Cloth Dry Hacks : थंडीत कपडे वाळले जात नाहीत? वापरा या ट्रिक्स
Cloth Dry Hacks : थंडीत कपडे वाळायला वेळ लागतो कारण तापमान कमी आणि आर्द्रता जास्त असते. पण काही सोप्या ट्रिक्स वापरल्यास ही समस्या सहज कमी करता येते.
थंडीत कपडे कसे वाळवावे?
थंडीत कपडे वाळत नाहीत ही प्रत्येक घरातील सामान्य समस्या. तापमान कमी झाल्याने हवेतील आर्द्रता वाढते, वारंवार धुके पडते आणि सूर्यप्रकाशही कमी मिळतो. त्यामुळे धुतलेले कपडे दिवसभर ओलसर राहतात, त्यांना वासही येऊ शकतो. अशावेळी काही सोप्या आणि घरच्या घरी करता येण्यासारख्या ट्रिक्स वापरल्यास कपडे लवकर आणि नीट सुकण्यास मदत होते. खाली दिलेल्या उपायांमुळे तुम्ही थंडीतही कपडे कोरडे ठेवू शकता.
घरात हवा खेळती ठेवून ड्राय रॅकचा वापर
थंडीमध्ये घरातच कपडे वाळवणे हा उत्तम उपाय आहे. यासाठी खिडक्या आणि दरवाजे थोडावेळ उघडे ठेवा, ज्यामुळे हवा खेळती राहील आणि कपडे लवकर सुकतील. ड्राय रॅक किंवा स्टँड वापरल्यास कपडे एकमेकांवर न ठेवता व्यवस्थित पसरवता येतात. ज्या कपड्यांची जाडी जास्त असते त्यांना थोडे अंतर ठेवून लटकवा, यामुळे हवेचा प्रवाह वाढतो आणि ओलावा पटकन कमी होतो.
स्पिन ड्रायरचा वापर व मशीनमध्ये हाई स्पिन मोड
कपडे धुताना मशीनमधील ‘हाय स्पिन मोड’ वापरल्यास कपड्यांतील पाणी जवळपास 70-80% निघून जाते. अशा अर्धवट कोरड्या कपड्यांना थंडीतही कमी वेळ लागतो. स्पिन ड्रायर वापरणेही उत्तम पर्याय आहे. जाड कपडे, जसे की जीन्स, हुडीज किंवा ब्लँकेट, या कपड्यांना मशीनमध्ये जास्त स्पिन दिल्यास वाळण्याची प्रक्रिया निम्म्यावर येते.
पंखा आणि रूम हीटरची स्मार्ट ट्रिक
थंडीमध्ये पंखा कमी वापरला जातो, पण कपडे वाळवण्यासाठी तो खूप उपयोगी ठरतो. ड्राय रॅक समोर पंखा सुरू ठेवा. हवा फिरल्यामुळे कपडे लवकर कोरडे होतात. रूम हीटर वापरत असल्यास कपडे थेट हीटरजवळ ठेवू नका; तापमान जास्त झाल्यास कपड्यांचे तंतू खराब होऊ शकतात. त्याऐवजी दूरून हलकी गरमी मिळेल अशा जागी ठेवून वाळवा.
कपडे उलटे करून वाळवणे आणि योग्य जागा निवडणे
थंडीत जेवढा प्रकाश मिळतो त्या भागातच कपडे ठेवले तर ते लवकर वाळतात. कपडे उलटे करून (inside-out) वाळवल्यास बाहेरील धूळ कमी चिकटते आणि वाळण्याची प्रक्रिया समान होते. टॉप फ्लोर, बाल्कनी किंवा घराच्या एखाद्या उन्हाळ्या कोपऱ्यात ड्राय रॅक ठेवणे फायदेशीर ठरते.
टॉवेल रोल ट्रिक – कपड्यातील पाणी कमी करा
कपड्यातील जास्त ओलावा कमी करण्यासाठी ‘टॉवेल रोल ट्रिक’ अतिशय फायदेशीर आहे. एका मोठ्या, कोरड्या टॉवेलमध्ये ओले कपडे गुंडाळा आणि थोडंसं दाबा. टॉवेल ओलावा शोषून घेते आणि कपडे अर्धवट कोरडे होतात. ही ट्रिक स्वेटर्स, वूलन कपडे आणि जाड फॅब्रिकसाठी खूप उपयुक्त आहे.
