मुंबई मेट्रोमध्ये एका तरुणीचा बाथरोब आणि डोक्याला टॉवेल गुंडाळून प्रवास करतानाचा व्हिडीओ सोशल मीडियावर तुफान व्हायरल होत आहे. प्रवासादरम्यान ही तरुणी चक्क आपला स्किनकेअर रुटीन फॉलो करताना दिसत आहे. सार्वजनिक ठिकाणी घडलेला हा अजब प्रकार सध्या इंटरनेटवर चर्चेचा विषय बनला आहे.
मेट्रो प्रवासात तुम्ही अनेक विचित्र गोष्टी पाहिल्या असतील. पण, एखाद्या तरुणीला बाथरोब घालून, डोक्याला टॉवेल गुंडाळून आणि प्रवासादरम्यान चेहऱ्याला क्रीम लावताना पाहिलंय का? सध्या सोशल मीडियावर असाच एक व्हिडीओ लक्ष वेधून घेत आहे. मुंबई मेट्रोमधून प्रवास करणाऱ्या एका तरुणीचा हा अतरंगी अवतार आणि वागणूक इंटरनेटवर चर्चेचा विषय ठरली आहे.
मेट्रोमध्येच स्किनकेअर रुटीन!
या व्हायरल व्हिडीओमध्ये एक तरुणी पांढऱ्या रंगाचा बाथरोब घालून मेट्रोच्या सीटवर बसलेली दिसत आहे. डोक्याला टॉवेल गुंडाळलेली ही तरुणी, जणू काही ती आपल्या घरात किंवा एखाद्या स्पामध्ये बसली आहे, इतक्या सहजतेने वावरत आहे. प्रवासादरम्यान ती आपल्या बॅगेतून ब्युटी प्रॉडक्ट्स काढते, चेहऱ्याला लावते आणि डोळ्यांखाली 'अंडर आय पॅचेस' देखील लावते. आजूबाजूचे प्रवासी आपापल्या प्रवासात मग्न असताना, ही तरुणी मात्र जगात काहीच घडलं नाही अशा थाटात आपलं स्किनकेअर करत बसली आहे. शेजारी बसलेल्या काही महिला तिच्याकडे आश्चर्याने पाहतानाही व्हिडीओमध्ये दिसत आहेत.
याहूनही विचित्र गोष्टी घडत आहेत!
८ ऑक्टोबर रोजी एक्स (X) प्लॅटफॉर्मवर हा व्हिडीओ शेअर करण्यात आला, त्यानंतर या घटनेची जोरदार चर्चा सुरू झाली. 'भारतीय मेट्रोमध्ये दररोज याहूनही विचित्र गोष्टी घडत असतात', अशा उपहासात्मक कॅप्शनसह हा व्हिडीओ व्हायरल झाला आहे. सार्वजनिक वाहतूक व्यवस्थेत घडणाऱ्या अशा अजब घटना सोशल मीडियावर किती वेगाने लक्ष वेधून घेतात, याचं हे आणखी एक उदाहरण आहे.
सुरुवातीला हा व्हिडीओ दिल्ली मेट्रोचा असल्याचा दावा केला जात होता. मात्र, व्हिडीओमधील स्टेशनची माहिती तपासल्यानंतर काही रिपोर्ट्सनुसार हा व्हिडीओ मुंबई मेट्रोमधील असल्याचं स्पष्ट झालं आहे. दरम्यान, या तरुणीने अशा कपड्यांमध्ये प्रवास का केला, यामागचं कारण अद्याप समजू शकलेलं नाही. काहीही असलं तरी, सार्वजनिक ठिकाणी दिसलेला हा अजब प्रकार सध्या इंटरनेटवर सर्वांचं लक्ष वेधून घेत आहे.
