- Home
- lifestyle
- Dmart Shopping : डीमार्टमध्ये किराणा भरताय? या वस्तू चुकूनही बल्कमध्ये घेऊ नका, पैसे पाण्यात जातील
Dmart Shopping : डीमार्टमध्ये किराणा भरताय? या वस्तू चुकूनही बल्कमध्ये घेऊ नका, पैसे पाण्यात जातील
डीमार्टमध्ये महिन्याचा किराणा भरताना तुम्हीही ऑफर्सच्या नादात वस्तू बल्कमध्ये घेताय का? ही चूक तुम्हाला महागात पडू शकते. कोणत्या वस्तू जास्त प्रमाणात खरेदी करू नयेत, ते नक्की जाणून घ्या.
डीमार्ट शॉपिंग
आजकाल महिन्याचा किराणा भरायचा म्हणजे बहुतेकांची पावले डीमार्ट किंवा सुपर मार्केटकडे वळतात. तिथे नेहमी कोणत्या ना कोणत्या ऑफर्स सुरूच असतात. '२० टक्के सूट', 'बाय १ गेट १ फ्री' असे बोर्ड आपल्याला भुरळ घालतात. पैसे वाचतील या विचाराने अनेकजण गरजेपेक्षा जास्त वस्तू किलो-किलोने आणि डझनाने खरेदी करतात. वारंवार दुकानात जाण्याचा त्रास वाचेल आणि स्वस्तात मिळेल म्हणून लोक बल्कमध्ये खरेदी करतात. पण काही वस्तू अशा प्रकारे जास्त प्रमाणात कधीच घेऊ नयेत. यामुळे पैसे वाचण्याऐवजी वस्तू खराब होऊन त्या कचऱ्यात फेकून देण्याची वेळ येते.
ताज्या वस्तू आणि मसाले
आरोग्यासाठी फळे, दूध आणि भाज्या खाणे चांगलेच आहे. पण या वस्तू बल्कमध्ये अजिबात घेऊ नका. स्वस्त मिळतायत म्हणून सफरचंद, टोमॅटो, दूध आणि दह्याच्या मोठ्या पिशव्या भरून आणल्या, तर त्या लवकर खराब होतात. या वस्तूंचा टिकाऊपणा कमी असतो. त्यामुळे जेवढी गरज आहे तेवढेच आणा आणि संपल्यावर पुन्हा ताजे आणा.
भारतीय जेवणात मसाल्यांना खूप महत्त्व आहे. पण मसाल्यांनाही एक्सपायरी डेट असते. ते जास्त प्रमाणात आणून डब्यात भरून ठेवण्यात काहीच अर्थ नाही. योग्य प्रकारे साठवले नाही, तर मसाल्यांची चव आणि सुगंध निघून जातो. त्यामुळे मसालेही जास्त प्रमाणात खरेदी करू नका.
खाद्यतेल आणि अंडी
खाद्यतेल बल्कमध्ये आणून साठवणे योग्य नाही. वेळेनुसार सर्व प्रकारची तेले खराब होतात. तुमच्या घरातील तेल खराब झाले आहे की नाही हे तपासण्यासाठी, एका चमच्यात तेल घ्या आणि त्याचा वास घ्या. जर त्यातून धातूचा (मेटल) किंवा क्रेयॉन्ससारखा वास येत असेल, तर ते खराब झाले आहे असे समजा. म्हणूनच तेल नेहमी छोट्या पॅकेटमध्ये खरेदी करणे फायद्याचे ठरते.
पोषक तत्वांनी भरपूर असलेली अंडी साधारणपणे स्वस्त मिळतात. ट्रेच्या हिशोबाने घेतल्यास ती आणखी स्वस्त पडतात. पण अंडीही लवकर खराब होतात. 'Ask USDA' च्या अधिकृत माहितीनुसार, फ्रिजमध्ये ठेवलेली अंडी जास्तीत जास्त ५ आठवडेच ताजी राहतात. त्यामुळे ऑफर आहे म्हणून डझनावारी अंडी आणून फ्रिजमध्ये भरणे चुकीचे आहे.
कोल्ड ड्रिंक्स आणि पीठ
मोठ्या सुपर मार्केट्समध्ये कोल्ड ड्रिंक्सवर नेहमी "बाय १ गेट १" ऑफर्स दिसतात. पण हे बल्कमध्ये खरेदी करून काहीच उपयोग नसतो. कोल्ड ड्रिंक्समधील गॅस (Fizz) आणि ताजी चव टिकवून ठेवण्यासाठी ते नेहमी थंड जागी ठेवावे लागतात. जास्त बाटल्या आणल्या तर फ्रिजमध्ये जागा पुरत नाही आणि ते लवकर पिऊन संपवण्याचे दडपण येते.
आपण घरात गव्हाचे पीठ जेवढे वापरतो, तेवढे मक्याचे किंवा तांदळाचे पीठ वापरत नाही. ही पिठे हवेतील ओलावा लवकर शोषून घेतात आणि त्यांना बुरशी लागते किंवा वास येतो. तुम्ही हे फ्रिजमध्ये ठेवू शकता, पण बल्कमध्ये आणले तर फ्रिज याच वस्तूंनी भरून जाईल. म्हणूनच, ऑफर्सच्या मोहात पडून खरेदी करण्यापूर्वी, आपण त्या वस्तू किती दिवसांत वापरू शकतो याचा विचार करणे खूप गरजेचे आहे.
