दिल्लीतील एका कपलने तामिळनाडूतील मच्छिमारांकडून ५ किलो जिवंत मासे विकत घेतले आणि त्यांना पुन्हा समुद्रात सोडले. या घटनेमुळे सोशल मीडियावर मोठी चर्चा सुरू झाली आहे. काहींनी त्यांच्या भूतदयेचे कौतुक केले आहे.
दिल्लीतील एका कपलने तामिळनाडूमधील धनुषकोडी समुद्रकिनारी मच्छिमारांकडून ५ किलो जिवंत मासे विकत घेतले आणि त्यांना पुन्हा समुद्रात सोडले. त्यांच्या या अनोख्या कृतीमुळे सोशल मीडियावर जोरदार चर्चा सुरू झाली आहे. काहींनी त्यांच्या या दयाळू भावनेचे कौतुक केले आहे. पण, काहींनी यामागच्या तर्कावर प्रश्नचिन्ह उपस्थित केले आहे. मासे पुन्हा त्याच पाण्यात सोडल्याने मासेमारीच्या मुख्य प्रश्नावर काहीही फरक पडत नसल्याचा युक्तिवाद त्यांनी केला आहे.
एक महिला समुद्रात मासे सोडत असल्याचा व्हिडिओ सोशल मीडियावर व्हायरल झाल्यानंतर ही घटना उघडकीस आली. अँड्री डारिझ या एका यूजरने X वर हा व्हिडिओ शेअर केला आहे. मच्छिमारांकडून मासे विकत घेऊन ते त्याच पाण्यात सोडण्याच्या कपलच्या निर्णयावर त्यांनी प्रश्न विचारला आहे.
या विचित्र प्रकाराने अनेकांचे लक्ष वेधून घेतले आहे. या कपलने खरोखरच माशांना मदत केली आहे की, मूळ प्रश्नाकडे दुर्लक्ष करत केवळ मच्छिमारांना त्यांच्या मासेमारीचे पैसे दिले आहेत, यावर युजर्स आता वाद घालत आहेत.
इंटरनेटवर रेस्क्यू मोहिमेच्या तर्कावर प्रश्नचिन्ह
ज्या युजरने हा व्हिडिओ शेअर केला आहे, त्याने कपलच्या या कृतीमुळे खरंच काही फरक पडला का? असा प्रश्न विचारला आहे. ज्या मच्छिमारांकडून हे मासे विकत घेतले होते, ते त्यांचा व्यवसाय सुरूच ठेवणार आहेत, याकडे लक्ष वेधत त्या पोस्टमध्ये उपहासाने म्हटले आहे की, "तुमच्या मेंदूला थोड्या ऑक्सिजनची गरज आहे. कॉमन सेन्स हा प्रत्येकाचा जन्मसिद्ध हक्क नक्कीच नाही!!!"
रिपोर्टनुसार, या पोस्टला १५,००० हून अधिक लाईक्स मिळाले असून सोशल मीडिया यूजर्सकडून मोठ्या प्रमाणावर प्रतिक्रिया येत आहेत.
काही युजर्सनी या टीकेला सहमती दर्शवली आहे. कपलच्या पैशांमुळे सरतेशेवटी मासेमारी व्यवसायालाच पाठबळ मिळाल्याचा युक्तिवाद त्यांनी केला आहे. एका युजरने या तथाकथित रेस्क्यू मोहिमेवर प्रश्नचिन्ह उपस्थित केले आहे. मच्छिमारांनी पैसे कमावले आणि कपलला आपण रक्षक आहोत, असे वाटले, असे त्याने सुचवले आहे.
काहींनी केले कपलच्या कृतीचे समर्थन
मात्र, प्रत्येकानेच या घटनेकडे नकारात्मक दृष्टीने पाहिले नाही. अनेक युजर्सनी या कपलच्या बाजूने मत मांडले आहे. माशांना वाचवण्याच्या त्यांच्या उद्देशावर टीका करण्याऐवजी त्याचे कौतुक व्हायला हवे, असे त्यांनी म्हटले आहे.
एका युजरने म्हटले आहे की, जर हे मासे पुन्हा दुसऱ्या एखाद्या मच्छिमाराच्या जाळ्यात अडकले किंवा समुद्रातील मोठ्या माशांची शिकार झाले, तरीही त्यातील काही मासे जगण्याची शक्यता आहे.
त्या युजरने असेही सुचवले आहे की, जरी एका माशाला समुद्रात त्याचे नैसर्गिक आयुष्य जगता आले, तरीही या कपलच्या प्रयत्नांचे सार्थक होईल. लोकांचा दृष्टिकोन समजून न घेता त्यांना ट्रोल केले जाऊ नये, असा युक्तिवादही या प्रतिक्रियेत करण्यात आला आहे.
आणखी एका युजरने त्यांच्या कृतीचे समर्थन करत लिहिले आहे: "त्यांनी कोणाचेही नुकसान केले नाही; ते फक्त त्यांच्या विश्वासाचे पालन करत आहेत." सजीव प्राण्यांना वाचवण्याच्या उद्देशाने केलेल्या कृतीवर लोक का टीका करत आहेत, असा प्रश्नही या युजरने विचारला आहे.
चांगली कृती की प्रश्नांकित रेस्क्यू मोहीम?
या घटनेमुळे प्राणी कल्याण, भूतदया आणि वन्यजीवांचे रक्षण करण्याच्या वैयक्तिक प्रयत्नांच्या परिणामकारकतेबद्दल एक मनोरंजक चर्चा पुन्हा सुरू झाली आहे.
सोशल मीडियावरील काही युजर्सचा असा विश्वास आहे की, परिणामांपेक्षा कपलचा हेतू अधिक महत्त्वाचा आहे. तर इतरांचा असा युक्तिवाद आहे की, मच्छिमारांकडून मासे विकत घेणे आणि त्यांना त्याच पाण्यात सोडल्याने सागरी जीवन आणि मासेमारीच्या पद्धतींशी संबंधित मोठ्या समस्या सुटत नाहीत.
सध्या, ५ किलो मासे वाचवण्याचा दिल्लीतील या कपलचा अनोखा प्रयत्न ऑनलाइन चर्चेचा विषय बनला आहे. हे एक अर्थपूर्ण दयाळू कृत्य होते की दिशाभूल करणारी रेस्क्यू मोहीम होती, यावर इंटरनेटवर दोन गट पडले आहेत.
