Instagram New Feature : इन्स्टाग्रामने 'Instants' नावाचं एक नवीन फीचर आणलं आहे. यात तुम्ही मित्रांसोबत तात्पुरते आणि कोणतेही फिल्टर्स न लावलेले फोटो शेअर करू शकता. हे फोटो एकदा पाहिल्यानंतर आपोआप गायब होतात. हे फीचर फक्त म्युच्युअल फॉलोअर्स किंवा क्लोज फ्रेंड्ससोबतच वापरता येणार आहे.
Instagram New Feature : सोशल मीडिया प्लॅटफॉर्म इन्स्टाग्रामने (Instagram) आपल्या युजर्ससाठी 'Instants' नावाचं एक नवीन फीचर आणलं आहे. या फीचरमुळे मित्रांसोबत फोटो शेअर करण्याची पद्धत आणखी मजेशीर होणार आहे. मेटाने (Meta) हे फीचर जगभरात लाँच केलं असून, याचा मुख्य उद्देश फोटो शेअरिंग अधिक अनौपचारिक (informal) आणि खासगी बनवणं हा आहे. 'Instants' वापरून युजर्स इन्स्टाग्रामच्या डायरेक्ट चॅटमधून असे फोटो पाठवू शकतात, जे एकदा पाहिल्यानंतर लगेच गायब होतात. जर फोटो पाहिला नाही, तर तो २४ तासांनंतर आपोआप एक्सपायर होतो. हे फीचर तुम्ही फक्त तुमच्या म्युच्युअल फॉलोअर्ससोबत किंवा 'क्लोज फ्रेंड्स' लिस्टमधील मित्रांसोबतच वापरू शकता.
मेटाने एका ब्लॉग पोस्टमध्ये सांगितलं आहे की, इन्स्टाग्राम स्टोरीज किंवा पोस्टच्या तुलनेत 'Instants' हे अधिक 'रॉ' आणि 'अनप्रोसेस्ड' (unprocessed) असतील. म्हणजे, जसा फोटो काढला तसाच तो पाठवावा लागेल. यासाठी तुम्हाला ॲपमधील कॅमेराच वापरावा लागेल, फोन गॅलरीमधून फोटो अपलोड करता येणार नाही. विशेष म्हणजे, या फोटोंना तुम्ही स्टिकर्स, फिल्टर्स लावू शकत नाही किंवा एडिटही करू शकत नाही. फक्त फोटोला कॅप्शन मात्र देता येईल.
मेटाच्या मते, युजर्सनी कोणताही मुलामा न चढवता, जसे आहेत तसे क्षण शेअर करावेत, हा या फीचरमागचा उद्देश आहे. कंपनीने काही देशांमध्ये 'Instants' नावाचं एक वेगळं ॲपही लाँच केलं आहे, ज्यामुळे युजर्सना अजून जलदपणे कॅमेरा वापरता येईल. हे ॲप इन्स्टाग्राम अकाउंटशीच जोडलेलं असेल.
Related Articles
जेव्हा तुमचा मित्र तुम्हाला 'Instant' पाठवतो, तेव्हा तुम्ही त्यावर डायरेक्ट मेसेजद्वारे रिप्लाय करू शकता, इमोजी रिॲक्शन देऊ शकता किंवा तुम्हीही त्यांना 'Instant' पाठवू शकता. तुम्ही शेअर केलेले फोटो तुमच्या खासगी अर्काइव्हमध्ये (archive) एका वर्षासाठी सेव्ह राहतील.
हे फीचर लाँच झाल्यानंतर याची तुलना थेट BeReal आणि Snapchat या ॲप्सशी केली जात आहे. काही युजर्सनी या नव्या फीचरचं स्वागत केलं आहे, तर काहींनी आधीच इतकी फीचर्स असताना आणखी एकाची भर कशाला, असा सवाल करत टीका केली आहे.
मित्रांसोबत शेअरिंग सोपं करणारी खास वैशिष्ट्ये
Archive (अर्काइव्ह): तुम्ही शेअर केलेले 'Instants' तुमच्या एका खासगी अर्काइव्हमध्ये एक वर्षासाठी सेव्ह राहतील. हे अर्काइव्ह फक्त तुम्हालाच दिसेल. तुमच्या इनबॉक्समधील 'Instants' सेक्शनमध्ये वरच्या उजव्या कोपऱ्यात तुम्हाला ते मिळेल.
Recap to Stories (रिकॅप टू स्टोरीज): तुम्ही तुमच्या अर्काइव्हमधील 'Instants' एकत्र करून एक 'रिकॅप' तयार करू शकता आणि तो तुमच्या स्टोरीजवर शेअर करू शकता.
No screenshots (स्क्रीनशॉट नाही): तुम्ही पाठवलेल्या 'Instants'चा तुमचे मित्र स्क्रीनशॉट किंवा स्क्रीन रेकॉर्डिंग करू शकणार नाहीत.
Undo (अंडू): चुकून एखादा 'Instant' पाठवला गेला? समोरच्या व्यक्तीने पाहण्याआधी तुम्ही तो 'अंडू' करू शकता. तसेच, अर्काइव्हमधून काढून टाकल्यास ज्यांनी तो अजून उघडला नाही, त्यांच्यापर्यंत तो पोहोचणार नाही.
Snooze (स्नूझ): तुम्हाला काही काळासाठी 'Instants' नको असतील, तर इनबॉक्समधील 'Instants' सेक्शनवर प्रेस करून उजवीकडे स्वाइप करा. ते तात्पुरते बंद होतील. पुन्हा सुरू करण्यासाठी डावीकडे स्वाइप करा.
