बस्तरमध्ये सुरक्षा दलांशी चकमक; ५ माओवादी ठार, २ जवान जखमी

रायपूर: छत्तीसगडमधील बस्तरमध्ये सुरक्षा दलांशी झालेल्या चकमकीत पाच माओवादी ठार झाले. दोन जवान जखमी झाले आहेत. शनिवारी सकाळी हा हल्ला झाल्याचे तेथील अधिकाऱ्यांनी वृत्तसंस्थांना सांगितले.

नारायणपूर-कांकेर जिल्ह्यांच्या सीमेवरील जंगलात शनिवारी सकाळी आठ वाजता गोळीबार झाला. येथे सकाळी सुरक्षा दलांची शोधमोहीम सुरू होती. सीमा सुरक्षा दलातील (बीएसएफ), जिल्हा राखीव दलातील (डीआरजी) आणि विशेष कार्य दलातील (एसटीएफ) अधिकाऱ्यांनी या शोधमोहिमेत भाग घेतला. ठार झालेल्या माओवाद्यांच्या मृतदेहांसह शस्त्रे जप्त करण्यात आली असून, घटनास्थळी अजूनही शोधमोहीम सुरू असल्याची माहिती अधिकाऱ्यांनी दिली.

माओवाद्यांशी झालेल्या चकमकीत जखमी झालेल्या दोन जवानांना हेलिकॉप्टरने राजधानी रायपूरला आणण्यात आले. त्यांना रुग्णालयात दाखल करण्यात आले. दोघांचीही प्रकृती धोक्याबाहेर असल्याचे अधिकाऱ्यांनी सांगितले. या वर्षी बस्तर भागातून १९७ माओवाद्यांचे मृतदेह सापडले आहेत, ज्यात आजची चकमकही समाविष्ट आहे. या भागात सात जिल्हे येतात.