Instagram Encryption इन्स्टाग्राममधील 'एंड-टू-एंड एन्क्रिप्टेड' मेसेजिंगची सुविधा मे २०२६ पासून बंद होणार असल्याची घोषणा मेटाने केली आहे. या निर्णयामुळे युझर्सच्या मेसेजची प्रायव्हसी धोक्यात येण्याची आणि कंपनी मेसेज तपासू शकेल अशी भीती व्यक्त केली जात आहे.
Instagram Encryption जगातील सर्वात लोकप्रिय सोशल मीडिया प्लॅटफॉर्मपैकी एक असलेल्या इन्स्टाग्राममध्ये एक मोठा बदल होणार आहे. कंपनीने दिलेल्या माहितीनुसार, ८ मे २०२६ पासून प्लॅटफॉर्मवरील 'एंड-टू-एंड एन्क्रिप्टेड' (E2EE) मेसेजिंगची सुविधा बंद केली जाईल, असं मेटा प्लॅटफॉर्मने कन्फर्म केलं आहे. हा बदल लागू झाल्यावर, इन्स्टाग्रामवरून पाठवलेले मेसेज पूर्वीसारखे एन्क्रिप्शनने सुरक्षित राहणार नाहीत.
इन्स्टाग्राममधील एंड-टू-एंड एन्क्रिप्टेड मेसेजिंग म्हणजे काय?
युझर्सची प्रायव्हसी अधिक मजबूत करण्यासाठी डिसेंबर २०२३ मध्ये इन्स्टाग्रामने हे एन्क्रिप्टेड मेसेजिंग फीचर आणलं होतं. पण आता या नव्या निर्णयामुळे, युझर्स एकमेकांना पाठवत असलेल्या मेसेजमधील मजकूर कंपनीला तपासता येऊ शकतो, असं टेक्नोलॉजी तज्ज्ञांचं म्हणणं आहे.
ज्या युझर्सच्या चॅट्सवर या बदलाचा परिणाम होईल, त्यांना त्यांचे मेसेज आणि मीडिया फाइल्स डाउनलोड करण्याची संधी दिली जाईल, असं मेटाने एका ब्लॉग पोस्टमध्ये स्पष्ट केलं आहे. युझर्सना आवश्यक माहिती डाउनलोड करण्यासाठी इन्स्टाग्राम ॲपमध्येच खास सूचना दिल्या जातील. तसेच, ॲपची जुनी आवृत्ती वापरणाऱ्यांना आधी ॲप अपडेट करावं लागेल, असंही कंपनीने सांगितलं आहे.
Related Articles
इन्स्टाग्राम मेसेजच्या सुरक्षेबद्दल चिंता
इन्स्टाग्रामवरून एंड-टू-एंड एन्क्रिप्शन काढून टाकल्यामुळे, मेटाच्या इतर मेसेजिंग सेवांमध्येही असे बदल होतील का, अशी चिंता निर्माण झाली आहे. विशेषतः, फेसबुक मेसेंजरसारख्या प्लॅटफॉर्मचं भविष्य काय असेल, याकडे आता टेक जगाचं लक्ष लागलं आहे. दरम्यान, इंटरनेटवर लहान मुलांना लक्ष्य करून होणाऱ्या लैंगिक शोषणाशी संबंधित कंटेंट (CSAM) मोठ्या प्रमाणात पसरत असल्याची चिंता व्यक्त केली जात आहे. एन्क्रिप्शन काढून टाकल्यास, इन्स्टाग्रामवरील डायरेक्ट मेसेज आणि कॉल्स स्कॅन करून असा धोकादायक कंटेंट शोधणं कंपनीसाठी सोपं होईल, असा अंदाज आहे.
अमेरिका, ब्रिटन यांसारख्या देशांच्या सरकारांनी आणि युरोपियन युनियननेही, खासगी मेसेजिंग सेवांमध्ये होणारे गुन्हे शोधण्यासाठी आणि रोखण्यासाठी टेक कंपन्यांनी अधिक जबाबदारी घ्यावी, अशी मागणी केली आहे. यासाठी 'ऑनलाइन सेफ्टी ॲक्ट २०२३' सारखे कायदेही आणले गेले आहेत. मात्र, इन्स्टाग्रामवर एन्क्रिप्शन बंद करण्यामागे नेमकं कारण काय आहे, हे मेटाने अद्याप अधिकृतपणे सांगितलेलं नाही. पण या निर्णयामुळे युझरची प्रायव्हसी आणि ऑनलाइन सुरक्षा यांच्यातील संतुलन कसं साधलं जाईल, यावर पुन्हा एकदा जोरदार चर्चा सुरू झाली आहे.
