गुरुवारी रात्री तिबेटमध्ये ७.० रिश्टर स्केलचा भीषण भूकंप झाला. यात किमान १६ जणांचा बळी गेला असून अनेक जण जखमी आहेत. भूकंपाचा धक्का इतका जोरदार होता की शेकडो घरे जमीनदोस्त झाली. सध्या ३०० हून अधिक पोलीस बचावकार्यात गुंतले आहेत.
मुंबई : चीनच्या अतिदुर्गम तिबेट भागात गुरुवारी रात्री ७.० रिश्टर स्केलचा भीषण भूकंप झाला. या विनाशकारी भूकंपात किमान १६ जणांचा मृत्यू झाला असून अनेक जण जखमी झाल्याची माहिती समोर आली आहे. 'यूएस जिओलॉजिकल सर्व्हे'ने दिलेल्या माहितीनुसार, रात्री १०:३३ वाजता (१४३३ GMT) हा भूकंप झाला. या भूकंपाचा केंद्रबिंदू नागकूच्या पूर्व-ईशान्येला सुमारे १९० किलोमीटर (१२० मैल) आणि प्रांतीय राजधानी ल्हासाच्या ईशान्येला ३९० किलोमीटर अंतरावर एका डोंगराळ भागात होता.
'चायना सेंट्रल टेलिव्हिजन' (CCTV) च्या वृत्तानुसार, या दुर्घटनेत ४६ जण जखमी झाले आहेत, त्यापैकी ११ जणांची प्रकृती गंभीर आहे. प्राथमिक अंदाजानुसार, भूकंपाच्या या जोरदार धक्क्यामुळे ३३९ घरांचे मोठे नुकसान झाले आहे किंवा ती पूर्णपणे उद्ध्वस्त झाली आहेत.
बचावकार्य वेगाने करण्यासाठी आणि नुकसानग्रस्तांना मदत पोहोचवण्यासाठी ३०० हून अधिक पोलीस अधिकाऱ्यांना घटनास्थळी पाचारण करण्यात आले आहे. बचाव पथके सध्या नुकसानीचा आढावा घेत आहेत.
Related Articles
सोशल मीडियावर व्हायरल होत असलेल्या व्हिडिओंमध्ये भूकंपाचा थरार स्पष्ट दिसत आहे. भूकंपाचे धक्के बसताच लोक रेस्टॉरंटमधून जीव मुठीत धरून बाहेर पळताना दिसले. तसेच दुकानांमधील सामानाचीही मोठी पडझड झाली.
व्हायरल सीसीटीव्ही व्हिडिओ पाहा
मारू टाउनशिपचे उपप्रमुख ल्हावांग डागपो यांनी 'शिन्हुआ' वृत्तसंस्थेला सांगितले की, त्यांच्या कार्यालयात भूकंपाचे धक्के स्पष्टपणे जाणवले. या धक्क्यांमुळे कार्यालयाच्या भिंतींना तडे गेले आहेत.
सरकारी माध्यमांनी प्रसारित केलेल्या व्हिडिओंमध्ये नागरिक घाबरून घराबाहेर पळताना आणि उघड्यावर किंवा पार्क केलेल्या गाड्यांमध्ये आश्रय घेताना दिसत आहेत. पहिल्या मोठ्या भूकंपानंतर, आजूबाजूच्या परिसरात ३ ते ४ रिश्टर स्केलचे अनेक छोटे धक्के (आफ्टरशॉक्स) जाणवले. याआधी जानेवारी २०२५ मध्ये तिबेटच्या ग्रामीण टिंगरी काउंटीमध्ये असाच एक विनाशकारी भूकंप झाला होता, ज्यामध्ये किमान १२६ जणांना आपला जीव गमवावा लागला होता.
