तुम्ही एक वेळचं जेवण टाळता, तेव्हा शरीराला आवश्यक असणारे पोषक घटक मिळणं बंद होतं. यात प्रोटीन, हेल्दी फॅट्स, कार्बोहायड्रेट्स आणि फायबरचा समावेश असतो. यामुळे पुढे जाऊन मोठी समस्या निर्माण होऊ शकते, असा इशारा तज्ज्ञांनी दिलाय.
मुंबई : वजन कमी करण्यासाठी अनेक जण जेवण पूर्णपणे सोडून देतात. पण, याचा उलटा परिणाम होऊ शकतो, असं आहारतज्ज्ञ अंजली मुखर्जी यांनी सांगितलंय. तुम्ही सतत जेवण टाळत असाल, तर नंतर तुम्हाला खूप जास्त भूक लागते. रात्रीच्या जेवणाच्या वेळेपर्यंत तुम्हाला नेहमीपेक्षा जास्त भूक लागते आणि तुम्ही गरजेपेक्षा जास्त जेवता.
एक वेळचं जेवण चुकलं तर नेमकं काय होतं? इथे आपण 'इंटरमिटेंट फास्टिंग' (intermittent fasting) बद्दल बोलत नाहीयोत. कामाच्या गडबडीत किंवा मीटिंग्समध्ये अडकल्यामुळे जेवायला वेळ न मिळणं आणि दुपारच्या जेवणाऐवजी फक्त एक कप कॉफी पिऊन काम चालवणं, या परिस्थितीबद्दल आपण बोलतोय, असं अंजली यांनी स्पष्ट केलं.
तुम्ही एक वेळचं जेवण टाळता, तेव्हा शरीराला आवश्यक असणारे पोषक घटक मिळण्याची संधी हुकते. यात प्रोटीन, हेल्दी फॅट्स, कार्बोहायड्रेट्स आणि फायबरचा समावेश असतो. यातून पुढे मोठी समस्या निर्माण होऊ शकते, असं त्या म्हणतात. जेव्हा तुम्हाला खूप कडाडून भूक लागते, तेव्हा पुढच्या वेळी तुम्ही जास्त प्रमाणात जेवण्याची शक्यता असते.
Related Articles
मग अशा वेळी तुम्ही साधारणपणे काय खाता? तुम्ही कार्बोहायड्रेट्स जास्त खाता; कारण त्यामुळेच तुम्हाला समाधान मिळतं. रात्रीच्या जेवणात तुम्ही भात, चपाती, पास्ता, नूडल्स किंवा तुमच्या आवडीचा कोणताही पदार्थ जास्त प्रमाणात खाऊ शकता. यामुळे तुमचं वजन वाढू शकतं, असं त्यांनी सांगितलं. फक्त एक वेळचं जेवण टाळणं हा वजन कमी करण्याचा सोपा मार्ग अजिबात समजू नका, असा सल्लाही त्यांनी दिलाय.
एक वेळचं जेवण टाळणं म्हणजे वजन कमी करणं नव्हे. खरं तर यामुळे तुमचं वजन वाढण्याची आणि शरीरात पोषक तत्वांची कमतरता निर्माण होण्याची शक्यता जास्त असते, असं अंजली यांनी सांगितलं.
