केरळच्या कोट्टायममध्ये एका धक्कादायक घटनेत, नवऱ्याने गाडी रिव्हर्स घेताना पत्नीला चुकून चिरडल्याने तिचा मृत्यू झाला. मुरलीधरन पिल्लई हे बाहेरून आल्यावर गाडी पोर्चमध्ये लावत असताना हा अपघात झाला.
केरळच्या कोट्टायममधील किडंगूर येथे एक अत्यंत दुर्दैवी घटना घडली आहे. ६६ वर्षीय महिलेचा तिच्याच नवऱ्याच्या गाडीखाली चिरडून मृत्यू झाला. नवरा गाडी रिव्हर्स घेत असताना हा अपघात झाला. ही घटना साऊथ पटेरील भागात घडली, जेव्हा हे जोडपे बाहेरून घरी परतले होते. या भीषण अपघाताचा सीसीटीव्ही व्हिडिओ नुकताच समोर आला आहे. व्हिडिओमध्ये स्पष्ट दिसते की, महिला गाडीतून बाहेर उतरून उभी होती आणि त्याचवेळी गाडी रिव्हर्स येऊन तिला चिरडते.
सूचना: खालील व्हिडिओमधील दृश्ये विचलित करणारी असू शकतात. प्रेक्षकांनी स्वतःच्या जबाबदारीवर पाहावे.
मयत महिलेचे नाव शोभना कुमारी असून त्या भारतीय विद्यामंदिर शाळेच्या माजी मुख्याध्यापिका होत्या. त्यांच्या अशा अचानक जाण्याने कुटुंब आणि स्थानिक परिसरात मोठी हळहळ व्यक्त होत आहे.
अपघात नेमका कसा झाला?
मिळालेल्या माहितीनुसार, मुरलीधरन पिल्लई हे आपली गाडी घराच्या पोर्चमध्ये रिव्हर्स घेत होते. त्यावेळी त्यांची पत्नी शोभना कुमारी गाडीतून खाली उतरल्या होत्या.
पण, मुरलीधरन यांचे गाडीवरील नियंत्रण सुटले. गाडी आधी पोर्चच्या एका खांबाला धडकली आणि नंतर अंगणात उभ्या असलेल्या दुसऱ्या गाडीला जाऊन आदळली.
याच गोंधळात गाडीने शोभना कुमारी यांना जोरदार धडक दिली आणि त्या गाडीखाली अडकल्या. या अपघातात गंभीर दुखापत झाल्याने त्यांचा जागीच मृत्यू झाला.
