८५ टेस्ट, ९० वनडे आणि २० टी-२० मॅच खेळलेला भारताचा अनुभवी क्रिकेटर अजिंक्य रहाणे आता निवृत्त झाला आहे. निवृत्तीनंतर त्याला बीसीसीआयच्या सर्वोच्च पेन्शन योजनेचा लाभ मिळणार आहे.
भारताचा अनुभवी खेळाडू अजिंक्य रहाणे याने ३० जुलै रोजी आंतरराष्ट्रीय क्रिकेटमधून निवृत्ती जाहीर केली. परदेशी मैदानांवर अनेकदा संघाला तारणाऱ्या रहाणेने त्याच्या कारकिर्दीला पूर्णविराम दिला आहे. २०२०-२१ मध्ये ऑस्ट्रेलिया दौऱ्यावर विराट कोहलीच्या अनुपस्थितीत त्याने संघाचं नेतृत्व केलं होतं. त्याच्याच कॅप्टन्सीखाली भारताने ऐतिहासिक बॉर्डर-गावस्कर ट्रॉफी जिंकली होती, हे विशेष.
क्रिकेट विश्वात अत्यंत आदराने पाहिल्या जाणाऱ्या रहाणेने आता खेळ थांबवला असला तरी, त्याच्या पुढील वाटचालीसाठी बीसीसीआयकडून आर्थिक पाठबळ मिळणार आहे.
बीसीसीआयने २०२२ मध्ये निवृत्त क्रिकेटपटूंसाठीच्या पेन्शन योजनेत काही बदल केले होते. भारतासाठी ८५ टेस्ट मॅच खेळल्यामुळे रहाणे आता बीसीसीआयच्या सर्वोच्च पेन्शन श्रेणीमध्ये पात्र ठरला आहे.
Related Articles
या योजनेनुसार, त्याला दरमहा ७०,००० रुपये पेन्शन मिळेल. याआधी याच श्रेणीतील खेळाडूंना दरमहा ५०,००० रुपये मिळत होते. पण चार वर्षांपूर्वी ही रक्कम वाढवून ७०,००० रुपये करण्यात आली.
पेन्शन वाढवण्याचा हा निर्णय भारताचा माजी कर्णधार सौरव गांगुली बीसीसीआय अध्यक्ष असताना घेण्यात आला होता.
त्यावेळी सौरव गांगुली म्हणाला होता, "आपल्या माजी क्रिकेटपटूंची आर्थिक सुरक्षा सुनिश्चित करणे अत्यंत महत्त्वाचे आहे. खेळाडू हेच खेळाचा जीव की प्राण असतात. त्यांची खेळण्याची कारकीर्द संपल्यानंतरही त्यांच्या पाठीशी उभे राहणे हे बोर्डाचे कर्तव्य आहे."
रहाणेने भारतासाठी ८५ टेस्ट, ९० वनडे आणि २० टी-२० मॅचेस खेळल्या आहेत. त्याने आपल्या पुढील वाटचालीसंदर्भात अद्याप कोणतीही अधिकृत घोषणा केलेली नाही. पण, तरुण खेळाडूंना घडवण्यात आणि त्यांना मार्गदर्शन करण्यात रस असल्याचे त्याने म्हटले आहे.
एक महत्त्वाची गोष्ट म्हणजे, जोपर्यंत रहाणे बीसीसीआयमध्ये कोणतेही अधिकृत पद स्वीकारत नाही, तोपर्यंतच त्याला ही पेन्शन मिळेल. भविष्यात जर तो बीसीसीआयचा प्रशासक किंवा प्रशिक्षक म्हणून नियुक्त झाला आणि त्याला पगार मिळू लागला, तर त्या कालावधीसाठी त्याची पेन्शन तात्पुरती थांबवली जाईल.
