Abhishek Sharma : अभिषेक शर्माचा धमाका, एकाच इनिंगमध्ये मोडले ७ मोठे रेकॉर्ड्स!
भारताचा युवा ओपनर अभिषेक शर्माने आंतरराष्ट्रीय क्रिकेटमध्ये खळबळ उडवून दिली आहे. अफगाणिस्तानच्या बॉलर्सची धुलाई करत त्याने अवघ्या ३० बॉलमध्ये शतक ठोकलं आणि टी-२० क्रिकेटच्या इतिहासात नवा विक्रम रचला.
३० बॉलमध्ये रेकॉर्डब्रेक शतक
दिल्लीच्या अरुण जेटली स्टेडियमवर टीम इंडियाचा युवा ओपनर अभिषेक शर्माने अफगाणिस्तानच्या बॉलर्सना अक्षरशः रडवलं. तिसऱ्या टी-२० मॅचमध्ये त्याने चौफेर फटकेबाजी केली. अवघ्या ३० बॉलमध्ये शतक पूर्ण करत त्याने भारताकडून सर्वात वेगवान टी-२० शतक ठोकण्याचा विक्रम आपल्या नावावर केला.
या खेळीत त्याने रोहित शर्माचा नऊ वर्षांचा जुना रेकॉर्ड मोडला. एकूण ३४ बॉल खेळताना या डावखुऱ्या बॅटरने ९ फोर आणि ११ उत्तुंग सिक्सर मारत १०८ रन्स केले. शतक पूर्ण झाल्यावर त्याने पिचवर बसून 'एर्लिंग हालँड' स्टाईलने सेलिब्रेशन केलं.
रोहित शर्माचा ९ वर्षांचा रेकॉर्ड मोडला
२०१७ मध्ये इंदूरला श्रीलंकेविरुद्ध रोहित शर्माने ३५ बॉलमध्ये शतक झळकावलं होतं. अनेक भारतीय बॅटर्सनी प्रयत्न करूनही हा रेकॉर्ड अबाधित होता. पण अरुण जेटली स्टेडियमवर अभिषेक शर्माने हा रेकॉर्ड सहज मोडला. ३० बॉलमध्ये शतक पूर्ण करत त्याने टेस्ट दर्जा असलेल्या देशांविरुद्ध जगातलं सर्वात वेगवान टी-२० शतक झळकावलं. आंतरराष्ट्रीय टी-२० क्रिकेटच्या इतिहासातील हे तिसरं सर्वात वेगवान शतक ठरलं आहे.
पॉवरप्लेमध्ये वर्ल्ड रेकॉर्ड
टॉस हरून बॅटिंगला आलेल्या टीम इंडियाला अभिषेक शर्माने तुफानी सुरुवात करून दिली. पहिल्या ओव्हरपासूनच त्याने अफगाणिस्तानच्या बॉलर्सची धुलाई सुरू केली. पॉवरप्लेच्या पहिल्या ६ ओव्हर्समध्ये अभिषेकने २२ बॉलमध्ये तब्बल ७६ रन्स कुटले. यामुळे मेन्स टी-२० मध्ये पॉवरप्लेमध्ये सर्वाधिक वैयक्तिक रन्स करण्याचा वर्ल्ड रेकॉर्ड त्याच्या नावावर जमा झाला. त्याने पोर्तुगालच्या कुलदीप घोलियाचा (७४ रन्स) रेकॉर्ड मोडला. तसेच, एका कॅलेंडर वर्षात (२०२६) पॉवरप्लेमध्ये सर्वाधिक ३७ सिक्सर मारण्याचा स्वतःचाच रेकॉर्ड त्याने आणखी भक्कम केला.
२० बॉलच्या आत सहावी हाफ सेंचुरी
या इनिंगमध्ये अभिषेक शर्माने अवघ्या १६ बॉलमध्ये आपली हाफ सेंचुरी पूर्ण केली. टी-२० क्रिकेटमध्ये २० किंवा त्यापेक्षा कमी बॉलमध्ये हाफ सेंचुरी करण्याची अभिषेकची ही सहावी वेळ आहे. जगातल्या कोणत्याही बॅटरला इतक्या वेळा असा कारनामा करता आलेला नाही. याआधी न्यूझीलंडविरुद्ध १४ बॉलमध्ये फिफ्टी मारण्याचा रेकॉर्डही त्याच्याच नावावर आहे. युवराज सिंगच्या (१२ बॉल) विक्रमानंतर अभिषेकचीच बॅट आग ओकत आहे.
विराट कोहलीच्या पंक्तीत अभिषेक शर्मा
टी-२० फॉरमॅटमध्ये ओव्हरऑल अभिषेक शर्माचं हे १० वं शतक आहे. यासह टी-२० क्रिकेटमध्ये सर्वाधिक शतकं झळकावणाऱ्या विराट कोहलीच्या विक्रमाशी त्याने बरोबरी केली आहे. आणखी एक शतक मारल्यास तो कोहलीला मागे टाकून भारताकडून पहिल्या नंबरवर पोहोचेल. तसेच या तिसऱ्या टी-२० मॅचमध्ये ११ सिक्सर मारल्यामुळे या सिरीजमधील त्याच्या एकूण सिक्सरची संख्या २२ वर पोहोचली आहे. एकाच टी-२० सिरीजमध्ये सर्वाधिक सिक्सर मारण्याच्या स्वतःच्याच जुन्या रेकॉर्डची (२०२५ मध्ये इंग्लंडविरुद्ध २२ सिक्सर) त्याने बरोबरी केली आहे.
टीकाकारांना बॅटनेच दिलं सडेतोड उत्तर
या सिरीजपूर्वी सलग ७ इनिंगमध्ये रन्स न झाल्यामुळे अभिषेक शर्मा प्रचंड दबावाखाली होता. त्यातच १५ वर्षांचा वैभव सूर्यवंशी आणि संजू सॅमसन यांच्यामुळे ओपनिंगच्या जागेसाठी मोठी स्पर्धा निर्माण झाली होती. पण अफगाणिस्तानविरुद्धच्या तीन मॅचच्या सिरीजमध्ये (८२, ३९, १०८) त्याने जबरदस्त फॉर्म दाखवत आपली ताकद पुन्हा सिद्ध केली. विशेषतः तो स्पिन खेळू शकत नाही या टीकेला त्याने रशीद खान आणि मुजीबच्या बॉलिंगवर उत्तुंग सिक्सर मारून चोख उत्तर दिलं.