रोज घर स्वच्छ करूनही कोपऱ्यांमध्ये जळमटं आणि धूळ साचतेय का? काळजी करू नका, काही सोप्या ट्रिक्स वापरून तुम्ही घराला धूळ आणि जळमटांपासून कायमचं दूर ठेवू शकता.
मुंबई : घर लहान असो वा मोठं, ते स्वच्छ ठेवणं हे एक मोठं काम असतं. धूळ, कीटक आणि कोळ्याची जळमटं यांसारख्या समस्या नेहमीच डोकं वर काढतात. रोज वेगवेगळ्या क्लिनर्सचा वापर करूनही ही समस्या संपत नाही, अशी अनेकांची तक्रार असते. पण यावर एक सोपा उपाय आहे. यामुळे घर तर स्वच्छ राहीलच, शिवाय जळमटं आणि धूळही गायब होईल. याचा फायदा तुमच्या आरोग्यालाही होईल.
घरात हवा आणि सूर्यप्रकाश येऊ द्या
घरात धूळ साचणं आणि जळमटं तयार होणं ही खूप सामान्य गोष्ट आहे. पण थोडी काळजी घेतली तर या समस्येपासून सुटका मिळू शकते. बाहेरून येणारी धूळ घरातील फर्निचर आणि इतर वस्तूंवर साचते. याशिवाय, बारीक आणि डोळ्यांना न दिसणारे कीटक घरात शिरतात. त्यांची शिकार करण्यासाठी कोळी घरात येतात आणि जळमटं तयार करतात. हे टाळण्यासाठी घरात भरपूर हवा आणि सूर्यप्रकाश येईल याची काळजी घ्या. घरातील सर्व खोल्यांमध्ये पुरेसा सूर्यप्रकाश पोहोचला, तर तुमची निम्मी समस्या तिथेच सुटेल.
सर्वात आधी धूळ झटकून घ्या
घरात धूळ साचणार नाही, याकडे लक्ष देणं गरजेचं आहे. घरातील पंखे, भिंती आणि छताला चिकटलेली धूळ आधी साफ करा. त्यानंतर टीपॉय, टेबल, फरशी आणि घराचा कोपरा न् कोपरा स्वच्छ करा. साफसफाई करताना मायक्रोफायबर कापडाचा वापर करणं कधीही चांगलं. हे कापड थोडं ओलसर करून पुसल्यास घर एकदम चकाचक होईल.
Related Articles
घरात अनावश्यक वस्तूंची गर्दी करू नका
घरात आधीच असलेल्या कीटकांच्या शोधात कोळी आणि इतर कीटक घरात शिरतात. हे कीटक रोज जाळी विणून आपली शिकार पकडतात. त्यामुळे कीटकांना घरात येण्यापासून रोखणं महत्त्वाचं आहे. घरात अनावश्यक वस्तू साठवून ठेवणं टाळा. प्रत्येक खोलीत सामानाची गर्दी करू नका. घरात हवा खेळती राहील आणि भरपूर मोकळी जागा असेल, याची काळजी घ्या.
व्हिनेगर आणि इतर नैसर्गिक वस्तूंचा वापर करा
एका स्प्रे बॉटलमध्ये साधं पाणी आणि व्हिनेगर समप्रमाणात मिसळा. हे मिश्रण घराच्या प्रत्येक कोपऱ्यात फवारा. व्हिनेगरच्या वासाने जळमटं दूर राहतात. याशिवाय, पाण्यात पेपरमिंट इसेन्शियल ऑइल मिसळून फवारल्यास जळमटं तयार होण्याचं प्रमाण कमी होतं. लवंगाचं तेल आणि लिंबूवर्गीय फळांच्या सालीच्या वासानेही कोळी घरापासून दूर पळतात.
