महाराष्ट्रातील पशुपालकांसाठी आनंदाची बातमी, सरकार देणार गायी-म्हशींच्या खरेदीसाठी अनुदान!

महाराष्ट्र सरकारने पशुपालकांना गायी, म्हशी खरेदीसाठी अनुदान देण्याची नवी योजना जाहीर केली. या योजनेअंतर्गत, सामान्य शेतकऱ्यांना ५०% तर अनुसूचित जाती-जमातींना ७५% अनुदान मिळेल. यासोबतच जनावरांच्या संगोपनाचे प्रशिक्षण, पशुवैद्यकीय सेवाही दिल्या जातील.

Image Credit : Freepik@shahingraphics

मुंबई : महाराष्ट्रामध्ये पशुपालन व्यवसायाला आता कृषी व्यवसायाचा दर्जा मिळाल्यामुळे हा व्यवसाय केवळ दुय्यम न राहता उत्पन्नाचा एक महत्त्वाचा स्त्रोत बनला आहे. याच अनुषंगाने, राज्य सरकारने पशुपालकांना आर्थिक आधार देण्यासाठी एक नवीन योजना आणली आहे. या योजनेअंतर्गत, पशुसंवर्धन विभागाकडून गायी आणि म्हशी खरेदी करण्यासाठी अनुदान दिले जाणार आहे.

या योजनेचा मुख्य उद्देश दुग्धव्यवसाय सुरू करू इच्छिणाऱ्या शेतकऱ्यांसाठी आर्थिक मदत करणे आहे. या मदतीसोबतच शेतकऱ्यांना जनावरांच्या संगोपनाचे प्रशिक्षण आणि पशुवैद्यकीय सेवा देखील दिली जाईल.

Image Credit : our own

अनुदानाची रक्कम

या योजनेत, सामान्य शेतकऱ्यांना दोन देशी/संकरित गायींसाठी ७८,४२५ रुपये (५०%) आणि दोन म्हशींसाठी ८९,६२९ रुपये (५०%) अनुदान मिळेल.

Image Credit : our own

अनुसूचित जाती-जमातींसाठी

या प्रवर्गातील शेतकऱ्यांसाठी अधिक अनुदान देण्यात आले आहे.

दोन गायींसाठी: १,१७,६३८ रुपये (७५%)

दोन म्हशींसाठी: १,३४,४४३ रुपये (७५%)

शेतकऱ्याला उर्वरित रक्कम भरावी लागेल. जर कर्ज घ्यायचे असेल, तर सामान्य शेतकऱ्याला पूर्ण ५०% रक्कम स्वतः भरावी लागेल, तर अनुसूचित जाती-जमातीच्या शेतकऱ्यांसाठी फक्त २५% रक्कम भरणे आवश्यक आहे.

Image Credit : our own

योजनेच्या अटी आणि नियम

लाभार्थींच्या निवडीत ३०% महिला आणि ३% दिव्यांगांना प्राधान्य दिले जाईल.

एका कुटुंबातून फक्त एकाच व्यक्तीला या योजनेचा लाभ घेता येईल.

निवड झाल्यानंतर, लाभार्थ्याला एका महिन्याच्या आत स्वतःचा हिस्सा भरावा लागेल.

या योजनेचा लाभ घेतल्यानंतर किमान ३ वर्षे दुग्धव्यवसाय करणे बंधनकारक आहे.

जनावरांसाठी योग्य जागा, गोठा, चारा आणि पाण्याची व्यवस्था असणे आवश्यक आहे.

दुग्धव्यवसाय आणि पशुपालनाचे प्रशिक्षण घेणे गरजेचे आहे.

जनावरांची खरेदी फक्त सरकार-मान्यताप्राप्त किंवा पशुसंवर्धन विभागाने अधिकृत केलेल्या केंद्रातून करावी लागेल.

Image Credit : our own

आवश्यक कागदपत्रे

आधार कार्ड आणि रहिवासी प्रमाणपत्र

बँक पासबुकची प्रत

ओळखपत्राची प्रत

७/१२ आणि ८अ उतारा

अपत्य दाखला किंवा स्व-घोषणापत्र

रेशन कार्ड किंवा कुटुंब प्रमाणपत्र

जातीचा दाखला (आवश्यक असल्यास)

दारिद्र्यरेषेखालील प्रमाणपत्र (आवश्यक असल्यास)

दिव्यांग प्रमाणपत्र (आवश्यक असल्यास)

बचत गट सदस्य असल्यास त्याचे प्रमाणपत्र

Image Credit : our own

अर्ज कसा कराल?

या योजनेसाठी अर्ज करण्यासाठी तुम्ही Google Play Store वरून AH-MAHABMS हे ॲप डाउनलोड करू शकता. तसेच, तालुका पशुसंवर्धन कार्यालयातूनही अर्ज उपलब्ध आहे. सर्व आवश्यक कागदपत्रांसह अर्ज जमा केल्यानंतर त्याची पडताळणी केली जाईल आणि निवड झाल्यावर अनुदान मंजूर केले जाईल. अधिक माहितीसाठी, तुम्ही तालुका पशुसंवर्धन अधिकारी कार्यालय किंवा जिल्हा पशुसंवर्धन उपसंचालक कार्यालयाशी संपर्क साधू शकता.