Pune Electricity Bill Cut: पुणेकरांची चांदी! ऐन उन्हाळ्यात वीज बिल येणार कमी; १ एप्रिलपासून महावितरणचा मोठा दिलासा, पाहा किती होणार बचत?

Pune Electricity Bill Cut: महाराष्ट्र विद्युत नियामक आयोगाने (MERC) महावितरणच्या दर कपातीच्या प्रस्तावाला मंजुरी दिल्याने पुणेकरांना दिलासा मिळाला. १ एप्रिलपासून लागू होणाऱ्या या निर्णयामुळे घरगुती वीज दरात सरासरी ३० पैसे प्रतियुनिट कपात होणार आहे. 

Image Credit : Gemini

पुणेकरांची चांदी! ऐन उन्हाळ्यात वीज बिल येणार कमी

पुणे: कडाक्याच्या उन्हामुळे एसी आणि कुलरचा वापर वाढला असला, तरी आता पुणेकरांना वाढीव वीज बिलाचं टेन्शन घेण्याची गरज नाही. महाराष्ट्र विद्युत नियामक आयोगाने (MERC) महावितरणच्या दर कपातीच्या प्रस्तावाला मंजुरी दिली असून, १ एप्रिलपासून वीज दरात मोठी कपात लागू होणार आहे. यामुळे पुणे परिमंडळातील सुमारे ३८ लाख ग्राहकांच्या खिशाला मोठा दिलासा मिळणार आहे. 

Image Credit : Gemini

नेमकी किती होणार बचत?

नव्या निर्णयानुसार, घरगुती वीज दरांमध्ये सरासरी ३० पैसे प्रतियुनिट कपात करण्यात आली आहे. या निर्णयामुळे पुणे परिमंडळातील ग्राहकांची महिन्याकाठी तब्बल १० कोटी रुपयांची सामूहिक बचत होणार आहे. विशेष म्हणजे, ही दरवाढ कमी होण्याची प्रक्रिया केवळ यंदापुरती मर्यादित नसून, २०३० पर्यंत टप्प्याटप्प्याने दर कमी करण्याचे महावितरणचे नियोजन आहे. 

Image Credit : Gemini

वीज बिल स्वस्त होण्यामागचे कारण काय?

वीज निर्मितीसाठी लागणारा कोळसा, इंधन आणि इतर उत्पादन खर्चात घट झाल्यामुळे महावितरणसह टाटा पॉवर आणि अदानी सारख्या कंपन्यांनी दर कपातीचा प्रस्ताव मांडला होता. सरकारने या प्रस्तावावर शिक्कामोर्तब केल्याने सर्वसामान्यांना हा आर्थिक लाभ मिळत आहे. 

Image Credit : our own

वहन आकारात (Wheeling Charges) किंचित वाढ

एकीकडे मूळ वीज दरात ३० पैशांची कपात झाली असली, तरी 'वहन आकारात' मात्र १३ पैशांची वाढ झाली आहे. सध्याचा १.४७ रुपये असलेला वहन आकार आता १.६० रुपये होईल. मात्र, मूळ दरातील कपात मोठी असल्याने ग्राहकांचे एकूण बिल कमीच येणार आहे. 

Image Credit : Gemini

कोणा-कोणाला मिळणार फायदा?

पुणे शहर, आंबेगाव, राजगुरुनगर आणि हवेली या भागांतील एकूण ३८ लाख ७१ हजार ग्राहकांना याचा थेट फायदा होईल. यामध्ये प्रामुख्याने यांचा समावेश आहे:

३३.८७ लाख घरगुती ग्राहक

५७ हजार औद्योगिक ग्राहक

३.९५ लाख व्यापारी (Commercial) ग्राहक

१.०१ लाख कृषिपंप धारक

ऐन उन्हाळ्याच्या तोंडावर वीज बिल कमी होणार असल्याने पुणेकर नागरिक या निर्णयाचे उत्साहात स्वागत करत आहेत.