बंगळुरूच्या दोड्डबल्लापुरामध्ये एका २५ वर्षीय एसी टेक्निशियनला पोलिसांनी अटक केली आहे. तो Instagram वर एका आंतरराष्ट्रीय कट्टरपंथी व्यक्तीच्या संपर्कात असल्याचा आरोप आहे. सय्यद अबुबकर असं या तरुणाचं नाव असून, तो सध्या न्यायालयीन कोठडीत आहे आणि पोलीस पुढील तपास करत आहेत.
बंगळुरू ग्रामीण जिल्हा पोलिसांनी दोड्डबल्लापुरा येथील एका २५ वर्षीय तरुणाला अटक केली आहे. हा तरुण इन्स्टाग्रामच्या माध्यमातून एका आंतरराष्ट्रीय समाजविघातक आणि कट्टरपंथी व्यक्तीच्या संपर्कात होता, असा आरोप पोलिसांनी केला आहे.
बंगळुरू ग्रामीण जिल्ह्याच्या पोलीस अधीक्षक कार्यालयाने दिलेल्या माहितीनुसार, २० ऑगस्ट रोजी सकाळी ११ च्या सुमारास ही घटना उघडकीस आली. दोड्डबल्लापुरा शहर पोलीस स्टेशनचे कर्मचारी इस्लामापूर परिसरात माहिती गोळा करत होते. तेव्हा त्यांना एक स्थानिक रहिवासी इन्स्टाग्रामवर एका आंतरराष्ट्रीय कट्टरपंथी व्यक्तीच्या संपर्कात असल्याची माहिती मिळाली. या माहितीच्या आधारे पोलिसांनी सय्यद अबुबकर याला चौकशीसाठी पोलीस स्टेशनमध्ये आणले आणि त्यानंतर त्याच्याविरोधात तक्रार दाखल केली.
गुन्हा दाखल, तपास सुरू
दोड्डबल्लापुरा शहर पोलीस स्टेशनमध्ये भारतीय न्याय संहितेच्या (BNS) संबंधित कलमांनुसार गुन्हा दाखल करण्यात आला आहे. आरोपी सय्यद अबुबकर हा २५ वर्षांचा असून तो एसी टेक्निशियन म्हणून काम करतो. त्याला अटक करून न्यायालयीन कोठडीत पाठवण्यात आले आहे. आरोपी ज्या कट्टरपंथी व्यक्तीच्या संपर्कात होता, त्या व्यक्तीची ओळख पटवून त्याला शोधण्यासाठी पुढील तपास सुरू असल्याचे पोलिसांनी सांगितले.
