नागपूरमधील एका गोलगप्पा विक्रेत्याने ९९,००० रुपयांमध्ये आयुष्यभर फुकट गोलगप्पे देण्याची ऑफर दिली आहे. ही ऑफर सोशल मीडियावर व्हायरल झाली असून, लोक त्यावर चर्चा करत आहेत.
नवीन वर्ष, सणासुदीच्या काळात दुकानांमध्ये अनेक ऑफर्स दिसतात. पण महाराष्ट्रातील नागपूरमधील एका गोलगप्पा विक्रेत्याने ग्राहकांना एक अनोखी ऑफर दिली आहे. एकदा ९९,००० रुपये फी भरली की आयुष्यभर त्याच्या दुकानात पैसे न देता गोलगप्पे खाऊ शकता, असे तो म्हणाला आहे. सोशल मीडियावर ही ऑफर खूप चर्चेत आहे. अनेकांना तो पैसे घेऊन दुकान रिकामे करून पळून जाईल अशी शंका आहे, तर काहीं जण आयुष्यभर म्हणजे ग्राहकांचे की विक्रेत्याचे असा प्रश्न विचारत आहेत.
गोलगप्प्यांना भारतात काही ठिकाणी पाणीपुरी आणि पुचका असेही म्हणतात. भारतीय उपखंडात हा एक अतिशय प्रसिद्ध रस्त्यावरील पदार्थ आहे. गेल्या काही वर्षांपासून त्याला जागतिक स्तरावरही मान्यता मिळाली आहे. तिखट बॉम्ब असलेले हे गोलगप्पे सर्व वयोगटातील लोक आवडीने खातात. लग्नांपासून ते वाढदिवसांपर्यंत, उद्यानांपासून ते बाजारपेठांपर्यंत सर्वत्र गोलगप्प्यांची दुकाने असण्याचे हेच कारण आहे. म्हणूनच आयुष्यभर गोलगप्पे देण्याची ही ऑफर मोठ्या प्रमाणात व्हायरल झाली आहे.
पाणीपुरीच्या क्रेझचा फायदा घेत नागपूरच्या विक्रेत्याने ही ऑफर दिली आहे. एकदा ९९ हजार रुपये भरले की आयुष्यभर तुम्ही हवे तेवढे गोलगप्पे फुकट खाऊ शकता, असे तो म्हणाला आहे. त्याचा हा सौदा सोशल मीडियावर चर्चेचा विषय ठरला आहे.
मार्केटिंग ग्रोमॅटिक्सच्या इन्स्टाग्राम पेजने हे शेअर केले असून १६ हजारांहून अधिक लोकांनी लाईक केले आहे. '९९ हजार कोणीही देणार नाही हे विक्रेत्यालाही माहीत आहे. पण यावर चर्चा व्हावी हाच त्याचा उद्देश होता आणि तो पूर्ण झाला आहे,' असे एका युजरने लिहिले आहे. तर काहींनी या सौद्याच्या सत्यतेवरही चर्चा केली आहे.
