अमेरिकेत राहणाऱ्या एका भारतीय व्यक्तीने त्याच्यासोबत घडलेला एक विचित्र अनुभव शेअर केला आहे. डिनरवेळी एका अमेरिकन व्यक्तीने 'भारतात लाझान्या मिळत नाही' आणि 'भारतात निवडणुका होतात का?' असे अजब प्रश्न विचारले.
अमेरिकेत राहणाऱ्या एका भारतीय व्यक्तीने सोशल मीडियावर एक असा अनुभव शेअर केला आहे, जो वाचून तुम्हालाही आश्चर्य वाटेल. एका डिनर पार्टीमध्ये भारताविषयी असलेले विचित्र गैरसमज ऐकून त्याला धक्काच बसला. एका पाहुण्याने तर चक्क दावा केला की, "भारतात तुम्हाला लाझान्या (lasagna) मिळणार नाही."
या अनिवासी भारतीयाने (NRI) हा किस्सा रेडिटच्या (Reddit) प्रसिद्ध 'r/Indiansinusa' या फोरमवर शेअर केला आहे. त्याने "You won’t get lasagna in India + other dinner table gems” या शीर्षकाखाली ही पोस्ट लिहिली आहे. तो म्हणाला की, अमेरिकेतील एका इटालियन रेस्टॉरंटमध्ये एका छान डिनरसाठी गेलो होतो, पण तिथे सहकाऱ्याच्या नातेवाईकाने एकापाठोपाठ एक असे काही प्रश्न विचारले की मी थक्कच झालो.
या व्यक्तीच्या म्हणण्यानुसार, जेवण आल्यानंतर लगेचच त्याच्या सहकाऱ्याच्या चुलत भावाने सहजपणे टिप्पणी केली, "हो... भारतात तुला लाझान्या मिळणार नाही." जणू काही भारतीय शहरांचा जागतिक खाद्यपदार्थ आणि कॅफे संस्कृतीशी काहीही संबंध नाही, अशा थाटात तो बोलत होता. तो क्षण आठवून या व्यक्तीने गंमतीने लिहिले की, त्या पाहुण्याला वाटत असावे की "१.४ अब्ज लोक जागतिक खाद्यसंस्कृतीपासून पूर्णपणे अलिप्त आहेत."
Related Articles
पण विचित्र प्रश्नांची ही मालिका इथेच थांबली नाही.या रेडिट युझरने पुढे सांगितले की, त्याच व्यक्तीने नंतर विचारले, "भारतात लोक कोणत्या पिवळ्या प्राण्यावरून प्रवास करतात?" हा प्रश्न इतका गोंधळात टाकणारा होता की, सुरुवातीला त्याला वाटले की तो हत्तीबद्दल बोलत असावा. त्याने नम्रपणे उत्तर देण्याचा प्रयत्न केला आणि सांगितले की, अनेक शतकांपूर्वी राजे हत्तींचा वापर करत होते. पण त्या व्यक्तीला नक्की कोणता प्राणी म्हणायचा होता, हे त्याला अजूनही समजले नाही.
त्यानंतरच्या एका प्रश्नाने तर तो आणखीनच गोंधळला. त्या पाहुण्याने विचारले, "तू भारतात जाऊ शकतोस का?" यावर तो NRI म्हणाला, "हो, का नाही? मला पाहिजे तेव्हा मी प्रवास करू शकतो." त्याला मनात वाटले की, कदाचित त्या व्यक्तीला विचारायचे असेल की तो कायमचा भारतात परत जाण्याचा विचार करत आहे का.
मात्र, या सगळ्यावर कळस तेव्हा झाला, जेव्हा त्याच व्यक्तीने विचारले की भारतात निवडणुका होतात का? यावर आपण सणसणीत उत्तर दिल्याचं त्याने सांगितलं. तो म्हणाला, “हो, म्हणूनच आमच्याकडे पंतप्रधान आहेत, कोणी सर्वोच्च नेता किंवा राजा नाही.” त्याने पुढे असेही सांगितले की, अमेरिकेत अशा विचित्र गैरसमजांना सामोरे जाण्याची ही त्याची पहिलीच वेळ नाही. याआधी उबर ड्रायव्हर्सनीही त्याला भारताच्या लोकशाहीबद्दल असेच प्रश्न विचारले होते.
ही पोस्ट लवकरच व्हायरल झाली आणि यावर सांस्कृतिक अज्ञान, स्टिरिओटाइप्स (stereotypes) आणि अनेक लोकांना आपल्या देशाबाहेरील जगाबद्दल किती कमी माहिती असते, यावर एक मोठी चर्चा सुरू झाली.
अनेक रेडिट युझर्सनी त्या व्यक्तीबद्दल सहानुभूती व्यक्त केली आणि असे अनुभव खूप निराशाजनक असू शकतात हे मान्य केले. तर काहींनी असा युक्तिवाद केला की, परदेशी संस्कृतींबद्दलचे अज्ञान ही एक जागतिक समस्या आहे, ती केवळ अमेरिकेपुरती मर्यादित नाही.
