चीनमधील एका इन्फ्लुएन्सरने ३५ व्या मजल्यावरून पडूनही मृत्यूला चकवा दिला आहे. या भीषण अपघातात तिने आपला उजवा पाय गमावला, पण १७ महिन्यांच्या संघर्षानंतर तिने सोशल मीडियावर दमदार कमबॅक करत सर्वांना थक्क केलंय.
चीनमधील एका इन्फ्लुएन्सरने ३५ व्या मजल्यावरून पडूनही मृत्यूला चकवा दिला आहे. या भीषण अपघातात तिने आपला उजवा पाय गमावला, पण तिच्या जिद्दीची कहाणी ऐकून सोशल मीडिया युजर्स थक्क झाले आहेत. चीनच्या मध्य हुनान प्रांतात राहणाऱ्या या २७ वर्षीय तरुणीचे @wananan हे सोशल मीडिया हँडल आहे. तब्बल १७ महिन्यांच्या ब्रेकनंतर १२ ऑक्टोबरला तिने सोशल मीडियावर कमबॅक केलं. आपल्या रिकव्हरीबद्दल एक भावुक पोस्ट शेअर करताना ती म्हणाली, "संकटातून माझा पुनर्जन्म झाला आहे."
गेल्या वर्षी जून महिन्यात हा भयानक अपघात झाला होता. यातून आपण आता जवळपास पूर्णपणे बरे झाल्याचं तिने सांगितलं. अपघातानंतर तिला तातडीने सेंट्रल साऊथ युनिव्हर्सिटीच्या थर्ड शियांग्या हॉस्पिटलमध्ये दाखल करण्यात आलं होतं. तिथे डॉक्टरांनी तिचे प्राण वाचवण्यासाठी शर्थीचे प्रयत्न केले.
इतक्या उंचावरून पडल्यामुळे तिच्या शरीरातील अनेक हाडं मोडली होती. मेंदूत रक्तस्राव, मानेच्या मणक्याला दुखापत आणि अनेक अवयवांचं नुकसान झालं होतं. यातच तिला उजव्या पायाचा खालचा भाग गमवावा लागला. डॉक्टरांनी सलग १४ तास चाललेली एक अत्यंत गुंतागुंतीची इमर्जन्सी सर्जरी केली आणि अखेर तिचे प्राण वाचवले.
तिचा इथवरचा प्रवास अजिबात सोपा नव्हता. अपघातातील गंभीर दुखापतींशी लढताना तिने तब्बल ५० दिवस आयसीयूमध्ये (ICU) काढले. तिच्यावर उपचार करणारे डॉक्टर झिंग वेई यांनी सांगितलं की, उपचारांचा परिणाम आमच्या अपेक्षेपेक्षा खूप चांगला होता. पायाचा खालचा भाग कापावा लागला असला, तरी तिच्या शरीरातील इतर अवयवांनी आता बऱ्यापैकी काम करायला सुरुवात केली आहे.
मेडिकल टीमचे प्रयत्न तर महत्त्वाचे होतेच, पण ती ज्या पद्धतीने खाली पडली त्यामुळेही तिचा जीव वाचला. रिपोर्ट्सनुसार, खाली पडताना ती आधी एका झाडावर आदळली आणि नंतर झुडपांवर पडली. यामुळे पडण्याचा वेग कमी झाला आणि तिचा जीव वाचू शकला.
या अपघातापूर्वी @wananan चे सोशल मीडियावर सुमारे १ लाख फॉलोअर्स होते. तिचं सौंदर्य आणि गाण्यांचे कव्हर व्हिडिओ लोकांना खूप आवडायचे. आपला चेहरा आणि हातांना कोणतीही गंभीर दुखापत झाली नाही, यासाठी तिने देवाचे आभार मानले आहेत.
एवढ्या मोठ्या दुखापतींनंतरही ती दररोज न चुकता रिहॅबिलिटेशनचे व्यायाम करत आहे. लवकरच आपल्याला कृत्रिम पाय बसेल, अशी आशा तिला आहे.
आपल्या भविष्यातील प्लॅन्सबद्दल बोलताना तिने अत्यंत सकारात्मक विचार मांडले. ती म्हणाली, "मला जिथे जायचंय तिथे मी अजूनही चालत जाऊ शकते आणि जर चालता आलं नाही, तर मी टॅक्सी बोलावून घेईन."
या भयानक प्रसंगामुळे आयुष्याकडे बघण्याचा तिचा दृष्टिकोनच बदलून गेलाय. ती म्हणाली की, आता तिचं आयुष्य फक्त तिचं राहिलेलं नाही, तर ज्यांनी तिला वाचवण्यासाठी आणि बरं करण्यासाठी मदत केली, त्या सर्वांचं आहे. त्यांच्याप्रती कृतज्ञता व्यक्त करण्यासाठी हे आयुष्य सुंदरपणे जगण्याचा निश्चय तिने केला आहे.
रिकव्हरीच्या त्या कठीण दिवसांची आठवण काढताना ती म्हणाली की, जखमा भरून येताना शरीरात 'सगळीकडे' भयंकर वेदना होत होत्या. पण या अनुभवाने तिला दुःखाच्या पलीकडे पाहायला आणि संकटातही ताकद शोधायला शिकवलं.
"संकटं मला उद्ध्वस्त करण्यासाठी नाही, तर मला घडवण्यासाठी आली आहेत. आयुष्य म्हणजे फक्त ग्लॅमरस दिसणं नाही, तर तुटलेल्या तुकड्यांना सामोरं जाण्याचं आणि त्यांना पुन्हा एकत्र जोडण्याचं धाडस म्हणजे आयुष्य," असं ती म्हणाली.
कठीण परिस्थितीचा सामना करणाऱ्यांना आशेचा किरण दाखवत तिने आपल्या फॉलोअर्सना एक सल्ला दिला. जे गमावलंय त्याचा विचार करत बसण्यापेक्षा, जे मिळवलंय त्यावर लक्ष केंद्रित करा, असं ती म्हणाली.
"जे गमावलंय ते पुन्हा गमावलं जाणार नाही," असं म्हणत तिने आपल्या भावना व्यक्त केल्या.
