Dong Village Sunrise : भारतात सर्वात आधी सूर्योदय कुठे होतो? जाणून घ्या या खास गावाबद्दल
भारतात सर्वात आधी सूर्योदय कुठे होतो, असा प्रश्न तुम्हाला कधी पडलाय का? अरुणाचल प्रदेशातील 'डोंग' हे देशातील सर्वात पूर्वेकडील गाव आहे, जिथे सर्वात आधी सूर्याची किरणं पडतात. जाणून घेऊया या गावाबद्दल.

सर्वात आधी सूर्यकिरणं अनुभवणारं गाव
या गावात सूर्याची पहिली किरणं जमिनीवर पडताच लख्ख प्रकाश पडतो. अनेक पर्यटक हे दृश्य पाहण्यासाठी मध्यरात्रीच उठून ट्रेकिंग करतात. इथला सूर्योदय खरोखरच मंत्रमुग्ध करणारा असतो. चला तर मग, या गावाबद्दल अधिक माहिती घेऊया.

एक अनोखं गाव
अरुणाचल प्रदेशातील अंजाव जिल्ह्यात, लोहित नदीच्या काठावर वसलेलं 'डोंग व्हॅली' हे गाव भारतातील पहिल्या सूर्योदयाचं ठिकाण म्हणून ओळखलं जातं. चीन-म्यानमार सीमेजवळील हे छोटंसं गाव 'वालाँग' या शहराच्या अगदी जवळ आहे. १९९९ मध्ये 'डोंग व्हॅली' हे भारतात सर्वात आधी सूर्योदय पाहणारं ठिकाण म्हणून नावारूपास आलं. विशेषतः १ जानेवारी २००० रोजी हे गाव जगभरात प्रसिद्ध झालं होतं, कारण त्या शतकाची पहिली सूर्यकिरणं पाहण्यासाठी अनेक स्थानिक आणि आंतरराष्ट्रीय पर्यटकांनी इथे गर्दी केली होती.
या गावातून सूर्योदय पाहणं हा एक साहसी अनुभव असतो. सूर्याची किरणं जमिनीवर पडताना पाहण्यासाठी बहुतांश पर्यटक पहाटे २.३० किंवा ३.०० वाजताच आपला ट्रेक सुरू करतात. डोंगराच्या माथ्यावरील व्ह्यूईंग पॉईंटपर्यंत पोहोचण्यासाठी त्यांना घनदाट जंगल आणि डोंगराळ भागातून जावं लागतं.
ऋतूनुसार, इथे पहाटे ४.०० ते ४.३० दरम्यान सूर्योदय होतो. जेव्हा उर्वरित देश अजून जागा झालेला नसतो, तेव्हा इथल्या दऱ्या आणि बर्फाच्छादित डोंगर सोनेरी प्रकाशात उजळून निघतात, हे दृश्य अतिशय नयनरम्य असतं.
इथे पाहण्यासारखी इतरही अनेक ठिकाणं
सूर्योदयाव्यतिरिक्त या भागात पाहण्यासारखी आणखीही बरीच ठिकाणं आहेत.
वालाँग: हे 'डोंग व्हॅली'पासून ७ किमी अंतरावर असलेलं एक सुंदर ऐतिहासिक गाव आहे. इथे १९६२ च्या भारत-चीन युद्धाची स्मारके आहेत.
किबिथू: हे भारतातील सर्वात पूर्वेकडील सीमावर्ती गाव आहे. इथलं सीमेवरचं जीवन जाणून घेणं खूपच रंजक आहे, शिवाय इथलं निसर्गसौंदर्यही अप्रतिम आहे.
लोहित नदी: हिवाळ्यात या खोऱ्यातून वाहणारी नदी आणि आजूबाजूची पाईनची जंगलं खूपच सुंदर दिसतात.
मेयर जमातीची संस्कृती: तुम्ही स्थानिक मेयर जमातीच्या संस्कृती आणि जीवनशैलीबद्दलही बरंच काही जाणून घेऊ शकता.
सनराईज फेस्टिव्हल
डोंग व्हॅलीमधील सूर्योदय किती खास आहे, हे दाखवण्यासाठी अरुणाचल प्रदेश सरकारतर्फे २९ डिसेंबर ते १ जानेवारी दरम्यान एक विशेष 'सनराईज फेस्टिव्हल' आयोजित केला जातो. स्पेशल सनराईज गाईडेड टूर्स, स्थानिक नृत्यं, पारंपारिक खाद्यपदार्थ आणि हस्तकलेची प्रदर्शनं, ही या महोत्सवाची मुख्य आकर्षणं असतात.

