पंतप्रधान नरेंद्र मोदी यांनी दिल्लीत ४,५०० कोटी रुपयांच्या विविध प्रकल्पांचे उद्घाटन आणि पायाभरणी केली. या प्रकल्पांमध्ये गरिबांसाठी घरे, शाळा आणि महाविद्यालये यांचा समावेश आहे.
नवी दिल्ली: पंतप्रधान नरेंद्र मोदी यांनी शुक्रवारी दिल्लीत ४,५०० कोटी रुपयांच्या विविध प्रकल्पांचे उद्घाटन आणि पायाभरणी केली. कार्यक्रमाला संबोधित करताना पंतप्रधान मोदींनी दिल्लीतील जनतेला भारताला जगातील तिसरी अर्थव्यवस्था बनवण्यासाठी सहयोगी बनण्याचे आवाहन केले. ते म्हणाले की, आज ज्या काही प्रकल्पांचे उद्घाटन झाले किंवा पायाभरणी झाली, त्यात गरिबांसाठी घरे, शाळा, महाविद्यालये आहेत. मी त्या माता-भगिनींचे अभिनंदन करतो ज्यांच्या नवीन आयुष्याची एक प्रकारे सुरुवात होत आहे, त्यांना झोपडीऐवजी नवीन पक्के घर मिळाले आहे. हे नवीन आशा आणि स्वप्नांचे घर आहे. मी तुमच्या उत्सवाचा एक भाग बनण्यासाठी आलो आहे.
पंतप्रधान मोदी म्हणाले की, देशाला हे चांगलेच ठाऊक आहे की मोदींनी स्वत:साठी कधीही घर बांधले नाही, परंतु गेल्या १० वर्षांत त्यांनी ४ कोटींहून अधिक लोकांची स्वप्ने पूर्ण केली आहेत. मीही महाल बांधू शकलो असतो, पण माझ्या देशवासीयांना कायमस्वरूपी घरे मिळावीत हे माझे स्वप्न होते.
संपूर्ण देश 'विकसित भारत' घडवण्यात गुंतला आहे
पंतप्रधान म्हणाले की, आज संपूर्ण देश 'विकसित भारत' घडवण्यात गुंतला आहे. देशातील प्रत्येक नागरिकाला विकसित भारतात पक्के घर असावे या संकल्पनने आम्ही काम करत आहोत. या संकल्पात दिल्लीचा मोठा वाटा आहे, त्यामुळेच भाजपच्या केंद्र सरकारने झोपड्यांच्या जागी पक्के घरे बांधण्याची मोहीम सुरू केली. पंतप्रधान म्हणाले की, 'स्वाभिमान अपार्टमेंट' गरिबांचा स्वाभिमान आणि सन्मान वाढवणार आहे. या घरांचे मालक भलेही दिल्लीतील वेगवेगळ्या ठिकाणचे लोक असले तरी हे सर्व माझ्या परिवारातील सदस्य आहेत.
२०२५हे वर्ष नवीन शक्यता घेऊन येत आहे
२०२५ हे वर्ष भारताच्या विकासासाठी अनेक नवीन शक्यता घेऊन येत असल्याचे पंतप्रधान मोदी म्हणाले. जगातील तिसरी सर्वात मोठी आर्थिक शक्ती बनण्याच्या दिशेने आपला प्रवास या वर्षी वेगवान होणार आहे. आज भारत जगातील राजकीय आणि आर्थिक स्थिरतेचे प्रतीक बनला आहे. भारताची ही भूमिका २०२५ मध्ये अधिक मजबूत होईल.
ते म्हणाले की, हे वर्ष भारताची आंतरराष्ट्रीय प्रतिमा जगामध्ये आणखी मजबूत करण्याचे वर्ष असेल. हे वर्ष भारताला जगातील सर्वात मोठे उत्पादन केंद्र बनवण्याचे वर्ष असेल. नवीन स्टार्टअप्स आणि उद्योजकतेसाठी तरुणांना प्रोत्साहन देण्यासाठी हे वर्ष असेल. हे वर्ष कृषी क्षेत्रात नवीन विक्रमांचे ठरणार आहे. महिलांच्या नेतृत्वाखालील विकासाच्या आपल्या मंत्राला नवी उंची देणारे हे वर्ष असेल. राहणीमानात सुलभता आणि जीवनमान वाढवणारे हे वर्ष असेल, असेही ते म्हणाले.
आणखी वाचा-
दिल्लीला 'आप-दा'पासून मुक्त करा; मोदींचा 'आप' सरकारवर हल्लाबोल
