ऑस्ट्रेलिया आणि बांगलादेश यांच्यातील दुसरा कसोटी सामना फक्त दोन दिवसांत संपल्याने सुनील गावसकर यांनी तीव्र नाराजी व्यक्त केली आहे. भारतात असं काही घडल्यास होणाऱ्या टीकेकडे लक्ष वेधत त्यांनी ऑस्ट्रेलियन संघाच्या दुटप्पीपणावर बोट ठेवलं.
मुंबई : ऑस्ट्रेलिया आणि बांगलादेश यांच्यातील दुसरा कसोटी सामना ज्या खेळपट्टीवर खेळवला गेला, त्यावर भारताचे महान क्रिकेटपटू सुनील गावसकर यांनी जोरदार टीका केली आहे. भारतात जर एखादा सामना दोन दिवसांत संपला असता, तर केवढा गदारोळ झाला असता, याकडे लक्ष वेधत त्यांनी ऑस्ट्रेलियन क्रिकेटमधील दुटप्पीपणा उघड केला. या सामन्यात ऑस्ट्रेलियाने बांगलादेशचा एक डाव आणि ५१ धावांनी पराभव केला. विशेष म्हणजे, बांगलादेशचा संघ दोन्ही डावांत १०० धावांचा टप्पाही ओलांडू शकला नाही.
एवढंच नाही, तर ऑस्ट्रेलियन फलंदाजांनाही आपल्या एकमेव डावात फलंदाजी करताना मोठा संघर्ष करावा लागला. कॅमरून ग्रीनने ६७ धावा केल्या, पण त्याच्याशिवाय फक्त चारच फलंदाज दुहेरी धावसंख्या गाठू शकले. हा सामना फक्त ७५० चेंडूंमध्ये संपला आणि कसोटी क्रिकेटच्या इतिहासातील चौथा सर्वात कमी कालावधीचा सामना ठरला. गावसकर म्हणाले की, आता खेळपट्टी सोडून इतर सर्व गोष्टी तपासल्या जातील आणि ऑस्ट्रेलियन बाजूने कारणं दिली जातील.
गावसकर म्हणाले, ''ऑस्ट्रेलियात आणखी एक कसोटी सामना दोन दिवसांत संपला. गेल्या काही वर्षांत असं चौथ्यांदा घडलं आहे. अशा निकालांना कारणीभूत ठरणाऱ्या अतिरिक्त बाऊन्स असलेल्या खेळपट्ट्यांबद्दल कोणतीही टीका ऐकायला मिळत नाही. आता ऑस्ट्रेलियन बाजूने पटापट कारणं दिली जातील. ते म्हणतील की हवामान उष्ण असल्यामुळे खेळपट्टीवर जास्त गवत ठेवलं होतं, किंवा फलंदाजांमध्येच चेंडूचा बाऊन्स खेळण्याचं तंत्र नव्हतं, असं काहीतरी नेहमीचं कारण दिलं जाईल.''
Related Articles
जेव्हा यजमान संघाचे फलंदाजही नीट फलंदाजी करण्यासाठी धडपडत असतील, तर खेळपट्टीबद्दल काय बोलायचं? असा सवालही गावसकर यांनी विचारला. ते पुढे म्हणाले की, भारतीय संघ व्यवस्थापन आपल्या गोलंदाजांच्या ताकदीनुसार खेळपट्ट्यांची मागणी उघडपणे करतं. पहिल्या कसोटीत बांगलादेशकडून ऑस्ट्रेलियाचा पराभव झाल्यानंतर मॅके येथील खेळपट्टीवर जे घडलं, त्यात आश्चर्य वाटण्यासारखं काही नाही. गावसकरांच्या मते, भारत आपल्या ताकदीनुसार खेळपट्ट्या उघडपणे मागतो, तर जुने क्रिकेटिंग देश मात्र गुपचूप आपल्याला हव्या तशा खेळपट्ट्या बनवून घेतात.
