Maharashtra Weather Alert: महाराष्ट्रावर 'तिहेरी' संकट! पुढचे ७२ तास महत्त्वाचे; मार्चअखेर उष्णतेची लाट, वादळी पाऊस आणि गारपिटीचा इशारा

Maharashtra Weather Alert: महाराष्ट्रात उष्णतेची लाट, अवकाळी पाऊस आणि वादळी वाऱ्याचे तिहेरी संकट घोंघावत आहे. हवामान विभागाने पुढील ७२ तासांसाठी विदर्भ, कोकण, मराठवाडा यासह विविध भागांत अलर्ट जारी केला आहे. 

Image Credit : social media

महाराष्ट्रावर 'तिहेरी' संकट! पुढचे ७२ तास महत्त्वाचे

मुंबई: मार्च महिना संपता संपता महाराष्ट्राच्या हवामानात मोठी उलथापालथ पाहायला मिळत आहे. राज्यावर एकाच वेळी उष्णतेची लाट, अवकाळी पाऊस आणि वादळी वारे असे तिहेरी संकट घोंघावत आहे. हवामान विभागाने पुढील ७२ तासांसाठी राज्याच्या विविध भागांत अलर्ट जारी केला असून, नागरिकांना आणि शेतकऱ्यांना सतर्क राहण्याचे आवाहन केले आहे. 

Image Credit : Getty

विदर्भ आणि कोकणात काय स्थिती?

कोकण (मुंबईसह): मुंबई आणि कोकण किनारपट्टीवर सध्या प्रचंड उकाडा आणि दमट हवामान आहे. कमाल तापमान ३४ ते ३७ अंश सेल्सिअस दरम्यान राहण्याची शक्यता असून, २९ मार्चपासून दक्षिण कोकणात तुरळक पावसाची चिन्हे आहेत.

विदर्भ: विदर्भात पारा ४० अंशांच्या पार गेला आहे. अकोला आणि अमरावतीत प्रचंड उष्णता असून भंडारा, गोंदिया, चंद्रपूर आणि गडचिरोली जिल्ह्यांना 'यलो अलर्ट' देण्यात आला आहे. रविवारपासून संपूर्ण विदर्भात वादळी पाऊस आणि गारपिटीची शक्यता आहे. 

Image Credit : Social Media

मध्य महाराष्ट्र आणि मराठवाड्यात 'वारं फिरणार'

मध्य महाराष्ट्र (पुणे, सातारा, कोल्हापूर): आज हवामान कोरडे असले तरी ३० मार्चपासून पुन्हा वारं फिरणार आहे. ताशी ४०-५० किमी वेगाने वारे वाहून विजांच्या कडकडाटासह पावसाची शक्यता वर्तवण्यात आली आहे.

मराठवाडा: छत्रपती संभाजीनगरसह संपूर्ण मराठवाड्यात रविवारपासून वादळी पावसाचे पुनरागमन होईल. ३० ते ५० किमी वेगाचे वारे आणि विजांसह गारपीट होण्याची भीती असल्याने पिकांच्या सुरक्षिततेची काळजी घेण्याचे आवाहन करण्यात आले आहे. 

Image Credit : social media

उत्तर महाराष्ट्रात तूर्तास दिलासा, पण...

नाशिकसह उत्तर महाराष्ट्रात पुढील दोन दिवस हवामान उष्ण आणि कोरडे राहील. मात्र, ३० मार्चनंतर येथेही अवकाळी पावसाचे संकट धडकण्याची शक्यता आहे. 

Image Credit : social media

शेतकरी आणि नागरिकांसाठी महत्त्वाच्या टिप्स

१. शेतमाल सुरक्षित करा: कापणी झालेला शेतमाल सुरक्षित ठिकाणी झाकून ठेवावा.

२. विजांपासून सावधान: वादळ सुरू असताना झाडाखाली किंवा मोकळ्या मैदानात उभे राहू नका.

३. उन्हापासून बचाव: दुपारी १२ ते ४ या वेळेत काम टाळा आणि जास्तीत जास्त पाणी प्या.

मार्चअखेर होणारा हा बदल पिकांसाठी घातक ठरू शकतो, त्यामुळे हवामान खात्याच्या अपडेट्सकडे लक्ष ठेवणे गरजेचे आहे.