पंतप्रधान मोदींनी कॅबिनेटसह बघितला 'द साबरमती रिपोर्ट'

द साबरमती रिपोर्टः  पंतप्रधान नरेंद्र मोदी यांनी सोमवारी संध्याकाळी आपल्या मंत्रिमंडळासह  'द साबरमती रिपोर्ट' हा चित्रपट पाहिला. संसद परिसरातील लायब्ररीतील बालयोगी सभागृहात पंतप्रधान मोदी त्यांच्या सहकाऱ्यांसह चित्रपट पाहण्यासाठी आले होते. या चित्रपटात प्रमुख भूमिका असलेला विक्रांत मॅसी, रिद्धी डोग्रा आणि राशि खन्ना देखील त्यांच्यासोबत उपस्थित होते. तसेच चित्रपट बघण्यासाठी मोदी मंत्रिमंडळाचे सदस्य, भाजप खासदार, चित्रपट निर्माती एकता कपूर, दिग्दर्शक धीरज सरना, ज्येष्ठ अभिनेते जितेंद्र हे उपस्थित होते. २००२ मध्ये घडलेल्या गोध्रा रेल्वे दुर्घटनेच्या आधीच्या घटनांवर हा चित्रपट केंद्रीत आहे.

चित्रपट पाहिल्यानंतर मॅसी आणि राशी खन्ना काय म्हणाले?

पंतप्रधान मोदींसोबत 'द साबरमती रिपोर्ट' चित्रपट पाहिल्यानंतर अभिनेत्री राशी खन्ना म्हणाली, "हा चित्रपट अनेकदा पाहिला आहे, पण आजचा हा दिवस खूप खास होता कारण आम्हाला हा चित्रपट पंतप्रधानांसोबत पाहण्याची संधी मिळाली. माझ्या कारकिर्दीतील हा एक महत्त्वाचा टप्पा आहे. अनेक राज्यांमध्ये हा चित्रपट करमुक्त करण्यात आला असून इतर राज्येही करमुक्त करण्याच्या तयारीत आहेत. मला आशा आहे की लोक मोठ्या संख्येने चित्रपट पाहतील."

बालयोगी सभागृहातून बाहेर पडताना, अभिनेता विक्रांत मॅसी म्हणाला, “मी पंतप्रधान आणि सर्व कॅबिनेट मंत्री आणि अनेक खासदारांसोबत हा चित्रपट पाहिला. हा एक खास अनुभव होता. मी ते शब्दात व्यक्त करू शकत नाही, कारण मी खूप आनंदी आहे. माझ्या कारकिर्दीतील हा सर्वात महत्त्वाचा टप्पा आहे, की मला पंतप्रधानांसोबत माझा चित्रपट पाहण्याची संधी मिळाली.”

'द साबरमती रिपोर्ट' चित्रपट पाहण्यासाठी आलेल्या भाजप खासदार कंगना रणौत म्हणाल्या की, हा एक अतिशय महत्त्वाचा चित्रपट आहे. हा आपल्या देशाचा इतिहास आहे आणि मागील सरकारने जनतेपासून वस्तुस्थिती लपवून ठेवली. त्यावेळी अशा नाजूक परिस्थितीत लोकांनी राजकारण कसे केले, हे या चित्रपटात दाखवण्यात आले आहे.

भाजप खासदार मयंक नायक म्हणाले की, या चित्रपटाने जगासमोर सत्य आणले आहे. सत्याचा पराभव होऊ शकत नाही. पीएम मोदी आणि गुजरात सरकारची प्रतिमा डागाळण्याचे अनेक प्रयत्न झाले. चित्रपट पाहिल्यानंतर लोकांना सत्य आणि पीएम मोदी व गुजरात सरकारची प्रतिमा डागाळण्याचे षडयंत्र कळेल.

गोध्रा घटनेच्या वेळी पंतप्रधान मोदी होते गुजरातचे मुख्यमंत्री 

गोध्रा घटनेच्या वेळी पंतप्रधान नरेंद्र मोदी गुजरातचे मुख्यमंत्री होते. 27 फेब्रुवारी 2002 रोजी एका धार्मिक कार्यक्रमात सहभागी होऊन अयोध्येहून गोध्रा येथे परतत असताना साबरमती एक्स्प्रेसला आग लागून 59 जणांचा मृत्यू झाला होता.

अनेक राज्यांमध्ये चित्रपट करमुक्त झाला

धीरज सरना यांच्याद्वारे दिग्दर्शित हा चित्रपट १५ नोव्हेंबरला प्रदर्शित झाला. हा चित्रपट उत्तर प्रदेश, उत्तराखंड, गुजरात, ओडिशा, मध्य प्रदेश आणि हरियाणामध्ये करमुक्त घोषित करण्यात आला आहे. ही सर्व राज्ये भाजपशासित राज्ये आहेत. खरं तर, गेल्या महिन्यातच पंतप्रधानांनी हा चित्रपट सत्य उघड करणारा असल्याचे सांगितले होते. चित्रपटाचे कौतुक करताना ते म्हणाले की बनावट कथा मर्यादित काळासाठीच टिकते.

हेही वाचा-

प्रभागस्तरीय भाजप नेत्या दीपिका पटेल यांची आत्महत्या, कुटुंबियांचा हत्येचा आरोप

महिंद्रा कारची टीका करणाऱ्या व्यक्तीला आनंद महिंद्रा यांचे उत्तर