शिवनेरी-शिवशाहीनंतर आता ‘राजमाता जिजाऊ’ बस; एसटीचा ऐतिहासिक निर्णय, जाणून घ्या कधीपासून धावणार

महाराष्ट्र राज्य मार्ग परिवहन महामंडळाच्या (MSRTC) ताफ्यात 'राजमाता जिजाऊ' नावाची नवी, अत्याधुनिक बस दाखल होत आहे. ५५ आसनी आणि अधिक आरामदायी असलेल्या या बसेस मार्च महिन्यापासून टप्प्याटप्प्याने सेवेत येणार असून प्रवाशांना सुखकर प्रवासाचा अनुभव देतील.

Image Credit : social media

एसटीचा नवा 'रुबाब'! शिवनेरी, शिवशाहीनंतर आता धावणार 'राजमाता जिजाऊ' बस

मुंबई : महाराष्ट्रातील एसटी प्रवाशांसाठी एक दिलासादायक आणि आनंदाची बातमी समोर आली आहे. राज्य मार्ग परिवहन महामंडळाच्या (MSRTC) ताफ्यात लवकरच नव्या, अत्याधुनिक आणि अधिक आरामदायी बस दाखल होणार असून, या सेवेला ‘राजमाता जिजाऊ’ असे प्रेरणादायी नाव देण्यात आले आहे. या नव्या बससेवेमुळे प्रवाशांना प्रवासाचा नवा अनुभव मिळणार आहे. 

Image Credit : social media

एसटीच्या गौरवशाली परंपरेत नवा अध्याय

महाराष्ट्राच्या इतिहासातील थोर आणि प्रेरणादायी व्यक्तिमत्त्वांना आदरांजली वाहण्यासाठी एसटी महामंडळाने या नव्या बससेवेला राजमाता जिजाऊ असे नाव दिल्याची माहिती परिवहन मंत्री प्रताप सरनाईक यांनी दिली.

यापूर्वी शिवनेरी, शिवशाही, शिवाई, यशवंती, हिरकणी अशा नावांच्या बसेसद्वारे एसटीने इतिहास, संस्कृती आणि आधुनिकतेचा सुंदर मिलाफ साधला आहे. आता त्याच परंपरेत राजमाता जिजाऊ बसची भर पडली असून, एसटीच्या प्रवासाला नवा आयाम मिळणार आहे. 

Image Credit : our own

प्रवाशांच्या सोयींना विशेष प्राधान्य

राज्यभरातील वर्दळीच्या मार्गांवर प्रवाशांना उभ्याने प्रवास करावा लागू नये, यासाठी एसटी महामंडळाने 3×2 आसन रचनेच्या 55 आसनी अत्याधुनिक बसेस खरेदी केल्या आहेत.

या बसमध्ये प्रशस्त आणि आरामदायी आसन व्यवस्था, सुधारित अंतर्गत रचना तसेच प्रवाशांच्या सोयीसाठी आधुनिक सुविधा देण्यात आल्या आहेत. त्यामुळे लांब पल्ल्याचा प्रवास अधिक सुखकर होणार आहे. 

Image Credit : Getty

कधीपासून सुरू होणार सेवा?

नव्या राजमाता जिजाऊ बसेस मार्च महिन्यापासून टप्प्याटप्प्याने राज्यभर प्रवाशांच्या सेवेत दाखल होणार आहेत. भगव्या आणि पांढऱ्या रंगसंगतीत सजलेल्या या बस आकर्षक दिसणार असून, एसटीच्या ओळखीला नवी झळाळी देणार आहेत. एसटी महामंडळाचा हा निर्णय केवळ वाहतूक सेवेपुरता मर्यादित न राहता, महाराष्ट्राच्या इतिहासाचा आणि संस्कृतीचा गौरव करणारा ऐतिहासिक टप्पा ठरणार आहे.