स्ट्रॉबेरीच्या शेतीसाठी खूप जागेची गरज नसते. गच्चीवरील बागेत स्ट्रॉबेरी कशी पिकवायची, आणि अवघ्या ६० दिवसांत लालचुटूक स्ट्रॉबेरी कशी मिळवायची, याच्या खास टिप्स येथे आहेत.

स्ट्रॉबेरीच्या शेतीसाठी खूप जागेची गरज नसते. गच्चीवरील बागेत स्ट्रॉबेरी कशी पिकवायची, आणि अवघ्या ६० दिवसांत लालचुटूक स्ट्रॉबेरी कशी मिळवायची, याच्या खास टिप्स येथे आहेत.

बाजारातून महागडी स्ट्रॉबेरी विकत घेण्याचे दिवस आता संपले. आता तुमच्या गच्चीवरील बागेतच लालचुटूक स्ट्रॉबेरी पिकेल. स्ट्रॉबेरीच्या शेतीसाठी खूप जागेची गरज नसते. फक्त एक छोटी कुंडी आणि थोडी काळजी घेतल्यास ६० दिवसांत फळ मिळवणं शक्य आहे. हे कसं करायचं? त्याच्या टिप्स येथे आहेत.

टिप्स जाणून घ्या

१. योग्य वेळ आणि रोपाची निवड: स्ट्रॉबेरीच्या शेतीसाठी ऑक्टोबर ते डिसेंबर हा सर्वोत्तम काळ आहे. रोपवाटिकेतून चांगल्या प्रतीचं रोप विकत घ्या. विंटर डॉन, कॅमरोझा, स्वीट सेन्सेशन या जाती कुंडीसाठी खूप चांगल्या आहेत. बियांपासून लागवड करायची असल्यास जास्त वेळ लागतो, त्यामुळे रोप विकत घेणंच चांगलं.

२. कुंडी आणि माती तयार करणे - मुख्य पद्धत: ८ ते १० इंचाची कुंडी पुरेशी आहे. कुंडीच्या तळाशी छिद्र असावं जेणेकरून पाणी साचून राहणार नाही. माती तयार करण्याची पद्धतच मुख्य आहे. ५०% पोयटा माती + ३०% शेणखत किंवा गांडूळ खत + २०% वाळू मिसळा. यात मूठभर हाडांचा चुरा आणि निंबोळी पेंड मिसळल्यास झाड निरोगी राहील. माती भुसभुशीत असायला हवी.

३. रोपाची लागवड आणि ऊन: कुंडीच्या मध्यभागी रोप लावा. झाडाचं मूळ जास्त खोल जाणार नाही याची काळजी घ्या. लागवडीनंतर थोडं पाणी द्या. स्ट्रॉबेरीच्या झाडाला दिवसातून ६-७ तास ऊन लागणं गरजेचं आहे. त्यामुळे गच्चीवर ऊन असलेल्या ठिकाणी कुंडी ठेवा.

४. ६० दिवसांत फळ मिळवण्यासाठी अशी घ्या काळजी: - पाणी: माती सुकल्यावरच पाणी द्या. जास्त पाणी दिल्यास झाड कुजेल. - मल्चिंग: झाडाच्या बुंध्यापाशी गवत किंवा सुकी पानं पसरा. यामुळे फळ मातीला लागून कुजणार नाही आणि ओलावा टिकून राहील. - खत: दर १५ दिवसांनी मोहरीच्या पेंडीचं पाणी किंवा केळीच्या सालीचं पाणी द्या. फुलं येताना थोडं पोटॅश खत दिल्यास फळ गोड होईल. - परागीभवन: गच्चीवर मधमाश्या कमी येतात. त्यामुळे ब्रशच्या साहाय्याने अलगदपणे फुलांवर परागीभवन करू शकता.

५. फळ काढणी: रोप लावल्यापासून ३०-३५ दिवसांत फुलं यायला सुरुवात होते. फुलापासून फळ तयार व्हायला आणखी २५-३० दिवस लागतात. म्हणजेच एकूण ६० दिवसांतच लालचुटूक स्ट्रॉबेरी तयार होईल. फळ पूर्ण लाल झाल्यावरच काढा.

एका झाडापासून २००-३०० ग्रॅमपर्यंत स्ट्रॉबेरी मिळते. त्यामुळे या हिवाळ्यात गच्चीवरच स्ट्रॉबेरीची लागवड सुरू करा.