Kitchen Tips: फक्त 30 सेकंदात डाळिंब सोलण्याची जादूई ट्रिक! जाणून घ्या अधिक
Kitchen Tips: डाळिंब सोलताना खूप त्रास होतो का? प्रत्येक वेळी दाणे चिरडले जातात आणि हात काळे पडतात का? दाण्यांमधून रस उडतो? त्याचे डाग पडतात? मग या सोप्या टिप्स खास तुमच्यासाठी आहेत.
डाळिंब
डाळिंब खाणं आरोग्यासाठी किती फायदेशीर आहे, हे वेगळं सांगायला नको. डाळिंबाचे दाणे खायला छान लागतात, पण ते फळातून वेगळे करणं हेच एक मोठं कष्टाचं काम आहे. दाणे काढताना ते फुटतात, रस हाताला लागतो आणि हात चिकट, काळे पडतात. नखंही काळी होतात. हा सगळा त्रास टाळून फक्त 30 सेकंदात डाळिंबाचे दाणे कसे काढायचे, ते आता पाहूया...
डाळिंबाचे दाणे सहज काढण्याची जादूई ट्रिक
१. वरचा भाग कापून घ्या: सगळ्यात आधी, डाळिंबाचा वरचा भाग (मुकुटासारखा दिसणारा) सुरीने गोलाकार कापून काढा. आता तुम्हाला फळाच्या आतला पांढरा पापुद्रा आणि त्यामधील डाळिंबाचे दाणे स्पष्ट दिसतील.
२. सुरीने काप द्या: फळाच्या आत जिथे-जिथे पांढरे पापुद्रे आहेत, ते पाहून बरोबर त्याच रेषेत सालीवर उभे काप द्या. हे काप फक्त सालीपुरतेच मर्यादित ठेवा, दाण्यांना इजा होणार नाही याची काळजी घ्या.
३. फुलाप्रमाणे वेगळे करा
काप दिलेल्या भागांच्या मदतीने डाळिंब हळूवारपणे उघडा, ते एखाद्या फुलासारखं उमलेल. यामुळे दाणे सैल होतील. आता एक खोलगट भांडं घ्या. डाळिंब तुमच्या तळहातावर उलटं धरा (दाणे भांड्याच्या दिशेने असतील असं) आणि एका जाडसर पळीने किंवा चमच्याने फळाच्या मागच्या बाजूला जोरजोरात ठोका. बस्स! फक्त 30 सेकंदात सर्व दाणे भांड्यात पडतील. तुमचे हातही खराब होणार नाहीत आणि नखांनाही त्रास होणार नाही.
