं वाढतं व्यापारीकरण आणि बदलत चाललेलं स्वरूप याबद्दल लोकांच्या मनात आधीपासूनच नाराजी आहे.
अनेक भाविकांनी 'व्हीआयपी रांगेतील दुजाभावाचे' अनुभव शेअर केले आहेत. बाप्पाची एक झलक पाहता यावी म्हणून धडपडणाऱ्या सामान्य भाविकांना सुरक्षारक्षक उद्धटपणे ढकलून देतात. तर दुसरीकडे, व्हीआयपी लोक मात्र मूर्तीसमोर आरामात वेळ घालवतात. याशिवाय, कुंकवाच्या पाकिटांवर जिओचे (Jio) लोगो आणि मंडपातील जाहिरातींमुळे तिथलं आध्यात्मिक वातावरण कमी झाल्याचीही टीका होतेय.
सप्टेंबर २०२५ मध्ये महाराष्ट्र राज्य मानवी हक्क आयोगानेही यासंदर्भातील एका तक्रारीची दखल घेतली होती. लालबागच्या राजाच्या मंडपात व्हीआयपींना मिळणारी विशेष वागणूक आणि सामान्य भाविकांना मिळणारी अपमानास्पद वागणूक यावर ही तक्रार होती. मानवी हक्कांचं उल्लंघन टाळण्यासाठी आयोगाने पर्यायी व्यवस्था करण्याचे निर्देश दिले होते.
जुने ऋणानुबंध आणि बाप्पाची भक्ती
अनंत अंबानीसह संपूर्ण अंबानी कुटुंबाचे लालबागच्या राजासोबत जुने ऋणानुबंध आहेत. ते नेहमी बाप्पाच्या दर्शनाला येतात आणि मोठ्या देणग्याही देतात. त्यांनी बाप्पाला २० किलोचा सोन्याचा मुकुटही अर्पण केला होता. लोकांच्या या टीकेनंतरही, अनंत अंबानीने गणेशोत्सवादरम्यान मुंबईच्या या प्रसिद्ध मंडपात आपली दर्शनवारी सुरूच ठेवली आहे.
