PV Sindhu Bengaluru Home : मॉडर्न लूक आणि ट्रॅडिशनल टच, पीव्ही सिंधूचं घर पाहिलंत का?

घर म्हणजे फक्त लक्झरी सुविधा नव्हे, तर तिथे शांतता आणि गोड आठवणीही असाव्या लागतात. घरात राहणाऱ्या माणसांचा स्वभाव घराच्या कोपऱ्याकोपऱ्यात दिसायला हवा. बॅडमिंटन चॅम्पियन पीव्ही सिंधूचं बंगळुरूमधलं घर याचं परफेक्ट उदाहरण आहे.

Image Credit : instagram/ pv sindhu

पीव्ही सिंधूचं घर पाहिलंत का?

बॉलिवूड डायरेक्टर फराह खान नुकतीच तिच्या यूट्यूब सीरिजसाठी बॅडमिंटन चॅम्पियन पीव्ही सिंधूच्या घरी गेली होती. यावेळी सिंधू आणि तिचा नवरा राहात असलेल्या या घराचा व्हिडीओ पहिल्यांदाच समोर आला. मॉडर्न लूक आणि ट्रॅडिशनल टच असलेलं हे घर एखाद्या राजवाड्यासारखं दिसतं.

ऑलिम्पिकमध्ये दोनदा पदकं जिंकून सिंधूने संपूर्ण देशाला अभिमान वाटेल अशी कामगिरी केली आहे. तिने फक्त खेळातच नाही, तर आपल्या पर्सनल लाईफमध्येही सगळं कसं सुंदर सजवून ठेवलंय.

लग्नानंतर सिंधू आता हैदराबादऐवजी बंगळुरूमध्ये नवरा व्यंकट दत्त साईसोबत राहते. २२ डिसेंबर २०२४ रोजी उदयपूरमध्ये त्यांचं लग्न झालं होतं. सिंधू आणि दत्त साई यांचं हे लक्झरी घर कसं आहे, ते आपण इथे पाहूया.

Image Credit : Instagram/ pv sindhu

घराचं सुंदर इंटिरिअर

सिंधूच्या घरी जाताच एक मोठा लाकडी दरवाजा पाहुण्यांचं स्वागत करतो. आत पाऊल ठेवताच सुंदर पेंटिंग्ज, इनडोअर प्लांट्स आणि सजवलेला हॉल आपलं लक्ष वेधून घेतो. भिंतीवर ब्लॅक अँड व्हाईट फोटोंचं कलेक्शन आहे. यात सिंधूच्या बॅडमिंटन करिअरमधले महत्त्वाचे क्षण आणि तिच्या लग्नाचे फोटो लावले आहेत. ही जागा म्हणजे सिंधूच्या आयुष्यातल्या महत्त्वाच्या आठवणी सांगणारं एक छोटं म्युझियमच वाटतं. घरातल्या छोट्या-छोट्या सजावटीमुळे तिथलं वातावरण खूपच प्रसन्न वाटतं.

Image Credit : Instagram/ pv sindhu

बोहो स्टाईल लिव्हिंग रूम

हॉलमधून आत गेल्यावर एक प्रशस्त लिव्हिंग रूम दिसते. जमिनीपासून छतापर्यंत असलेल्या मोठ्या खिडक्यांमधून घरात मस्त नॅचरल लाईट येतो. या रूममध्ये पेस्टल कलर्सचा वापर प्रामुख्याने केलाय. फिकट हिरव्या रंगाचे सोफे आणि एम्ब्रॉयडरी डिझाईन असलेल्या कुशनमुळे रूमला एक सुंदर लूक मिळतो. खूप साऱ्या वस्तूंनी रूम भरण्यापेक्षा सिंधूने काही मोजक्या आणि खास वस्तूंनाच पसंती दिली आहे. एका वेगळ्या डिझाईनचा उंच लॅम्प रूममध्ये छान प्रकाश देतो आणि तिचं सौंदर्यही वाढवतो.

Image Credit : Instagram/ pv sindhu

महाभारत थीमवर आधारित चेसबोर्ड

सिंधूच्या घरातली सर्वात खास वस्तू म्हणजे महाभारताची आठवण करून देणारा चेसबोर्ड. काच आणि मार्बलने डिझाईन केलेल्या या चेसबोर्डवर पांडव आणि कौरवांना दर्शवणाऱ्या सोंगट्या आहेत. दोन मजली डिझाईन असलेल्या या बोर्डवर महाभारतातले प्रसंग कोरले आहेत. मॉडर्न डिझाईनच्या घरात हे ट्रॅडिशनल आर्ट वर्क खूपच उठून दिसतं. घराच्या सजावटीला इंडियन कल्चरचा टच देण्यासोबतच, घरी येणाऱ्या पाहुण्यांचं हे लक्ष वेधून घेतं. घर म्हणजे फक्त सुंदर दिसणारी जागा नाही, तर तिथे राहणाऱ्यांची आवड आणि व्यक्तिमत्त्व दाखवणारी जागा असते, याचं हे चेसबोर्ड बेस्ट उदाहरण आहे.

Image Credit : Instagram/ pv sindhu

लाकडी डायनिंग टेबल आणि मॉड्युलर किचन

लिव्हिंग रूमच्या बाजूलाच डायनिंग एरिया आहे. इथे डार्क रंगाचं लाकडी डायनिंग टेबल आणि त्याला मॅचिंग खुर्च्या आहेत. खुर्च्यांवरचे फिकट तपकिरी रंगाचे कुशन डार्क लाकडासोबत मस्त कॉन्ट्रास्ट लूक देतात. डायनिंग एरियाला लागूनच मॉड्युलर किचन आहे. याच्या काउंटरवर व्हाईट मार्बल फिनिशिंग दिलंय. लाकडी डिझाईन आणि फिकट रंगांचं कॉम्बिनेशन घराच्या या भागाला सिम्पल आणि मॉडर्न लूक देतं.

स्विमिंग पूल आणि गार्डन

सिंधूच्या घराचं आणखी एक आकर्षण म्हणजे स्विमिंग पूल आणि हिरवंगार गार्डन. डायनिंग एरियामधून पातळ पडद्यांच्या पलीकडे बाहेरचा स्विमिंग पूल आणि गार्डन दिसतं. यामुळे घरात बसूनही बाहेरचं निसर्गरम्य वातावरण डोळ्यांना सुखावतं. स्विमिंग पूलच्या बाजूला राखाडी रंगाचे सोफे आणि सेंटर टेबल असलेला रिलॅक्सिंग एरिया आहे. फावल्या वेळात बसण्यासाठी किंवा फॅमिलीसोबत वेळ घालवण्यासाठी ही एकदम परफेक्ट जागा आहे.

घरातल्या काच, मार्बल आणि पॉलिश केलेल्या फर्निचरमध्ये झाडांची हिरवळ खास उठून दिसते. इनडोअर आणि आऊटडोअरमध्ये हे एक सुंदर कनेक्शन तयार करतं. थोडक्यात सांगायचं तर, पीव्ही सिंधूचं घर म्हणजे मॉडर्न डिझाईन, ट्रॅडिशनल आर्ट, पर्सनल मेमरीज आणि निसर्गाचं एक सुंदर कॉम्बिनेशन आहे.