Gold Exchange Offer: जुनं सोनं द्या, नवे दागिने घ्या! जुन्यालाही पूर्ण किंमत
तुमच्याकडेही जुने, तुटके किंवा आउटडेटेड डिझाइनचे दागिने कपाटात पडून आहेत का? मग आता ते बाहेर काढण्याची वेळ आली आहे. देशातील मोठे ज्वेलरी ब्रँड्स एक खास ऑफर घेऊन आले आहेत, ज्यात तुमच्या जुन्या सोन्याची एक रुपयाही न कापता पूर्ण किंमत मिळेल.
ओल्ड गोल्ड एक्सचेंज स्कीम का आली?
पंतप्रधान नरेंद्र मोदींनी नुकतंच देशवासियांना एक खास आवाहन केलं होतं. त्यांनी सांगितलं की, किमान एक वर्ष नवीन सोनं खरेदी करणं टाळा. यामागे उद्देश होता की, परदेशातून सोनं आयात करण्यासाठी लागणारा देशाचा पैसा (परकीय चलन) वाचवता येईल. पण, लग्न आणि सणांच्या या देशात सोन्याशिवाय कसं चालणार? याच समस्येवर तोडगा म्हणून देशातील मोठ्या ज्वेलर्सनी 'गोल्ड एक्सचेंज'चा मार्ग काढला आहे. यामुळे देशाचा पैसाही वाचेल आणि तुमची हौसही पूर्ण होईल.
ओल्ड गोल्ड एक्सचेंज स्कीम म्हणजे काय?
या स्कीममध्ये तुमचे जुने दागिने घेतले जातात. त्यांचं वजन आणि शुद्धता तपासली जाते, आणि मग त्याच किमतीचे नवीन दागिने तुम्हाला दिले जातात. म्हणजेच, जुनी चेन, तुटलेली अंगठी, जुन्या डिझाइनचा हार किंवा वापरत नसलेले कंगण आता नव्या फॅशनच्या दागिन्यांमध्ये बदलता येतील.
कुठल्याही दुकानातून घेतलेलं सोनं असो, इथे मिळेल पूर्ण भाव
देशातील सर्वात विश्वासार्ह ब्रँडपैकी एक असलेल्या तनिष्कने (Tanishq) 'ओल्ड गोल्ड न्यू इंडिया' नावाची मोहीम सुरू केली आहे. यानुसार, तुम्ही तुमचं जुनं सोनं कोणत्याही तनिष्क शोरूममध्ये घेऊन जाऊ शकता, मग ते तुम्ही कुठूनही खरेदी केलेलं असो. विशेष म्हणजे, तुमचं सोनं अगदी 9 कॅरेट शुद्धतेचं असलं तरी, तनिष्क ते स्वीकारत आहे. कंपनीने जाहीर केलं आहे की, जुन्या सोन्याच्या बदल्यात नवीन दागिने घेतल्यास ते कोणतीही कपात (Depreciation) करणार नाहीत. म्हणजेच, तुम्हाला तुमच्या जुन्या सोन्याचा पूर्ण भाव मिळेल.
Kalyan Jewellers ची धांसू ऑफर
कल्याण ज्वेलर्सनेही 'नेशन फर्स्ट- गोल्ड4इंडिया' (Nation First- Gold4India) नावाचा एक मोठा कार्यक्रम सुरू केला आहे. त्यांच्या ऑफरनुसार, तुमच्याकडे जुने, न वापरलेले किंवा तुटलेले दागिने असतील, तर तुम्ही त्यांच्या 342 हून अधिक स्टोअर्समध्ये जाऊन ते बदलू शकता. कंपनी आता 18 कॅरेट (18kt) वजनाने हलके दागिने आणि गोल्ड मॉनेटायझेशनवर लक्ष केंद्रित करत आहे, जेणेकरून तुम्हाला कमी सोन्यात अधिक सुंदर आणि मॉडर्न डिझाइन मिळू शकतील. या योजनेचा उद्देश नवीन सोन्याची आयात (Import) कमी करणे आणि घरात पडून असलेल्या सोन्याचा पुनर्वापर (Recycle) करणे हा आहे.
गोल्डच्या या स्कीम्सचा तुम्हाला काय फायदा होईल?
- अनेक घरांमध्ये वर्षांनुवर्षे जुन्या आणि जड डिझाइनचे दागिने पडून असतात, जे आजची पिढी घालण्यास पसंत करत नाही. आता ते मॉडर्न डिझाइनमध्ये बदलता येतील.
- सोन्याचे दर सतत वाढत आहेत. अशा परिस्थितीत, जुनं सोनं एक्सचेंज करणं खिशाला परवडणारं ठरू शकतं.
- तुटलेली चेन, एकच कानातलं किंवा जुनी अंगठी आता वाया जाणार नाही.
- सरकारने सोन्यावरील आयात शुल्क (Import Duty) वाढवलं आहे. त्यामुळे नवीन दागिने महाग पडू शकतात. एक्सचेंज स्कीम यात दिलासा देऊ शकते.
गोल्ड एक्सचेंज करण्यापूर्वी या गोष्टी लक्षात ठेवा
- हॉलमार्क (Hallmark) नक्की तपासा. सोन्याची शुद्धता सर्वात महत्त्वाची असते.
- घडणावळ (मेकिंग चार्जेस) समजून घ्या. काही कंपन्या पूर्ण सूट देतात, तर काही वेगळे शुल्क आकारू शकतात.
- प्रत्येक स्कीमचे नियम वेगळे असू शकतात, त्यामुळे अटी आणि शर्ती (Terms & Conditions) नक्की वाचा.
- सोन्याची शुद्धता शोरूममध्येच तपासा.
Disclaimer: हा लेख केवळ सामान्य माहितीसाठी आहे. वेगवेगळे ज्वेलरी शोरूम, शहर, सोन्याची शुद्धता (Purity), हॉलमार्क आणि ऑफरच्या अटींनुसार एक्सचेंज व्हॅल्यू, कपात, मेकिंग चार्ज आणि फायदे वेगवेगळे असू शकतात. कोणत्याही योजनेचा लाभ घेण्यापूर्वी संबंधित शोरूममधून संपूर्ण माहिती, नियम आणि अटी नक्की तपासा. सोन्याच्या किमती वेळोवेळी बदलत असतात.
