भारतात दिवाळीसाठी ख्रिसमससारखी आठवडाभराची सुट्टी असावी अशी मागणी करणारी एक पोस्ट सोशल मीडियावर व्हायरल होत असून त्यामुळे वर्क-लाईफ बॅलन्सवर मोठी चर्चा सुरू झाली आहे.
भारतात दिवाळीत युरोप आणि अमेरिकेतील ख्रिसमस ते न्यू इयरच्या सुट्टीप्रमाणेच आठवडाभराची सुट्टी असावी अशी मागणी करणारी एक पोस्ट व्हायरल झाली आहे. यामुळे देशातील कामकाजाची संस्कृती आणि सणांच्या सुट्ट्यांबाबत मोठी चर्चा सुरू झाली आहे.
या युजरने म्हटलंय की, फक्त एक-दोन दिवसांच्या सुट्टीत नोकरदार वर्गाला आपल्या मूळ गावी जाऊन कुटुंबासोबत सण साजरा करणं खूप कठीण जातं.
X वर शेअर केलेल्या या पोस्टमध्ये त्याने लिहिलंय की, भारतातही दरवर्षी दिवाळीला आठवडाभराची सुट्टी देण्याची संस्कृती रुजवायला हवी. यामुळे घरापासून हजारो किलोमीटर दूर राहणाऱ्या लोकांना आपल्या कुटुंबाकडे जाऊन त्यांच्यासोबत सण साजरा करता येईल. त्याने युरोप आणि अमेरिकेचा दाखला दिलाय, जिथे ख्रिसमस ते न्यू इयरपर्यंत सुट्ट्या असतात. भारतानेही दिवाळीसाठी अशा प्रकारची सुट्टी द्यायला हवी, असा त्याचा युक्तिवाद आहे.
Related Articles
या युजरने नोकरदारांच्या व्यावहारिक अडचणीही मांडल्या आहेत. घरापासून १००० ते २००० किलोमीटर दूर राहणाऱ्यांना ट्रेनने जायला ३० ते ४० तास लागतात. अशावेळी बॉस दोन दिवसांपेक्षा जास्त सुट्टी देत नाही. फ्लाईटचे तिकीट एका बाजूने २० ते ३० हजार रुपये असते, जे पगारात परवडत नाही.
भारतीय सणांचा जगभर प्रसार करण्याच्या गप्पा मारल्या जातात, पण दुसरीकडे लोकांना स्वतःच्या आई-वडिलांसोबत आणि कुटुंबासोबत सण साजरे करता येत नाहीत, अशी खंत त्याने व्यक्त केली. त्याने देशाच्या वर्क कल्चरवरही प्रश्नचिन्ह उभे केले आहे. सध्याच्या या परिस्थितीमुळे फक्त कामाचा ताण आणि सणांच्या वेळीही निराशाच पदरी पडते. त्याने या गोष्टीचा संबंध थेट भारताच्या हॅपीनेस इंडेक्समधील स्थानाशी जोडला आहे.
या पोस्टने हजारो युजर्सचे लक्ष वेधून घेतले आहे. अनेकांनी भारतातील वर्क-लाईफ बॅलन्सवर आपली मते मांडली आहेत. सणांच्या वेळी नोकरदारांना जास्त सुट्टी मिळायला हवी, याच्याशी बहुतेक जणांनी सहमती दर्शवली आहे. काहींनी तर इतर देशांतील सुट्ट्यांशी याची तुलनाही केली.
एका युजरने लक्षात आणून दिले की, सुट्ट्यांची ही पद्धत फक्त पाश्चात्य देशांपुरती मर्यादित नाही. त्याने सांगितले की, तो एका इजिप्शियन क्लायंटसोबत काम करतो, आणि तिथे ईद आणि बकरीदच्या निमित्ताने कर्मचाऱ्यांना पूर्ण आठवडाभराची सुट्टी मिळते.
