Maharashtra Rain Alert : महाराष्ट्रासह अनेक राज्यांत पुन्हा पावसाचा इशारा; थंडीचा जोरही वाढणार

Maharashtra Rain Alert : राज्यात थंडीची चाहूल लागली असली तरी पावसाचे ढग अजूनही गेलेले नाहीत. भारतीय हवामान विभागाने (IMD) पुढील 24 तासांत दक्षिण आणि उत्तर भारतातील अनेक राज्यांत पावसाचा आणि वादळाचा इशारा दिला आहे. 

Image Credit : stockPhoto

राज्यात थंडीची चाहूल, पण पावसाची साथ कायम

राज्यात गेल्या काही दिवसांपासून पहाटेच्या वेळी गारवा जाणवू लागला आहे. दरवर्षीच्या तुलनेत यंदा थंडी थोडी उशिराने सुरू झाली. दिवाळीच्या काळात झालेल्या अकस्मात पावसामुळे थंडीचा जोर कमी झाला होता. मात्र, आता हवामानात गारवा परत आला आहे. तथापि, हवामान विभागाच्या अंदाजानुसार राज्यातील काही भागांत अजूनही हलक्या पावसाची शक्यता आहे. त्यामुळे नागरिकांना थंडीबरोबरच पावसाची चाहूलही जाणवू शकते.

Image Credit : social media

‘मोंथा’ चक्रीवादळाचा परिणाम कायम

मॉन्सून अधिकृतपणे मागे सरकल्यानंतरही राज्यात गेल्या काही दिवसांपासून ‘मोंथा’ चक्रीवादळामुळे पाऊस सुरू आहे. या वादळाने तामिळनाडू आणि आंध्र प्रदेशाला सर्वाधिक फटका बसला असला, तरी महाराष्ट्रातील अनेक भागांमध्येही जोरदार पावसाने हजेरी लावली. या पावसामुळे शेतकऱ्यांचे मोठे नुकसान झाले आहे. अनेक ठिकाणी शेतातील माती आणि पिकांचे नुकसान झाल्याची माहिती समोर आली आहे. हवामान खात्याने पुढील काही दिवस पावसाचे ढग राहतील, असा अंदाज वर्तवला आहे.

Image Credit : Getty

पुढील २४ तासांत चार ते पाच राज्यांत मुसळधार पावसाचा इशारा

भारतीय हवामान विभागानुसार, बंगालच्या उपसागरात नव्याने चक्रीवादळ निर्माण होत आहे. यामुळे पुढील २४ तासांत आंध्र प्रदेश, केरळ, तामिळनाडू, कर्नाटक आणि ईशान्य भारतात जोरदार पावसाची शक्यता आहे. विशेषतः केरळमध्ये १० नोव्हेंबरपर्यंत वादळासह मुसळधार पाऊस होईल, असा इशारा देण्यात आला आहे. काही ठिकाणी वादळ, गडगडाट आणि विजांच्या कडकडाटासह मुसळधार पाऊस पडू शकतो.

Image Credit : Asianet News

हवामानात बदल, थंडीचा जोर वाढण्याचे संकेत

महाराष्ट्रासह उत्तर भारतात तापमानात चढ-उतार होण्याची शक्यता हवामान विभागाने व्यक्त केली आहे. राज्यातील काही दुरवरच्या भागात थोड्या प्रमाणात पाऊस होऊ शकतो, मात्र थंडी वाढण्याची शक्यता अधिक आहे. बंगालच्या उपसागरात आणि अरबी समुद्रात चक्राकार वारे वाहत असल्याने दक्षिण भारतातील हवामान बदलत आहे. तर हिमाचल प्रदेश, उत्तराखंड आणि जम्मू-कश्मीरमध्ये पावसानंतर आता गारठा वाढेल, असा अंदाज वर्तवला गेला आहे.

Image Credit : iSTOCK

IMDचा इशारा – उत्तर भारतात थंडीचा कहर वाढणार

भारतीय हवामान विभागाने हरियाणा, पंजाब, राजस्थान, दिल्ली, बिहार आणि उत्तर प्रदेश या राज्यांमध्ये पर्वतीय वाऱ्यांचा परिणाम वाढणार असल्याचे सांगितले आहे. त्यामुळे शनिवार आणि रविवारपासून थंडीचा जोर अधिक जाणवेल. त्याचवेळी, दक्षिणेकडील राज्यांमध्ये पावसाचा धोका कायम राहील. म्हणजेच, एकीकडे दक्षिण भारतात वादळी पाऊस आणि दुसरीकडे उत्तर भारतात हिवाळ्याची झळ — असे दुहेरी हवामान देशात पाहायला मिळणार आहे.