Prakash Deole Passes Away: शिवसेनेचे ज्येष्ठ नेते, माजी आमदार आणि 'जायंट किलर' म्हणून ओळखले जाणारे प्रकाश केशवराव देवळे यांचे वयाच्या ७७ व्या वर्षी पुण्यात निधन झाले आहे. १९९६ मध्ये विलासराव देशमुखांचा पराभव करून ते प्रसिद्धीझोतात आले होते.
पुणे: शिवसेनेचे ज्येष्ठ नेते, माजी आमदार आणि प्रति शिर्डी शिरगाव साई संस्थानचे मुख्य विश्वस्त प्रकाश केशवराव देवळे यांचं निधन झालं आहे. वयाच्या ७७व्या वर्षी त्यांनी पुण्यात अखेरचा श्वास घेतला. मंगळवारी रात्री साडे अकरा वाजता त्यांच्या निधनाची बातमी समोर आली असून, आज दुपारी वैकुंठ स्मशानभूमीत त्यांच्या पार्थिवावर अंत्यसंस्कार करण्यात येणार आहेत.
राजकीय जीवनात ‘जायंट किलर’ ठरलेले प्रकाश देवळे
प्रकाश देवळे यांनी १९९६ च्या विधान परिषदेच्या निवडणुकीत तत्कालीन काँग्रेसचे दिग्गज नेते विलासराव देशमुख यांचा अर्ध्या मताने पराभव करून महाराष्ट्राच्या राजकारणात खळबळ उडवून दिली होती.
१९९५ साली राज्यात युतीचं सरकार सत्तेवर आलं होतं. त्यानंतर वर्षभरात विधान परिषदेची निवडणूक झाली. काँग्रेसने विलासराव देशमुख यांना उमेदवारी नाकारल्याने त्यांनी अपक्ष म्हणून रिंगणात उतरण्याचा निर्णय घेतला. दुसरीकडे, शिवसेनेनं प्रकाश देवळे आणि रवींद्र मिर्लेकर यांना तिकीट दिलं.
Related Articles
देशमुख यांनी शिवसेनेची पाठिंबा मिळवण्याचा प्रयत्न केला. दुसऱ्या पसंतीची मतं त्यांच्याच बाजूने पडतील, असं वातावरण तयार झालं होतं. मात्र, शेवटच्या क्षणी निकाल वेगळाच लागला. शेवटच्या फेरीत अर्ध्या मताने प्रकाश देवळे विजयी झाले, आणि विलासराव देशमुख यांना ऐतिहासिक पराभव स्वीकारावा लागला.
राजकारणासोबतच समाजसेवा, कला आणि शिक्षण क्षेत्रातही अमूल्य योगदान
प्रकाश देवळे केवळ राजकारणी नव्हते, तर ते समाजसेवक, उद्योजक, कलावंत आणि शिक्षण क्षेत्रातील कार्यकर्ते देखील होते.
२००१ मध्ये त्यांनी शिरगाव येथे “प्रति शिर्डी” साई मंदिराची स्थापना केली, जे आज एक श्रद्धास्थळ म्हणून ओळखलं जातं.
पुणे शिवसेनेचे जिल्हाप्रमुख म्हणून त्यांनी संघटनेच्या बांधणीसाठी काम केलं.
बांधकाम व्यावसायिक आणि ऑर्केस्ट्रा कलाकार म्हणूनही त्यांची स्वतंत्र ओळख होती.
त्यांनी ‘मायेची सावली’ नावाचा मराठी चित्रपटही निर्माण केला होता, ज्याचे दिग्दर्शन आणि संगीत दोन्ही त्यांनीच केलं होतं.
शिक्षण क्षेत्रात विशेष कामगिरी
कलायात्री शिक्षण संस्थेच्या माध्यमातून त्यांनी भटक्या आणि विमुक्त जातीतील विद्यार्थ्यांना मुख्य प्रवाहात आणण्याचं मोलाचं काम केलं. त्यांच्या या कार्यामुळे शेकडो विद्यार्थ्यांचे जीवन बदलले.
सन्मान आणि पुरस्कार
प्रकाश देवळे यांना नामदेव शिंपी समाजातर्फे ‘समाजभूषण’ पुरस्कार देण्यात आला होता. या सन्मानप्रसंगी मंत्री चंद्रकांत पाटील यांच्या हस्ते त्यांचा सत्कार करण्यात आला होता.
शेवटचा निरोप
माजी आमदार, समाजसेवक आणि एक कलावंत अशी बहुआयामी ओळख असलेले प्रकाश देवळे यांचं जाणं ही एक मोठी हानी आहे. त्यांच्या कार्याने असंख्य लोकांना प्रेरणा दिली. आज त्यांचं पार्थिव पुण्यातील वैकुंठ स्मशानभूमीत अंत्यसंस्कारासाठी नेलं जाणार आहे.
