मुस्लिम बहुल मतदारसंघात भाजपचा विजय

नवी दिल्ली: दिल्ली विधानसभा निवडणुकीचे निकाल जाहीर होत असून, २७ वर्षांनंतर राष्ट्रीय राजधानीत भाजप सत्तेची सूत्रे हाती घेत आहे. सत्ताविरोधी लाटेत आप कोसळली असून, पक्षाचे प्रमुख अरविंद केजरीवाल पराभवाच्या गर्तेत सापडले आहेत. ७० मतदारसंघांपैकी मुस्तफाबाद विधानसभा मतदारसंघ सध्या चर्चेत आहे. मुस्तफाबाद मतदारसंघातील भाजपचे उमेदवार मोहन सिंग बिष्ट ३० हजार मतांनी आघाडीवर असून, त्यांचा विजय जवळपास निश्चित मानला जात आहे. करावल नगर मतदारसंघाचे आमदार असलेल्या मोहन सिंग यांना भाजपने मुस्तफाबादची उमेदवारी दिली होती.

दिल्लीतील मुस्लिमांचे वर्चस्व असलेल्या पाच मतदारसंघांपैकी मुस्तफाबाद हा एक आहे. या मतदारसंघात ४०% मुस्लिम समाजाची मते आहेत. १२% ठाकूर आणि १०% दलित समाजाची मते आहेत. मुस्लिम बहुल मतदारसंघात भाजपने आपला झेंडा फडकवण्यात यश मिळवले आहे. या मतदारसंघात भाजपने कसा विजय मिळवला हे जाणून घेणे महत्त्वाचे आहे.

जगदीश प्रधान हे मुस्तफाबाद मतदारसंघाचे भाजपचे उमेदवार होते. पण भाजपने अखेरच्या क्षणी उमेदवाराची बदली करून मोहन सिंग यांना उमेदवारी दिली. करावल मतदारसंघाची उमेदवारी हिंदू नेते कपिल मिश्रा यांना देण्यात आली. सामान्य कार्यकर्ता म्हणून तळागाळात काम करणाऱ्या मोहन सिंग यांच्या विजयाला याचा फायदा झाला. दुसरीकडे, करावलमध्येही पक्षाने संघटन केल्याने तिथेही भाजपने आघाडी कायम ठेवली आहे.

दिल्ली दंगलीतील आरोपीला उमेदवारी
आम आदमी पार्टीने या मतदारसंघातून हसन अहमद यांचे पुत्र आदिल अहमद यांना उमेदवारी दिली होती. एमआयएमचे नेते असदुद्दीन ओवेसी यांनी या मतदारसंघातून ताहिर हुसेन यांना रिंगणात उतरवले होते. ताहिर हुसेन हे दिल्ली दंगलीतील आरोपी असून, निवडणूक प्रचारासाठी परवानगी देण्याची मागणी त्यांनी सर्वोच्च न्यायालयात केली होती. ताहिर हुसेन रिंगणात उतरताच मतदारसंघात हिंदू विरुद्ध मुस्लिम असे वातावरण निर्माण झाले होते.

भाजपचा घरपोच प्रचार
ओवेसींच्या पक्षाकडून मुस्लिम उमेदवार रिंगणात उतरताच मतांचे विभाजन होण्याची भीती आपला वाढली होती. दुसरीकडे, काँग्रेसकडून अली मेहदीही रिंगणात होते. एकाच मतदारसंघात तीन मुस्लिम उमेदवार रिंगणात असल्याने ४०% मतांचे विभाजन झाले आणि हिंदू मतांचे एकत्रीकरण झाल्याचे दिसून आले. भाजपने तळागाळापासून निवडणूक प्रचार केला होता. माजी केंद्रीय मंत्री अनुराग ठाकूर यांच्या रणनीतीमुळे मुस्तफाबाद मतदारसंघात मोहन सिंग विजयाच्या जल्लोषासाठी सज्ज झाले आहेत.

२०२० मध्ये हाजी युनूस यांनी येथून निवडणूक लढवली होती आणि जगदीश प्रधान यांचा पराभव केला होता. हिंदू मतदारांना आकर्षित करण्यात अपयशी ठरलेल्या हाजी युनूसऐवजी आपने आदिल यांना उमेदवारी दिली होती.